若你信了我的大話 我就能聽見你的真話: 67. 重逢

結果是
 
除了自己快得極不尋常的心跳聲外，我甚麼也聽不到…
 
一股失望和沮喪之情由內而外進襲我全身，霎時間我有種萬念俱灰的感覺，這亦是我為甚麼之前一直不想求証的原因。
 
(曉嵐，如果連衣個機會都唔係你，咁我到底幾時先可以搵到你?)
 
 
「叔叔?」




 
「嗯?」很快男孩的聲音讓我重回現實。
 
「咁你幾時會幫我搵到我親生爸爸? 仲有無咩資訊我需要比你?」
 
「都無咩喇，或者等我同你媽咪直接見過面啦… 有無機會我可以見到佢同佢傾幾句?」雖然已經沒有動力，不過既然碰巧在澳洲又應承過對方，總不能就這樣食言，所以這委託還是要完成，而入侵Xanthus 媽媽思想這步驟似乎亦無可避免。
 
「就咁約佢出黎有d難諗藉口，因為佢真係唔會識朋友架… 不過佢聽日慣常會去market，或者我地直接去果度撞佢?」Xanthus皺了一皺眉頭然後提議道。
 
「都可以嘅，到時我盡力試下啦…」沒心機的我沒多想下便答應了。




 
 
之後我們再閒談了一會，不過基本上我都沒怎樣投入對話。最後約定了明天碰面的時間後我們便各自歸家。也許Yanny察覺到我的不尋常，所以她故意陪我走了一段路。
 
「做咩突然失晒神咁呀?」Yanny關心地問道。
 
「曾經我期望過佢嘅媽咪就係曉嵐，不過岩岩我發現左唔係…」我失望地說。
 
「下? 點解你無啦啦會咁覺得? 唔怪得你突然間咁有興趣幫手啦!」Yanny吃了一驚。
 




由於Yanny早已知道我有能力的秘密，加上我現在確實是需要一個傾訴對像，於是我索性把整個能力的觸發條件以及Alfred告訴我關於這能力的故事全告訴了Yanny。
 
「所以衣個能力其實係曉嵐傳比你，而佢都曾經有過你嘅bb?」Yanny比剛剛更加震驚。
 
「無錯，而Xanthus不論年紀，屋企背境，外型都完全吻合我要搵嘅人…」我解釋道。
 
「咁你點知佢唔係?」Yanny又問道。
 
於是我又把剛剛的測試告訴了她。
 
「哦… 唔知點解聽落總係覺得怪怪地咁…會唔會唔準呢?」Yanny想了一想後說道。
 
「希望越大失望越大，我唔想再失望多次喇，聽日快快手幫Xanthus搵到佢老豆嘅資訊我就返香港喇…」我繼續萬念俱灰地說。
 
「Come on! 唔好咁灰留多幾日先啦，話唔定有意想不到嘅收穫呢，始終有情報話佢可能係澳洲嘛!」Yanny見我一副死氣沉沉地樣子便嘗試鼓勵我說道。




 
「你真係樂觀喎… 仲可以有咩收獲? 澳洲咁大我都唔知仲可以點搵… by the way，同我講咁多野你真係唔驚咩?」我轉了轉話題。
 
「算啦，反正都比你讀過心，而且我d秘密你都知道晒咯… 咦，咪住… 你讀過我心，即係你識我第一日已經講過大話呃我? 」Yanny說了一半後突然想起了甚麼然後一臉生氣地說。
 
「係呀… 當時好奇你到底發生過咩事，咪求其講左個無關痛癢嘅大話囉… Sorry，我其實平時真係好少會咁，可能直覺話我聽你係一個好有故事嘅人啦，結果亦都証明我係無錯…」我略帶歉意地說。
 
「咁我係應該開心定唔開心? 唉，不過算啦，諗返如果唔係你當日知道左我嘅故仔，我又未必會知道返你嘅故仔，更加唔會有衣家嘅故仔，所以有d野都係整定嘅…」Yanny略帶感觸地說。
 
「哈哈，果然豁達~唔再嬲我就好喇…  係呢，咁你衣家同郭靖點呀?」想起了我之前也是因為這”整定”的故事幫她和郭靖解開了心結於是問道。
 
「幾好呀，好朋友，屋企人咁囉~」Yanny笑著說。
 
「咁就好… 係喎，前晚都唔記得講，我上次見完你返去香港後，我都有搵返李乘風。」
 




「佢…幾好嗎?」一聽到李乘風這三個字，Yanny明顯被觸動到。
 
「佢好好，好幸福，你嘅犧牲絕對無白費，而我地都做返好兄弟喇~」我露出了一個微笑說道。
 
「咁就好喇~」Yanny露出一個滿足但又有點唏噓寂寞的笑容，不過我知這是她真心會想聽到的消息。
 

第二天，我在約定的時間到了市集。
 
Xanthus昨天說和她一起的便是她的母親，於是我開始了搜索工作。幸好那時人流不算多，在找了一會後不久我便找到了Xanthus的身影，他正背向著我站在一個蔬果檔前。他旁邊有一位中年女子正在細心挑選水果，而Xanthus則左顧右盼，應該是正努力地尋找著我。
 
很快Xanthus找到了我的踪影並向我輕輕指了指身旁的女性，不過他的動作並沒有逃過身旁那位女性的法眼。
 
「你同邊個打招呼?」她覺得奇怪然後便順著Xanthus的眼神輕輕地把臉轉向了我的方向。
 




當我和她的眼神互相觸碰的時候，世間的時間彷彿都停止了。那熟悉的眼睛和臉容跟十多年前看似並無分別，只是風霜無情地在她的臉上留下了痕跡，但我還是立刻認出了她...
 
「天...樂/ 曉...嵐?」我們同時叫出了對方的名字。
 
十多年內一直尋找的人突然間出現在自己面前，我一時反應不過來，雙腳彷佛像生了根一樣只能企在原地。直至不知過了多久當我看見對方轉身想逃走，本能反應才軀使我打開步伐邁步向前衝向對方的位置，因為我知我不能再承受她從我的生命中逃脫。
 
「唔好走! 求下你唔好走...」追逐了數個街口，好不容易一向有運動的我終於追上她並捉住了她。
 
「我知你擔心D咩... 如果你真係驚，我可以以後唔再講野，或者你可以唔再信我講嘅任何野... 我只係希望你可以唔好再消失...」然後我跪了下來，哭著向她發出我卑微的哀求。
 
事實上自從知道了背後的原因，我一直有思考解決方法，而最直接有效的方法便是我不再說話，那曉嵐便不用擔心我能讀取她的思想。
 
若能夠尋回她，要我做啞巴又有甚麼所謂?就算我不能說話，但只少我還是能聽見她的聲音。
 
「天樂...對唔住...」看見我喊得聲嘶力竭，曉嵐沒有再掙扎，而是反身回抱了我。