若你信了我的大話 我就能聽見你的真話: 50. 澳洲之旅(四)
「咦，欣欣呢?」郭靖回來後看不見Yanny所以問道。
「佢話要去一去買D野，晏少少先join返我地喎。」而實情是Yanny正躲在某處透過電話正偷聽著我們的對話。
「哦…」他無表情應了一聲便坐回原位。
「係呢，咁返返去頭先嘅話題，其實你係幾時開始鍾意Yanny?」我把握機會繼續追問。
「點解你咁有興趣呀… 」而他明顯並不太想談及這話題。
「難得撞到香港人仲要原來係朋友嘅朋友，所以都想知道你地嘅故仔嘛! 講我聽啦~」知他是個好人我哀求道。
「嗯… 確實幾時我都唔記得喇。淨係記得中學果陣我地不時都會去乘風屋企打機，而果陣欣欣因為鍾意痴住乘風，所以我地每次都會見到佢。
果陣嘅欣欣好可愛活潑架，每次見到佢笑我都會比佢傳染有種好開心嘅感覺，而同一時間佢又好細心同善解人意。我記得有一次因為屋企人嘈完交我心情唔好，係乘風屋企都係悶悶不樂，但可能因為為平時我份人本身都比較木獨，所以無乜人留意到，唯獨欣欣發現我有唔妥，之後佢除左專登主動請我食佢嘅珍藏朱古力外，又主動同我傾偈同係咁引我笑… 之後，見到佢嘅笑容就係我人生一直最大嘅動力…」郭靖一邊回憶一邊笑著說。
「咁雖然我唔係識左Yanny無耐，但我都承認佢係一個好特別嘅女仔。不過你應該知佢一直其實都只係鍾意佢個乘風哥哥?」
「我當然知道啦，每次見到佢我嘅注意力都會放晒係佢到，又點會留意唔到佢對乘風係點呢?」
「但就算係咁你都選擇仍然一直係咁鍾意佢…」
「其實由第一日開始我就知我同佢係無可能架喇，不過正如頭先所講，控制好自己expectation咪得囉。我最想嘅只係希望佢可以一直保持住佢果個天真活潑嘅笑容，但點知個天偏偏就要佢受咁嘅苦… 我好嬲自己唔係李乘風，唔可以令佢真正咁開心快樂，不過就算只得幾輕微嘅作用都好，只要可以令佢稍為開心我都會盡力去做… 只係另一方面，有時我會感受到佢其實唔想接受我對佢嘅好…」
「咁你知唔知點解佢唔想接受?」
「你覺得呢? 我有諗過…唔知佢係咪感覺到我鍾意佢所以唔想比錯覺同希望我?」郭靖帶著點困惑問道。
「你都識講佢係一個善解人意又細心嘅人，其實你咁多年黎對佢係點佢又點可能唔知? 只係佢覺得欠你已經太多，佢唔想再越欠越多啫…」我把Yanny的原話說了給他聽。
「其實感受到佢嘅態度，驚佢唔開心我都努力控制住自己唔敢再對佢咁好…不過如果佢真係咁諗，佢就真係太傻喇… 將心比己，佢自己都知乘風對佢唔會真係有愛情果種愛，但佢都一直仲係咁鍾意乘風對佢好好。
試諗下如果乘風想避開佢，唔比佢對自己好，咁佢又會唔會真係開心? 打從第一日我已經無諗過要同欣欣一齊，我奢求嘅就只係想佢開心快樂唔駛再受苦，而我就一直都係係自己應份嘅位置守護佢… 咁嘅奢求係咪都好過份?」郭靖說下說下聲音亦開始有點沙啞。
「咁我問你如果只要你開口講鍾意佢，佢就會同你一齊，你會唔會開口表白?」
「如果佢真係愛我我當然會。但如果明知佢唔係真係愛我而可能只係出於同情或者覺得虧欠，咁我唔會接受…」郭請想了一會後答道。
「點解? 你唔想同佢一齊咩?」
「作為朋友，我有信心可以衣一世都留係佢身邊。但如果牽涉到愛情或者另一種關係，仲要係明知佢心有所屬嘅情況下，我驚有日大家關係會被破壞，始終一拍拖大家對對方嘅感覺同要求都會唔同，而且一旦得到過，人就會越黎越貪心，我驚一齊左後，我有日反而接受唔到佢心入面愛嘅唔係我而係李乘風…
其實當日欣欣同乘風何嘗唔係咁? 如果無一齊，佢地應該可以做一世嘅好兄妹，但衣家就攪成咁…所以有時做人最忌有非份之想，去貪一d自己都知唔係屬於自己嘅野。我寧願安守衣家嘅位置，一直以朋友陪係佢身邊。
而且都明知對方唔係鍾意自己，咁格硬一齊黎做咩? 咪只會攪到大家唔開心?」
郭靖的說話讓我想起阿勇和阿武的故事，不過幸好他們最後仍能回到好兄弟的關係。而欣欣和乘風的例子，雖然當中其實涉及到一些郭靖不知道的因素，但整體來說他的憂慮亦是事實。想不到沒拍過拖性格又比較戅直的郭靖在這問題上竟然想得這樣透切。
「你無諗過話唔定一齊左後有日佢比你感動到真係鍾意左你?」我再最後的試探。
「我識左欣欣咁耐，了解左佢咁耐，我知衣件事係無可能發生。佢個心永遠都只會得一個人，所以先咁痛苦…」郭靖肯定地說道。
「嗯... 估唔到你都已經有咁透徹嘅領悟諗得咁深入喎，不過某程度上我係支持你。比起一時的愛情，我寧願要一世的友情。」
若早知結局會是這樣，我寧願和曉嵐做一輩子的好朋友。只是就像賭博一樣，人們總不能透視將來而只是希望自己能成為例外，又有多少人真的能完全控制自己不去賭那微乎其微的”可能性”?
「因為除左屋企人，欣欣就係我最重要嘅人，同佢嘅關係我當然已經考慮過好多唔同嘅野啦。對我黎講最重要就係唔好失去佢…」
「咁如果有機會比你同佢講你嘅心底話，你最想同佢講咩? 又或者咁講，如果佢覺得對你有虧欠，你覺得佢對你最好嘅償還會係咩?」
「我會想話比佢知我從來都無非份之想要做佢男朋友，所以唔好諗咁多，只要好好接受我對佢嘅好咁就夠。其實我一直覺得世界上可以最理解我嘅應該就係佢。只要佢幻想自己係李乘風，我係佢，咁佢應該就會明白我想要D咩…
無論點，其實我都唔會鍾意到第二個架喇。所以對我最好嘅報答，就係大家一世嘅友誼，比我以朋友嘅身份對佢好，一直陪伴佢左右。只要佢可以開心快樂，而當中又有少部份係因為我嘅contribution，咁我就心滿意足架喇。」
「你真係一個絕世好人，我欣賞你! 我相信你地可以架， 衣杯我敬你嘅~」
對郭靖這個人我是衷心讚賞，因為我感覺到他內心那種善良和純粹。事實上我亦很希望他能得到他想要的那種幸福，所以我才要花這些功夫去讓Yanny了解對方的心意。雖然愛情不能勉強，但一世的友情她應該是絕對還得起，而這亦應該能解開她自己的心結，真真正正舒舒服服地和郭靖相處。
「聽完有咩感想呀?」這晚郭靖走後，我和Yanny繼續走了一段路。
「佢真係好傻…」Yanny回了一句。
「係呀，同你一樣囉~ 佢都講到出口，以為你係世界上可以最了解佢嘅人。」
「佢都講到咁，我仲點會唔明呀? 我明架喇，亦為努力去做，因為衣個係報答佢，亦係令佢開心嘅最好方法。」
「講到好似係你受委屈咁… 不過咁就好，不枉我花費左一輪功夫~」看見她終想通，我亦替他們感到高興。
「多謝你囉~ 咁你可以解開返我嘅疑團未呢? 我都照足你做同你玩完個遊戲啦。」 事情解決後，Yanny當然不會忘記我還欠她甚麼。
「放心啦，我會講，等你聽完你就會明白我其實為左你地到底付出左d咩架喇…」
「咁誇張?」
「無誇張，為左幫你，我黎緊會講過好大嘅秘密你聽，衣個秘密我從來都無同任何人講過，所以你都一定唔可以同其他人講，唔係我會好麻煩架…」
「聽完你咁講我會驚架喎…」
「真係驚你衣家可以選擇唔聽架~」
「唔得! 咁你快D講啦~」
「其實之所以肯講你聽，除左因為幫你，另一個原因係因為你都經歷過一D匪夷所思嘅野，所以接受能力會高D… 不過你聽完後可能會驚左我架喎… 你真係想聽?」
「唔好再賣關子快D講啦… 我一定要知道點解你會知道乘風哥哥嘅秘密呀…」Yanny開始有點不耐煩。
「嗯…不過反正我聽日都走咯，你驚我都無所謂啦。你... 有無聽過林家謙首時光倒流一句話?」
「有呀，我間中都有聽下香港d歌。但有咩關係?」
「情願你有讀心的超能力，能發現我的心計提早阻止~」我緩緩唱出。
「雖然幾好聽，不過… why?」Yanny微微皺起了眉頭。
「因為我真係有讀心的超能力。」我平靜地說道。