若你信了我的大話 我就能聽見你的真話: 25. 包養與交友App (下)
當我合上眼，Wing的回憶像龍捲風般吹襲著我的腦袋。她們的相識，相戀，很多很多的回憶和片段，讓我明白Wing為甚麼會這樣迷戀著他。
「Wing你睇下我銀行密碼改左咩? 我手機都係呀，以後我對你再無秘密架喇~」
「Wing你病左? 有無事呀? 我即刻黎煲粥比你食!」
「塊心型牛扒靚唔靚，好唔好味呀? 我整左好耐架!」
晚上在一個海灘，當男方拿開掩著阿Wing雙眼的手，映入眼廉是遍地蠟燭組成的” I love (心) you”。
還有一些對方在床上帶給Wing的激情我便不在此描述。不過我能感受到” 唔想”這答案並不是Wing的真實感受。在她內心深處，她很想知道對方為甚麼突然會消失，為甚麼大半年感情可以說捨棄就捨棄。她有點擔心對方或許根本完全沒有愛過自己的同時又期待著有天對方會突然再次出現，然後告訴她當時自己的難言之隱。而這些心情我全都明白…
侵入她回憶的動機，其實並不是想知道她們的往事，而是我需要知道Wing的真正感受，還有對方的樣子，電話，名字等等…. 而最後我還有一個意外的收獲-車牌號碼。
在和她談天說地了一會後，我們便各自離開。然後，我很快便找了一位欠我人情的律師朋友。
「幫我查一個人，我比佢電話，名同埋車牌你，不過個車牌係大半年前，唔知有無轉過手。」
不要看輕律師這職業，他們有很多秘密渠道和方法去追查一個人的資料。三日後友人覆了我。
「查到喇，你比嘅名係假，電話無record，好彩車牌可以查到個車主，不過半年前真係轉過手。我轉頭比D資料你啦，記住睇完唔好留底。」
看完那男人的資料，我突然覺得Wing很可悲，曾經那樣喜歡的一個人，和他有過超過半年的美好回憶，最後原來竟然連對方的名字都是假的。這個男人原來早已結婚，而且還有一個兒子，而和Wing分手是因為他們舉家移民了到澳洲。
望著螢光幕把資料從手機刪掉，我在想到底該不該讓Wing知道真相。若讓她知道真相，她的愛情觀會不會扭曲得更加嚴重? 但若留有這疑問一輩子，那她整個人生可能都不會快樂，甚至會成為心魔，因為那當中的感受我自問很清楚…
想了一天，我的心下了一個決定，我再次違背了自己的宗旨，因為我真的不希望她跟我一樣帶著這個問號一輩子。
兩天後，Wing主動找了我。
「喂，個男仔突然覆左我email! 」
「竟然!? 咁佢講左D咩? 」我裝作驚訝。
「佢解釋返點解當年突然消失左… 」
「咁點解? 」
「佢話佢其實一早知要移民澳洲，同我發生感情係一個意外，但越投入佢就越唔敢同我講… 結果拖到最後佢選擇左突然消失無聲離開…」
「咁點解佢衣家又突然搵返你?」
「因為佢係果邊已經搵到新女朋友，佢覺得自己可以move on，同時亦都擔心我衣世都會為衣件事耿耿於懷有陰影，所以佢鼓起勇氣同我解釋返件事同埋講對唔住…」
「咁你衣家感覺如何?」這是我最關心的問題。
「其實初初我懷疑封email係假… 因為果個唔係佢email黎… 雖然佢有解釋因為原本留比我果個email突然比人hack左… 不過佢又講到D只有我地兩個人先知嘅事…」Wing帶點懷疑地說。
「如果真係得你地兩個先知，咁都唔到你唔信啦，衣家d email係好似好易比人hack… 咁知道左原因，你心結有無解開?」而我當然要幫自己的行為圓謊。
「嗯… 雖然答案係難接受，不過知道左發生咩事，至少我唔駛再估下估下，比以前嘅事影響到自己，可以真正咁move on… 」
「恭喜你呀~」看來我的努力並沒有白廢。
「其實衣家知道左真相，我反而有D失落…」誰知她突然又說。
「點解?」
「因為一日未知真相，一日都仲有無限想像嘅可能。例如會唔會其實佢當日因為患左絕症驚拖累我所以靜靜咁走左，然後有日佢醫返好然後突然出現返?又或者佢其實係特務有件好危險嘅事要解決，所以解決完先可以再返黎搵我。但衣家我無得再幻想，仲要接受我同佢嘅故事真係已經完左…」
「明嘅… 不過咁長遠對你一定係件好事…」其實Wing一邊說，一邊也顯示出自己並不相信這些可能。只是人，很多時都需要一個希望期待下去才有動力活下去，而我就是要她接受現實才多此一舉。
「我知呀… 只係感性上仍然會失落。」
「咁你會唔會改變你嘅諗法?定都會繼續衣家嘅生活?」這是我好奇的一部份。
「唔會呀，因為衣家嘅生活我都幾enjoy，雖然如果唔係佢，我應該唔會踏入衣條路。而且佢嘅email都無令我嘅theory改變，佢都係照樣消失離開左。」
「咁…你繼續加油搵Daddy啦。」聽到Wing的答案，我有點失望，但又覺得也許一切都是命運的安排。
「Yes~我要繼續諗計說服果個男人應承我，有無計呀?」她又把話題帶到Brandon那裏。
「咁人地都擺明係唔想應承你淨係得你一個啦…」我不厭其煩再解釋。
「咁佢都唔好要求我淨係可以得佢一個囉!」而她又繼續她的晦氣。
「… 你地慢慢繼續猜啦…」對於這不會有結果的爭論，我決定不再理她。
和Wing對話完畢，我也開始要想一想該怎樣向Brandon匯報我的”調查結果”以拿取我接著三個月的房租。Brandon最想知道的是為甚麼Wing會有這個要求，其實答案也不用太複雜。
「簡單講，Wing搵包養其實主要唔係為錢，佢自己有份正當職業夠晒生活，錢只係附帶品，佢最想要嘅其實真係戀愛嘅感覺，所以如果你要求佢得你一個，佢都會要求返你得佢一個，唔係衣個就唔係一個對等嘅關係。」
「對等? 但佢要我比錢佢架喎…」Brandon冷笑了一聲。
「咁你當錢係令佢參與嘅入場卷? 其實佢唔係為錢我估你都好難逼到佢，所以只可以係答應或者呃佢。當然，如果你有信心嘅可以拒絕然後繼續用你嘅魅力希望有日佢會抗拒唔到你。」我為Brandon分析道。
「佢係咪有D咩唔好嘅經歷?」Brandon再問。
「嗯… 我只可以答你的而且確佢係因為之前一D事而選擇行衣條路，但之於係咩事我就唔方便同你講，或者等你第日慢慢自己發掘啦。」這是Wing的私隱而不是我答應調查的內容。
「哈哈，有D意思… 好，咁我知點做喇，尾數我會轉頭過埋比你。」不得不提，Brandon的笑聲讓我想起了Barney在How I Met Your Mother裏經常展現那個challenge accepted的笑容。
這是我和Brandon之間最後的對話，不過因為之後我間中還有和Wing聯絡，所以我大概也知道他們的後續故事，就是他們之間展開了一場歷時超過半年的拉鋸戰。其實二人都對對方明顯有好感，但同時又未至於會為對方妥協。於是二人在保持聯絡的同時，又繼續尋找其他人。
尋尋覓覓了半年，雙方似乎都找不到比對方更能讓自己心動的選擇，加上談了半年天，二人之間的感情亦慢慢建立了一定的基礎，終於在半年後分出了勝負。
最後先屈服的是Brandon，因為這本年他都找不到其他合適的目標，其實這也和只有Wing一個沒太大分別，所以他索性答應了Wing的條件，但同時間心裏亦暗下了一個決定，就是一定要征服Wing的身心，讓她不能離開自己，之後他便有反擊的機會。
也許是因為感情累積夠深，也許是早已壓抑太久，二人第一次相見，很快便滾上了床單，而Wing形容那晚是她人生其中最奇妙的一晚，原來等待也可以有這種催情的作用。
不過再過了一段時間後，Wing突然不再和我聯絡從TG上消失了，所以我亦不知她們真正最後的結局。會不會是因為Wing從Brandon身上發現了我的真實身份? 還是她突然決定從良不再玩app和TG? 到這刻我仍不知道答案…
只是這委託，確實是其中一個我覺得蠻特別的故事。
也許戀愛的真正墳墓，並不是結婚，而是當你已認定所有戀愛最後的結果都會是悲劇收場。