倒流重遇妳: 折磨/救贖 時間:Form3

我就係咁渣住封信，坐左喺沙發上面諗

2018年，我呢個時候應該係一個中三嘅學生。

「依家係星期五…咁即係代表我今日要返學？」

「不過今日係7月21號….唔知放緊暑假未」

「叮叮叮…..」喺我諗緊究竟要唔要返學嘅時候，鬧鐘響起。





呢個鬧鐘話左比我聽今日係要返學嘅，因為如果今日唔洗返學架話，我前一晚一定會熄左個鬧鐘。

好彩我嗰時仲係一個乖乖學生，一早就放左套校服喺房入面張凳到。

我攞起件勁細件嘅校服著喺身，竟然啱身，睇嚟呢3年我高左唔少。

攞起銀包鎖匙電話，孭起個書包，著對皮鞋，出門口。其實出門口前我本身下意識咁想攞口罩，不過又諗起呢個時候應該未有疫情。

我屋企離學校唔係好遠，所以我通常行路返學嘅。





我一邊行住呢條陌生又熟悉嘅路，一邊望下3年前嘅環境。

好多本應執咗笠嘅店舖重新出現喺我眼前，尤其係嗰間我之前成日幫襯嘅士多，唯一冇變過嘅就只有嗰間「麥當當」，我莫名奇妙咁有啲感動。

大約10分鐘之後，我已經返到學校，我跨過籃球場，個籃球場同三年嚟完全冇變過——都係咁舊。

我沿著條樓梯行上二樓，再行入去最近樓梯嘅3A班——我喺行樓梯嘅時候已經記返起我Form 3時讀嘅班。

我行入班房，大部分人都未返到，班房入面得幾個我唔係幾熟嘅人，同埋……林逸軒，我喺學校入面為數不多嘅其中一個朋友，我都習慣叫佢肥軒，因為佢係個肥仔。我同佢從Form1就識，去到Form6都係好熟，DSE放榜嘅時候好似都冇見到佢，可能佢嗰時未返掛。





「喂，藍！」肥軒都見到我，一邊叫我一邊行過來:「我好緊張啊！」

「吓？」我一臉茫然

「你係咪失左憶啊？今日派成績表wor。」肥軒見我個反應都呆左幾秒：「你尋日仲打電話比我話你緊張到訓唔著架喎！」

「有乜嘢好緊張……」對於收完DSE成績冇幾耐嘅我，呢啲咁嘅小試算啲咩，不過我低Form嘅時候好似真係咁緊張自己啲成績，於是我收返埋我正諗住講嘅嘢：「哦…」

「做咩吖，點解今日咁少野講嘅？」

「冇野，純粹尋日訓唔好。」我求其諗左個藉口，仲扮個好眼訓嘅樣，同時我心諗：「我平時好多野講架咩……」

跟住我走向老師檯，望住上面個座位表，因為我想搵返我個位喺邊。我相信肥軒呢個時候應該喺後面用奇怪嘅眼神望住我。

我搵到自己個位之後就坐低扮訓覺，不過我個大腦已經開始運作：「派成績表….代表今日都係頒獎典禮，我Form3嘅時候比老師迫左去參加個比賽，好似有攞獎。」我不斷諗，慢慢記返起今日將會發生嘅事。







禮堂，頒獎典禮

「喂！藍！到你攞獎啦！」喺我就嚟訓著嘅時候，肥軒喺我耳邊講。

「唔係我啊……係李若藍啊…….」之前我就係信左佢，出左去先發現原來唔係叫我，搞到我勁尷尬，好彩我今次一早就知道。李若藍企喺台上面，三年前佢已經好靚，而且多左一份稚氣。

跟住之後發生嘅事同我記憶中一模一樣，攞獎、攞成績表、睇選科結果。

而我嘅成績同選科結果都係一模一樣，因為數學冇帶計算機，肥左，總排名被拉到好低，跟住被迫讀咗中國文學同中史。

我記得當時我即刻喊到眼都腫曬，不過我今次心情毫無波瀾，因為一早已經知道。







今日發生嘅一切令我堅信我真係返左來以前，不過其實我認為呢個對我尼講係一個折磨，因為我要做返3年前做過嘅所有嘢……

不過既然我可以知道未來會發生嘅嘢，就代表我可以改變本身會發生嘅事情，都未嘗唔係一件好事。我決定利用接下來嘅暑假好好適應返呢個「新環境」