倒流重遇妳: 成績 時間:Form6

「叮叮叮……」煩人嘅iphone鬧鐘鈴聲響起，我熄咗個鬧鐘，望住個天花版望左成分鐘，先慢慢爬起床，雖然話係起床，但係我成晚都冇訓著過。我行出間房，個廳一粒聲都冇，唯一嘅聲音就係窗外傳來嘅車聲，我老豆老母應該已經出左去返工。我行入廁所，求其梳洗一下，換套衫就出門口。


今日係DSE放榜日，對大部分嘅中六學生嚟講，亦都係十二年強制教育嘅終點。


返到學校，我算係比較遲返嘅人，好多同學都已經攞咗佢地嘅成績，有啲攞住張成績表，慢慢咁踏出校門，雖然全部人都戴著口罩，但從佢地嘅眼神都可以估到係咩情況，籃球場嗰邊主要分左做兩批人：一批人攬住一齊癲咗咁大笑，如果佢哋喺街度分分鐘比人拉去精神病院。而另一批人都係癲咗咁，不過係癲左咁喊，當中仲有個人比幾個老師同埋社工圍住，聽人講佢好似收到成績之後就不斷話想去自殺。

冇錯，教育局就係咁勁，可以利用一張紙改變大部分學生之後嘅命運





我冇比呢啲人影響我嘅心情，繼續毫無表情咁，不快不慢地行上樓梯攞成績

名稱：陳若男
中文：2
英文：2
數學：2
中國文學：2
中國歷史：2

Best five 總分 10分





攞住呢個成績，我想喊，不過一滴眼淚都流唔到出嚟。因為我尋日訓喺張床上面已經估到呢個結果，畢竟DSE之前我喺度做緊啲乜嘢……得我一個人知，我只可以
自嘲咁笑一笑


「阿藍！成績點啊？」我聽到有把女聲喺我7點鐘方向嗌，我下意識回頭，嗌緊嗰個係同班嘅A同學，不過佢唔係叫緊我，佢叫緊嘅係我三點鐘方向嘅李若藍，我暗戀左三年嘅女仔。我望住佢，佢矮矮地，秋水盈盈嘅眼，帶住一副圓形幼框眼鏡，紮住個馬尾，着住純白色嘅校服同埋淺藍色嘅短裙，濯清漣而不妖。

聽到A同學叫佢之後，佢即刻回頭，露出一個甜美嘅笑容。呢個係佢嘅招牌笑容，佢笑嘅時候兩隻眼會彎起來，可愛而不做作，我最鍾意見到佢咁樣笑，因為佢每次咁樣笑就代表佢好開心。






未答A同學，我已經知道佢考到一個好好嘅成績。我同佢係兩個唔同世界嘅人：我係一個讀書好差嘅學渣，而佢係一個讀書好好嘅學霸。如果我只係一個街邊唔起眼嘅露宿者，佢就係一個受萬人矚目嘅明星。我地只有三個共通點，第一就係我地喺同一班——因為我地學校冇精英班呢個殘忍嘅制度。第二就係我地嘅選修科都有中國文學——不過我係因為成績太差被迫讀，而佢就係自願讀。最後就係我地個名都叫若藍


我攞住張成績表，爬上去學校嘅天台。當然，我唔係想高空擲物，從天台跳落去自殺。我坐喺天台邊個圍牆上面，一邊感受陽光嘅溫暖，一邊諗下我嘅未來應該點行

坐左15分鐘，我咩都冇諗到，反而比陽光照到有啲眼訓。

「後生仔，諗緊咩啊？」有把粗獷嘅聲音從我右邊傳來，我望過去，係一個阿叔，望落去四五十歲度，留左鬚，塊面紅晒咁，好似飲酒飲到醉醉地咁。

「邊個會喺咁早飲酒…..」雖然我都覺得佢係個怪人，不過我當時冇心情諗佢係邊個

「冇諗咩。」我求其答佢

「考得好差？」佢望一望我手上面嘅成績表講





「嗯。」我應左一聲：「不過冇得怨，邊個叫我DSE仲喺度周圍玩」

「嗯……」個阿叔好似諗緊啲咩，大約半分鐘之後佢喺褲袋攞左啲嘢出嚟：「拎住。」

其實我本身唔係幾想拎，不過見佢嘅眼神同語氣先遞手從阿叔嘅手上拎過嚟

我低頭望住個野，係一個信封，摸到入面好似有張紙，我正諗住拆開個信封嘅時候……

「加油。」個阿叔突然喺我耳邊講，跟住，佢將我從天台推左落去。

「啊啊啊啊啊啊啊！」我就咁樣從天台跌落去，我唔知點解佢要咁做。呢個時候，我腦海出現左好多人：有李若藍，我阿爸阿媽，我啲朋友……..跟住我個腦不斷重播返我由細到大經歷過嘅事。呢個應該就係所謂既「人身走馬燈」，成日聽人講，今日終於親自感受到

喺我跌到落地嗰一刻，我眼前只剩低一片黑色，但係我冇感覺到任何痛楚。我以為自己已經死左，不過我仲可以諗到野。






我擘大隻眼，出現喺我眼前嘅，唔係咩天堂地獄定係奈何橋，而係我間房嘅天花板，而我正瞓係張床上面

「頂，原來係夢……」但係啱啱發生嘅嘢太過真實，我仲係心有餘悸，等左成分鐘先回過神。但係呢個時候，我感覺到我隻右手入面有啲嘢，我攞起佢，望一望，我即刻嚇得直冒冷汗。喺我隻右手入面嘅，唔係咩人頭斷手等恐怖嘅野，而係個「夢」入面個阿叔比我嘅嗰封信……