《一個訂婚書生嘅出軌故事》: 荽女人

「今日著新衫返工喎。」Rick一早上班便跟我說。

「係呀，琴晚同女朋友食完飯買㗎。」我有點自豪的說。

衣服雖不名貴，但質地足夠順滑。布料貼身的觸感讓我聯想到江柏琪的肌膚，彷彿她一直都在觸碰着我。

當看到送贈的物件，便自然會想起對方，難怪戀人都愛送貼身衣物予另一半。

展覽來到最後一天。





完結的時候已是晚上八時，同事們都在收拾攤位、點算貨物數量、搬運。

Rick知道我約了鍾美嘉做訪問，特意讓我提早下班，說不要讓學生太晚回家，畢竟一個女生深夜獨自在街上還是有一定的危險。這個部門主管就是貼心又懂變通。

我致電鍾美嘉：「嗨，Mika，我早咗收工，可以早啲做訪問。」

「好阿，我而家即刻出嚟。」她的聲音聽起來很興奮。

「出去邊度？我地唔係返Campus做訪問咩？」我問。





「係阿，我諗住出嚟接你嘛。」

「For your information，我喺度讀書，識得路㗎。」我問：「你食咗飯未？」

「未阿。」

「不如食住飯傾。」我提議。

「都得。五分鐘後喺時光隧道等。」





我站在時光隧道前的電梯口等待，不消一會兒便看到鍾美嘉跑過來。

從她狂奔的舉動，加上昨天晚上幾句的短訊交流，感覺她是個性格匆忙又心急的人。她今天穿了大地色系的麻質連身裙，還戴了耳環，簡單好看。

「行囉。」我說。

「去邊呀？」她邊跟著我走邊問。

「我地去食溜冰場頂層間西餐好無？」

「吓⋯」鍾美嘉有點猶豫。她的猶豫是因為她討厭吃西餐？還是怕吃西餐會很貴？

「我請。」和後輩吃飯當然是我付錢。

「Er...」





「你唔想食西餐？」

「唔係⋯要你夜媽媽同我做訪問，仲請我食飯有啲唔好意思姐。」

「我今日完咗展覽高興嘛，緊係食好啲賀一賀佢。」

我和鍾美嘉乘坐電梯到頂層，往西餐廳的方向行走。就在餐廳門口，鍾美嘉停住了。

「其實我今日下晝食咗呢間餐廳嘅下午茶。」鍾美嘉有點尷尬。

難怪她會有這個反應，看來她真的非常不想吃西餐。

「咁呀，你有無咩嘢想食？」我只好問她。





鍾美嘉指著西餐廳旁邊的Food court說：「我想食米線。」

噢，那是我昨晚和江柏琪吃的連鎖米線餐廳。

我其實不太想吃米線，想去環境好一點的地方用餐，坐得舒舒服服去進行訪問；更不想堂堂一個有經濟能力的男人要一個女學生跟他去吃米線，感覺有點寒酸。

「今日有新湯底出，係Ian代言㗎，我好想試吓。」

看到她這麼堅持便隨她心意，作為一名紳士應要尊重女生的意見，反正吃清淡一點也好。



我們到了米線店的收銀處。

「勿演懶肉皮蛋芫茜湯米線，凍華甜。」問號？我好像聽到鍾美嘉在用不純正的廣東話下單，她在搞什麼飛機？





「食咩好呢⋯」對，我真的要看餐牌思考吃什麼。平日我一個人很少到這家店吃米線，和朋友聚會一般去較高檔次的餐廳，亦因此我基本上只會和江柏琪吃這家米線。我也沒有可能跟不相熟的鍾美嘉說一起分享過橋米線。

「我提議你食皮蛋芫荽米線加多杯芫荽青檸七喜。」鍾美嘉說。

「吓？」這個古怪的菜單就是她口中的新湯底？

我不喜歡芫荽，也不討厭芫荽。芫荽一向是我不會主動去吃的東西。

「咁就可以幫我換多個Ian卡片套。」她瞪大雙眼，像是請求，又像是施加壓力。

「好啦。」就是這樣，鍾美嘉讓我踏出了我的舒適圈，我要試新菜式了：「一份皮蛋芫茜湯底米線，加竹笙，一份土匪雞翼、凍奶茶少冰多奶。」

「姐姐，仲有無Ian BB嘅卡片套換？」鍾美嘉問米線大嬸。





「無晒啦，俾正話排前面個妹妹拎咗最後一個啦。」

鍾美嘉扁咀不悅，並用了一個仇視的眼神望著那位勝利者：「好啦。」


「邊個係Ian？」在一旁等候食物的我問鍾美嘉。

「佢囉。」鍾美嘉指著旁邊的海報。Ian的樣子長得挺清秀。

「呢個人喺邊度出嚟㗎？」我真的完全不認識他。我突然感受到很深的代溝。

我出來工作三年，而她還在讀書的話，推測年齡起碼比我小三至七歲。

「Ian都唔識，好打極有限喎！」明明這是我讀書時常說的口頭禪，現在卻給鍾美嘉挪揄我：「佢地係電視台嘅選秀節目出嚟。」

「我就咁睇張Poster以為佢叫Lan，Lan線果個Lan。」我搞笑。

「呢個都係佢花名嚟！」鍾美嘉很興奮。

初次見面時她表現害害羞羞，第二次見面拒絕我請她吃西餐，還要受訪的我陪她吃頹米線餐廳。

我對於這個妹妹的第二印象是，她為人坦率和真性情。我一向喜歡這種性格的女生，因為容易溝通，不扭擰，相處不用猜來猜去。

「我亂吹㗎咋。」沒想到時下年青人的口味這麼奇怪，電腦零件都喜歡，真是打開我的新世界。

閒日晚上的Food court人流較冷清，我們很輕易便找到一個四人位置。

鍾美嘉問我能不能錄音。我說好阿，隨便。

她在右側的桌子放置問題列表、筆記本和原子筆，等候著我發落。

我說：「我地食嘢先，casual啲，唔洗咁拘謹。」

鍾美嘉回答：「嗯。」

我將湯碗上堆滿山一樣高的新鮮芫荽浸泡在湯內。我吸入米線，米線沾上濃郁的芫荽湯底，滿口都是芫荽精華，且帶點鹽巴的味道。湯底裹有許多芫荽碎，我猜測是用攪拌機打碎而成。

「你平時食唔食芫荽？」鍾美嘉問。

「我唔會主動食。」我評論說：「不過我覺得呢個湯底比想像中好味同易接受。」

鍾美嘉喝了一口芫荽青檸七喜，說：「我呢杯芫檸七都OK，我嫌佢芫荽味唔夠濃添。」

「睇嚟你食嘢都幾重口味。」我說。看來她是一個芫荽女。

「係㗎，我食好多嘢都要特濃、重蒜、多蔥、麻辣。」

那你的口不是長期也很臭？我心想。幸好我暫時未有聞到異常的味道。看來她比愛吃洋蔥的江柏琪更重口味。

「唔，我相比起你食得清淡。有時我會帶飯返公司，有時候會買沙律，放假先食返豐富啲。」

鍾美嘉在紙上寫了「吃飯清淡、帶飯、沙律」，非常惹笑。我想起問題列表中其中一條是問與我相關的愛好興趣。這些細節有需要記載嗎？除了媽媽和女朋友，大概沒有人會想去瞭解我的口味。

「你畢業後做過幾多間公司？」鍾美嘉問。

「一間。我由畢業到而家，都係喺呢間外資公司度工作。」

「咁你呢三年條Career path係點？平時工作都做啲咩？」

「我入咗呢間公司嘅MT programme，所以頭兩年喺唔同嘅部門Rotate，HR、Finance、Design、Purchasing都各留咗半年。最後喺Marketing team工作至今一年嘅時間，主要係跟進公司產品嘅推廣。平日工作類型廣泛，大家一條Team，只要你願意主動Take up多啲Task，所有嘢都有機會去做。例如琴日你見到我地公司嘅銷售展，由市場分析、場地租賃、聯絡人、宣傳稿、設計、Budget都會接觸到。」

「一般MT Program嘅晉升階梯都幾明確。」

「係，如果你表現優良，就可以喺較短時間晉升到Assistant或者Senior Brand Manager嘅職位。公司提供機會俾我擴闊眼界，喺短時間內去唔同嘅部門工作過，就唔會紙上談兵，對畢業生嚟講係好寶貴嘅工作經驗。」是無聊的標準答案呢，言下之意其實就是被丟東丟西的打雜。

鍾美嘉繼續認真地抄筆記，手部的動作沒有暫停過，甚是忙碌。

「公司有無咩特別嘅Feature或者福利？」

「有啲品牌會有員工折扣。我地有Happy friday，五點鐘準時飲嘢，同埋果日可以著Casual wear。」我說：「最特別係公司有個300尺嘅Pantry。入面有電視、桌球枱、按摩椅，仲有一張吧枱同埋電池爐、焗爐，lunch可以煮嘢食。」

我打開電話的照片，給鍾美嘉看公司的茶水間。

「嘩！喺香港返工真係可以煮嘢食咁開心？」

「外國公司嘛。不過啲同事好懶，唔太鐘意煮嘢，所以想煮嘢嘅話輪候時間都好短。」

「睇完張相，我即刻想嚟做Intern。」

「我地公司無請Intern，不過請緊個長做嘅Part time。」見鐘美嘉挺好聊的，所以我也將此資訊告訴她，看看她會不會有興趣。

「一星期要返幾多日？」

「我地好Free，你填表，幾時得閒就返。最理想係Event個禮拜都返足，忙起上嚟都要OT。」

「認真？可唔可以入Cv俾你幫我Refer？」

「可以，你直接send Cv俾我。」其實不用Refer，因為是我在做招聘，妳會直接當我的助手。

「你最快可以幾時返工？」我問鐘美嘉。

「下星期一。」

「非常好。」