《一個訂婚書生嘅出軌故事》: 流年不旺你結婚，遲兩年再結

「陳師傅話你早期感情多變動，不宜早婚，嚟緊流年仲命犯桃花，唔好結婚住啦。」我迷信的媽媽說。

今天雖是假日，可是江柏琪輪班需要到醫院上班，所以我獨自去找媽媽飲茶。我和她分享打算結婚的想法，結果她如此回覆我。

「你唔鐘意江柏琪咩？」我問媽媽。明明她們見面相處愉快，也未曾出現過磨擦。

「鐘意阿，我都當咗佢係媳婦。」

「咁你又叫我唔好結婚？」





「唔係唔好結婚，係唔好結住。即係遲啲先。」

「我覺得因為相士鳩嗡而延遲人生計劃唔make sense。」

「佢係驚你太多桃花會煩惱。江柏琪八字好啱你㗎，唔好放走佢。」

「既然八字話我有桃花，咁結婚沖一沖喜唔好咩？」

「一個桃花咪好，多過一個叫桃花劫，感情變動，就算結咗都會離婚。」





「睇八字只能預示運勢，無人知佢準唔準。未來發生嘅事，選擇權都係在我。」

懷疑是懦弱、不自信的表現。

我就是想和江柏琪結婚阿！很想很想，向前衝刺，不行嗎？

到底我結婚跟別人有何關係？為何我都要向江柏琪以外的人交待，彷彿要得到許可似的。

我開始淺嚐到「結婚不是兩個人的事」的感受，因為身邊的人會說些話試圖左右你的決定。儘管他們出自好意，卻讓我感到煩惱和不悅。





「你知唔知結婚代表住啲咩？」媽媽問。

「愛。」

「係愛情嘅愛，係咪呀？」

「係呀。」

「如果我話俾你知，結婚之後，你對佢嘅愛，就會由愛情變成親情，你仲會唔會想結婚呀？」

「我同江柏琪識咗十年，亦都鐘意咗佢十年，仲唔夠資格講愛咩？或者咁講，佢唔單止係我嘅另一半，亦都係我嘅家人、朋友。

親情，而家都存在，但我唔認為親情係壞事，反而係一段關係嘅昇華。我可以好容易同人發展激烈嘅愛情，但係親情唔可以。」

「結婚唔係買隻戒指，求個婚，簽個紙就完結。婚姻一啲都唔浪漫，將你從童話世界帶來現實，的確係愛情嘅墳墓。你要調整婚後生活嘅期望，兩人變成人生嘅合伙人，會經歷好多高山低谷，大小事情上都會產生磨擦，唔再柴娃娃日日都好甜蜜咁拍拖。」





媽媽續道：「結婚之前，你要諗清楚婚姻對於你嘅意義同埋責任。你要知道自己做緊乜，唔好因為一時心血來潮、一句好愛就為結而結。

陳師傅好準㗎。你仲係二十五歲咁後生，假若你求咗婚，而將來真係出現咗另一個對象，你會煩惱到痛不欲生。到時悔婚又唔係，結婚又唔係。結婚唔差果一兩年嘅時間，睇定啲先。」

「我唔明點解你地都唔相信我。」我沒有把媽媽的話聽進耳內。我心裡老早下了決定，只是循例通知父母而已。

「咁係因為大家都覺得你未Ready，無諗清楚就做呢個決定。你仲係好唔成熟，喺呢段關係嘅付出只係好少。結婚唔係你想像中咁容易嘅事。我為你地好，先叫你諗清楚。當然，我再重申，我非常喜歡柏琪。」

大概是因為過往的情史豐富，大家也不看好我，認為我是個會偷吃，不定性的人。

江柏琪並不知道我讀大學時的瘋狂性史，她只知道我過去有三個前度，還有我是某段看不見樣貌流出影片中的男主角，僅此而已。

江柏琪的心底其實會不會也這樣想我，曾經為此而不安呢？





假若有一天，我向她坦白說出以前有過許多性伴侶的經歷，她仍舊願意與我在一起嗎？

我想，她願意繼續和我一起的。只是從此她看我的時候會多加了一層濾鏡，內心變得多疑、猜忌。

她大概會想，林書生今天告訴我加班，是真的去加班嗎？還是去了和別的女生鬼混？那個女生和林書生聊得很高興，他們是在調情，桌下的雙腿有在偷偷交流嗎？林書生和我做愛的時候竟然親吻了我的背脊，他從來未試過這樣做，這些技巧是從哪裡學懂的呢？

就算我真的沒有做過，她終日會因為我的過去而疑神疑鬼，精神緊張。我們的關係也許不能恢復從前的單純。昔日的放縱行為將會是破壞我倆關係的計時炸彈。

因此，如非她詢問，我不會主動告訴她。

她不問，我不說，不算撒謊吧。

我不想讓她傷心，最好她一生也不會來詢問我的過去，她只需負責感受我的愛便好。

就讓我們繼續幸福快樂。