《一個訂婚書生嘅出軌故事》: 男人想結婚的五個理由

週末下班後，我與大學一起住宿舍的同學到酒吧敘舊。

「我同江柏琪一齊咗三年，都仲係好鐘意佢。」我說。

「你特登約我地出嚟，唔係為咗放閃曬命㗎可？」我的同房Parsons說。

「唔係。」我酌了一口手工啤酒，思考着說：「我打算同江柏琪求婚。」

「咩話，求婚？」在吞嚥啤酒的Parsons驚訝得咳了幾聲：「你俾江柏琪迫婚？」





「唔係呀。」

「做咩咁睇唔開？」

「每晚返到屋企，望到佢煮好晒飯，笑住攬自己果陣，真心覺得自己係世上最幸福嘅男人，無論返工幾辛苦都值得。」

我續道：「我每日收工淨係想快啲返屋企陪佢。呢種愛，呢種對的人嘅感覺，喺我二十五歲嘅人生入面，只有佢一個人俾到我。女人青春寶貴，我係時候要俾返個名份佢。」

「你放工係想返屋企休息，唔係想返屋企陪佢。」Parsons說：「林書生，你係無腳嘅雀仔嚟㗎。廿五歲人仔咁傻斷自己米路，為咗棵樹放棄成個森林。」





在大學時期，我和Parsons是一起泡妞玩得很瘋的好兄弟（襟兄弟？），可是自畢業後和江柏琪一起，我便金盆洗手了。

「居然會有男人想主動結婚。」戀愛經歷不多的傻大哥Wade說。

「好正常，我同女友都係以結婚為前題交往。其實兩個人夾，相處穩定自然會想行落去。」正派乖巧陽光男Felix說。

每個人的人生步伐不一，也許他們還未去到這個階段而不明所以。當遇到對的人，花花公子還是想要成家立室安定下來的。

「其實我地同緊居，結婚都只係差張紙。結咗婚之後，我唔覺得我同佢嘅相處會有幾大分別。」我說。





「點同，結婚有法律效力，離婚要分身家。」Parsons說。

「我唔會同佢離婚㗎。」

「未來嘅嘢好難講。可能你第時偷食被人發現咗，佢要離婚呢！」

「屌你啦！咁樣詛咒我。我食女果時都係單身，幾時偷過食。」

Parsons分析：「男人咩時候會諗結婚？第一，係被人迫婚又或者奉子成婚，你唔係。第二，係做錯事想箍煲，所以先出結婚呢招大技。」

「都唔係。」

「第三，係你心底對呢段關係不安，想以快啲結婚嘅方式嚟保障自己，好似啲女人驚條佬會走佬咁。」

「救命。單純好愛，所以想結婚，咁簡單唔得㗎咩？」從前的男女關係已夠複雜，現在簡單的生活很好。





「你女人嚟㗎？」讓人煩躁的性別定型，Parsons繼續揶揄我。

Wade興奮地說：「我知，佢係第五，得閒無屎屙，所以屎忽痕想結婚。好似我無啦啦走去紋身咁，唔一定要有咩莫測高深嘅意義。」

「若然你係都要一個理由，呢個會比較接近。」我回答。

「喂，對面條女幾索。過去撩吓佢先。」Parsons說。他最近也有女朋友的，只是在好色貪玩的方面這麼多年來都沒有變過。

「我跟埋你去。」Wade就罷便跟Parsons離開了座位，留下我和Felix兩人。

「佢兩個應該一世都結唔到婚，今鋪我撐你。做男人最緊要有膊頭。」Felix說：「你咪同江柏琪傾吓，睇吓佢有無意思。話唔定佢衝緊事業，都唔想咁早結婚。」

這裡只有一個正常人能給點正常的建議阿！





「前排傾過一次，佢話想廿八歲升埋職先結婚。」

「咁你唔廿七歲先求婚？」

「好嘢要早啲落訂。」

「你好似仲急過江柏琪。」

我突然想起剛才Parsons說的第三個原因。

我心底是不是真的為了什麼而不安，譬如她條件很好，怕她被人搶走，才想快點確定與江柏琪結婚的關係？她又不是愛拈花惹草的人，我何故要不安？

「咁你打算點求婚？洗唔洗幫手？」Felix續道。

「我未決定。我諗過Book間靚酒店求婚；或者車佢去荒山野嶺，一打開車全部都係氣球啲老土嘢，佢應該會好感動掛。」江柏琪不喜歡鋪張，簡簡單單已經滿足。假若我弄些超級豪華或叫齊親朋好友出席迫婚的負擔求婚，她絕對不會喜歡的。





「仲要買戒指，諗埋點度佢中指嘅Size。」

「但我喺街未見過女仔會戴戒指響中指。」

「戴無名指好睇啲。」我和Felix兩人討論得慶起。只不過和我同齡的朋友對求婚都是門外漢。幸好世界上有網絡大神。

Wade很快便回來了，不過只剩餘他一人。

「做咩得返你一個？」我問Wade。

「你睇吓Parsons同班ABC女吹水吹得幾開心，佢今晚唔會返嚟㗎啦。」Wade這個不太帥的毛哥兒，即使跟着我們，機會很多，卻總被女生請吃閉門羹。

「哈哈。」我一笑。





Pasrons與我的目光相遇，招手讓我過去一起玩，我搖頭拒絕了他的邀請。

「林書生，你真係變晒！」Wade說：「以前你一定會同我地一齊撩女仔。」

「有乜好撩，條條女都差唔多㗎啦。」我說。整晚我都在說與江柏琪相關的事，和尚級的聖人模式能夠媲美Felix。

「以前你啲女都好正，我唔明江柏琪有咩威力可以令你收山。」

「想搵女搞嘢，落一轉老蘭隨時都搵到，太容易啦。其他女仔會想從我身上想得某啲嘢，愛、關注、錢、或者性。但江柏琪唔同。佢係我嘅人生伴侶，為我地嘅愛情付出咗好多努力。

咁多年嚟，江柏琪無試圖喺我身上搾取任何嘢，反而係做一個供給者嘅角色。佢亦都係唯一一個同我建立到咁深連結，關係維持到咁多年嘅女人，地位無得比。如果錯過咗佢，我一世都唔會再遇到咁嘅女人。」

有如長篇小說篇幅的回憶使她不可能被取締。就算做著相同的事，她也和別人不一樣，因為我們有共同的語言和共鳴。甚至於無須交換眼神，我們也會知道對方的想法。

他們沒我好氣。

我理解他們的反應，事不關己的人只想聽到尋樂的花生，才不想百般正經聽我無聊放閃。

因此，晚上十一時，我對Felix說江柏琪在家等我回去，所以早點散場吧。