《求婚嗰日，我發現我女朋友鍾意食屎》: 後記

《求婚嗰日，我發現我女朋友鍾意食屎》，係我寫作嘅第五個故事。 本來，第五個出現嘅係一個我籌備咗兩年嘅故事，但係某一日靈感突然出現，加上我之前喺IG解釋過嘅原因，我決定咗寫出呢個天馬行空嘅痴線故事。 一路睇大家討論呢個故事，最有意思嘅有一位讀者問關於角色曲線問題。當時我已經諗好哂故事線，但係又唔想穿橋，唯有求其答，但係到而家我終於可以講下分享下。 有讀者覺得，主角條線太輕鬆簡單，無錯，呢個就係我想要嘅嘢。因為喺呢個故事入面，主角阿博其實係我咁多故事入面存在感最低嘅一個，對我嚟講，佢只係一個推進故事發展嘅大配角，故事真正嘅主角，其實相信大家都知，係丘志傑、石養么同向彩萍呢段三角關係。 主角嘅故事，的確有佢嘅味道，亦有佢嘅意思，但係最有感覺嘅，始終都係丘志傑、石養么同向彩萍三個。 表面上，「真愛是任何形狀」係講緊食屎，但係其實，呢個故由我寫序章已經講咗，「你以為食屎好變態？但其實愛情更變態。」變態嘅愛情，可能係因為苦戀、失戀、創傷，咩原因都好，但係極致嘅愛情，其實真係可以好痴線。 我明白，現實中嘅放下執著，一定無故事入面三言兩語就講得完，但係我只係希望俾大家可以從呢個輕輕鬆鬆嘅故事入面，搵到小小感動同反省，呢個已經係我最大目的。 好多謝所有讀者願意追呢個痴線故成兩個月咁耐，每句加油打氣留言我都有睇，就算覆唔哂，我都記在心中啦～ 下個故事，雖然唔知幾時會出現，只不過希望到時會再見到大家，一齊留個名吹下水~ 最後，放低自己IG，故事之後會再有一兩篇講下角色或者少少感想，同埋都可能（係可能）會有故事嘅你問我答，之後有故事或者新消息都係靠IG公佈，大家有興趣可以Follow下IG：Windblowssilently 最後的最後，一如以往，我都會喺IG放低朱奶基金，正所謂文字有價，我都希望有一日可以成為以文字過活嘅人，不過在此之前，喺呢個免費平台上面，我覺得既然文字未有定價，俾大家依照自己感受去支持作家就最好不過。 所以，如果你覺得想支持下或者值得，少至一盒朱奶嘅價錢去支持下我補下腦又得，或者你覺得都只不過係普通故事點解要俾錢一樣得。無論如何，我都會繼續寫，寫到有一天，大家都會見到文字嘅價值。 好啦，廢話唔多講，希望盡快又帶下一個故事同大家相遇。預祝大家新年快樂 歲月靜好，我愛大家，下個故事再見。