《求婚嗰日，我發現我女朋友鍾意食屎》: 七十八

頭先敏敏見媽媽有危險，決定將打緊嘅電話放低，然後衝去救人。
但憑佢一個女仔，又邊可能阻到世伯呢。
佢呢一下衝出去，反而俾石養么一個一石二鳥嘅機會，所以轉眼之間，世伯已經將敏敏制服咗喺地下上面。
而家嘅情況，係伯母喺左邊，敏敏喺右邊，兩個同樣都係俾世伯摙住咗條頸。
 
「好囉，一次過，一鑊熟，乾手淨腳。」石養么索性搬咗張櫈去世伯身邊，坐低睇住伯母同敏敏兩個痛苦嘅表情。
「點解……你要……」敏敏喺呼吸困難嘅時候，同時問咗呢個問題。
「點解？哈，我就係要佢睇住自己最愛嘅人受苦，而且仲要係由自己一手一腳造成，等佢感受下呢份痛苦嘅滋味，我要佢真真正正咁內疚一世。」石養么講到呢度，終於收起咗佢虛偽嘅笑容，雙眼入面充滿無盡嘅怨恨，甚至比起當時喺雲南嘅向彩萍更加怨毒。
 
眼見情況愈來愈差，雖然我都知自己做唔到啲咩，但係都無理由袖手旁觀。




所以我一咬牙，忍住痛企咗起身，用最快速度首先跑咗過去暈咗嘅八仙果師父身邊一手執起咗罐抹茶八仙果，然後運用師父教我嘅手法，運氣捏碎咗一堆八仙果，之後就向天灑出一堆抹茶八仙果嘅粉末。
粉末就好似沙塵一樣吹過世伯，令到世伯塊面變到青蛙咁嘅顏色。
但係與此同時，我見世伯亦都有一刻回復咗神智，雙手同時鬆開，令到伯母同敏敏有咗一剎那喘息嘅機會。
 
可惜嘅係，機會，亦都只係得呢一秒。
就喺一秒過後，世伯已經再次回復到木無表情嘅狀態。
而當我想再重施故技，灑出一堆抹茶八仙果嘅時候，世伯已經用高速嚟到我面前，然後一拳再次打落我頭先嘅受傷地方，令我噴出咗一口血，直接跌到幾步之外。
無咗我嘅阻礙，世伯再次伸出雙手，摙實喺地下嘅敏敏同伯母。
 
雖然我瞓咗喺地下，但係我反而睇到一樣嘢。




就係當世伯一邊摙實伯母同埋敏敏嘅時候，佢竟然一邊流出咗兩行眼淚。
咁即係話，呢刻身不由己嘅佢，其實一樣擁有自己意識。
只不過喺有意識嘅情況下將自己最愛嘅兩個人殺死，似乎只係一件更悲慘嘅事。
 
由於前前後後我已經受過幾次攻擊，我全身嘅骨頭都好似鬆散哂咁，我相信自己已經斷咗一兩條骨，而腰骨嘅痛亦都令我連企都企唔到起身。
但係望住敏敏危在旦夕，我只可以一步步咁慢慢爬近佢，希望可以救到佢。
我見到敏敏同樣向我呢一邊望過嚟，佢伸出咗佢嘅手，好似想掂到我，可惜始終都仲有一段距離。
平日「這麼近，那麼遠」都只係一句用嚟講笑嘅口頭禪，但係到咗而家呢一刻，我先明白原來呢句說話嘅意境係可以咁令人難受。
 
伯母掙扎嘅力道，已經開始慢慢變得愈來愈細。




而敏敏雙眼亦都開始反白，兩個人睇落都相當唔樂觀。
可惜嘅係，我而家只係爬到去餐枱嘅側邊，仲有幾步先可以掂到敏敏。
 
正當我對眼前嘅情境已經感到絕望嘅時候，我聽到一啲聲。
係一把女人嘅聲。
我跟住聲音來源望過去，原來係敏敏頭先放低咗嘅求救電話。
我記得頭先都曾經聽到過好微弱嘅電話等待接通嘅「嘟嘟」聲，所以可以推測，敏敏頭先衝出枱底嘅時候其實打緊電話，而呢一刻，電話就接通咗喇。
 
雖然電話係通咗，但係我相信等到電話入面嘅人嚟到，一切都已經太遲喇。
於是我就繼續向前爬，就算救唔到敏敏，起碼希望可以喺敏敏死之前最後一次拖住佢嘅手，同佢同生共死。
但係當我爬前咗一步嘅時候，電話又傳出咗「喂？敏敏？」嘅聲音。
「電話入面嘅人識得敏敏？咁即係敏敏原來唔係打去報警？」呢個係我第一個諗法。
正因為呢個諗法，我好自然咁集中咗去聽電話入面嗰把聲。
而呢一把聲，令我好快諗起咗一個人。
 




我好似搵到最後一條救命稻草一樣，一下子就入咗枱底然後拎起電話。
我一見到電話上面嘅聯絡人名，果然，我無估錯。
我知道，呢個就係今晚可能救到大家嘅最後一著。
 
「石養么！」我用盡全身力氣，喺枱底嗌咗出聲。
「又想垂死掙扎？放心，丘志傑老婆同個女死咗之後，下一個就到你㗎啦。」石養么從上而下，用嘲諷嘅眼神望住我。
「殺我之前，你會唔會想同佢傾兩句電話先？」我笑咗一笑，一手將部電話攞咗出嚟，同時將個喇叭較到最大聲。
 
下一秒，一把響亮嘅女聲從電話入面傳咗出嚟。
「殺人？阿么？現在你跟敏敏在一起嗎？你在香港？為什麼你會在香港？」
一聽到呢把聲，石養么嘅面色即刻大變。
因為，呢把聲嘅主人，就係石養么嘅老婆。
 
向彩萍。