《求婚嗰日，我發現我女朋友鍾意食屎》: 七十七

世伯一步步走向我，而我雖然心入面好淆底，但係一諗到後面嘅敏敏同八仙果師父，我都唯有攞出我嘅男子氣概出嚟，企定定喺度。
「世伯，我知道你而家係俾人控制緊，不如你試下努力啲，話唔定可以突破到呢！」我嘗試好似電視劇咁，努力叫下俾人控制緊嘅人，睇下可唔可以叫翻佢嘅知覺翻嚟。
可惜，下一秒，我已經俾世伯一巴掌打到我旋轉三周半跌咗喺地下度。
 
眼見世伯迫近敏敏同八仙果師父，我諗起三十六計入面嘅一招「圍魏救趙」。
我隨手喺地下執起兩塊頭先嘅花樽碎片，然後一手就擲向石養么，希望可以影響佢對世伯嘅心理控制。
點知，我感覺到有一陣風掠過我身邊，當我望清楚嘅時候，竟然係世伯跑翻轉頭徒手接住咗嗰兩塊碎片。
睇嚟，除咗力氣之外，世伯連速度都大幅提升咗。
只不過，我亦都望到石養么喺呢個時候流出咗兩行鼻血，睇嚟用「共生蠱」嘅副作用開始生效喇。
 




正當世伯準備再一次攻向八仙果師父嘅時候，又有另一個人擋住咗喺世伯前面。
今次呢個人，係伯母。
「老公！你快啲醒啦！唔好再打人喇！」伯母喊到滿面眼淚，不斷喺度搖住世伯隻手。
「你做咩咁快衝出嚟啫？我本身打算等丘志傑可以逐個殺哂自己最重要嘅人，留翻最後一個先殺你㗎嘛。不過，既然你都出到嚟喇，就俾你死先啦。」
石養么狂笑一聲，世伯亦都喺呢個時候出手，一手就捉住咗伯母條頸，然後慢慢將佢舉高。
伯母雙腳離地，喉嚨發出好辛苦嘅乾叫聲，塊面不斷充血，開始進入缺氧嘅狀態。
 
眼見情況危急，我即刻衝咗過去掹住世伯隻手，希望可以令佢放手，但係佢力道實在太大，令我完全無從入手。
呢個時候，突然一陣綠色粉末喺半空之中飄散開，當世伯吸入咗呢陣粉末，雙手即刻一鬆，而伯母亦都應聲跌咗落地。
喺世伯身邊嘅我同樣聞到呢陣粉末，一聞就知道係抹茶八仙果嘅味，我望向八仙果師父，果然見佢氣都喘哂，兩邊嘴角流血，而手上面就揸住咗一罐八仙果。




「我嘅功力已經用盡，抹茶八仙果亦都只可以勉強令到你世伯清醒一秒，治標不治本，之後就要靠你喇。」八仙果師父講完呢句之後，再次噴出一大啖血，然後就暈低咗。
 
「咁快又冧多一件？唉，咁無癮㗎，唯有俾你殺咗你老婆先啦。」
石養么雙手一攤，睇落十分無奈，但隨住佢呢句說話，世伯又再一次走向伯母。
世伯半跪喺地下，雙手就摙落去攤咗喺地下嘅伯母嘅頸上。
而伯母毫無反抗能力，只可以喺地下拼命掙扎。
我諗都唔諗就衝咗過去，心諗既然我唔夠力掹開世伯隻手，不如去盡啲令佢無得再攻擊咪得囉。
所以我一手拎起枱面上嘅一隻碟，一手就敲咗落去世伯個頭上面。
 
「哐噹」！




碟爆開咗，世伯個頭慢慢滲出鮮血。
但係，中招嘅佢唔單止無暈，仲竟然慢慢將個頭轉去望住我。
喺呢一刻我就知道，嗯，我要收皮喇。
而喺下一秒，我就俾世伯一拳打到碌開咗幾個圈，乖乖地喺地下度瞓低咗。
 
用單手就收服咗我嘅世伯無停止向伯母嘅致命攻擊，我見到俾人捉住咗十秒左右嘅伯母開始逐漸無力，連掙扎緊嘅雙腳亦都開始慢咗落嚟。
「媽！」
就喺呢個時候，一直匿喺枱底打電話求救嘅敏敏跑咗出嚟。
而我似乎聽到，敏敏嘅電話開咗喇叭，但喇叭嘅另一邊都係一啲「等待通話」嘅聲音，似乎未打得通。
唔通，今日嘅999又打唔通？
 
說時遲那時快，事情又有咗變化。