《求婚嗰日，我發現我女朋友鍾意食屎》: 五十六

當向彩萍望向眼前呢個男仔嘅時候，佢發現，呢個男仔睇落比起其他西裝友都算係年輕。
而且呢個男仔年輕得嚟又有啲怕羞，甚至當向彩萍望向佢嘅時候，佢會耷低個頭，睇落似係向彩萍叫呢個男仔嚟陪自己多啲。
 
向彩萍坐低咗大約十分鐘，眼見隔離其他小姐都已經同啲客人攬頭攬頸，但係自己呢邊就咩都未發生，唔知點解，反而令佢覺得有啲好奇。
「先生，你還好嗎？」向彩萍鼓起勇氣，嘗試同呢個年輕男人傾計，當然某程度上向彩萍亦係擔心如果自己咩都無做過，到頭來今晚會唔會咩錢都無呢，所以先夠膽做主動開聲嘅一個。
「我很好，」呢個年輕男人聽到向彩萍嘅問題有啲愕然，過咗一秒自識得微笑咁點一點頭，「謝謝。」
「你跟他們不太一樣。」向彩萍見到呢個男人睇落幾斯文，本身嘅擔心又少咗啲，於是又放膽講多咗啲嘢，「第一晚來工作就遇見你這種老實人真好。」
「你真係第一晚嚟？我以為頭先嗰個女人求其講嘅添。」年輕男人見到向彩萍唔似其他小姐咁猴擒，所以亦都開始放鬆咗啲咁笑咗一笑。
向彩萍雖然只係聽得明一半意思，但係都答呢個年輕男人：「不是啦，我真的是第一晚來工作的。」
年輕男人嘴角微微勾起，露出咗一個放心嘅表情，然後低聲喺向彩萍耳邊講：「其實……我也是第一次來這種地方。」




兩人相視一笑，然後喺呢個唯一寧靜嘅小角落入面，開展咗一場只屬於怕羞人嘅對話。
亦都係呢一晚，向彩萍認識咗丘志傑。
 
向彩萍嘅第一個工作天，喺超乎平安嘅狀態之下完成。
連佢自己都唔相信，只不過係同個男人傾下計，一日就可以搵到自己喺家鄉成個月都搵唔到嘅錢。
向彩萍諗都唔諗，就將自己第一日出嘅糧連埋自己嘅手寫信，全部放入信封，一口氣寄哂翻家鄉。
向彩萍希望家鄉嘅媽媽收到信嘅時候，至少可以放心啲，唔洗再擔心自己。
 
第二晚翻工，向彩萍默默祈求，希望喺工作上面繼續遇到好似琴晚咁好嘅客人。
但係現實，又邊得嚟咁理想呢？




向彩萍嘅第二晚，第一個客係一個肥佬。
當向彩萍一坐低，肥佬就已經不斷上下其手咁抽水。
向彩萍接受唔到，伸手擋咗幾次，肥佬一個唔耐煩，就將英姐叫咗過嚟。
「喂，英姐，你派呢條女落嚟，我出手摸佢又出手擋，而家我落嚟打詠春、練自衛術啊？」
「唔好意思啊得哥，佢新嚟㗎，有怪莫怪，你等一陣啊！」英姐將向彩萍拉埋一邊。
 
「嗱，我係女人，我都落過場，我明㗎，初初落場係緊張啲㗎啦。」英姐一改平日兇惡嘅樣，反而用一個認真樣望住向彩萍，「我哋呢行要搵快錢，注定就無嚟正經。我想搵錢啫，唔係迫良為娼，如果你真係頂唔順，我唔介意你走咗去，張機票就當係我蝕俾你嘅。但如果你真心想要搵真銀，咁你就唔好再諗住錫身。」
英姐講得語重心長，向彩萍亦聽得明六七成嘅廣東話。
向彩萍知道，夜場遇上正人君子，或者就係只得琴晚一次機會。
始終英姐講得啱，既然自己都下咗決心搵錢，仲諗咁多嚟做咩？




就喺呢一刻，向彩萍終於有咗覺悟。
 
佢翻埋位，望住肚滿腸肥、滿身銅臭嘅肥佬，內心依然充滿咗厭惡感。
但係，佢好努力咁克服心入面嘅反感，笑住同肥佬道歉。
當肥佬見向彩萍態度軟化，馬上又向佢伸出魔爪。
望住肥佬隻肥手，向彩萍內心極想用「赤木笛」召喚毒蟲出嚟毒死肥佬。
只不過而家嘅向彩萍，已經唔係十分鐘前嘅佢。
佢知道一用「蠱術」，佢就有可能無咗份工，無咗份工，就賺唔到錢俾啊媽。
所以，向彩萍決心咩都唔理，直接用阿娟教佢嘅方法，坐咗上肥佬大脾上面斟酒俾佢飲，興奮到肥佬差啲就血壓高爆血管。
 
之後，阿娟就開始教向彩萍一啲取悅男人嘅方法，慢慢令到向彩萍都識得喺呢個夜場世界入面遊刃有餘咁賺錢。
雖然捫心自問，向彩萍非常討厭咁樣嘅自己。
但係每一晚放工出糧嘅一刻，向彩萍就可以用手上嘅錢去麻木自己嘅內心。
 
正當向彩萍以為自己已經變成咗另一個人嘅時候，某一個晚上，佢再次喺夜總會遇見翻丘志傑。




「你好！」丘志傑一見到向彩萍，有啲如釋重負咁笑咗出嚟。
見到佢呢個樣，向彩萍好自然咁卸下咗對其他男人嘅媚惑工夫，隨和咁笑住問佢一句：「這一次你又是被老闆迫著要來的嗎？」
兩個人，再一次隨心咁傾計。
無酒精、無猜枚、無親熱、甚至無半點觸碰。
但係，兩個人都過得好開心。