《求婚嗰日，我發現我女朋友鍾意食屎》: 五十五

到達香港嘅第二晚，向彩萍就跟住一位同鄉俾佢嘅地址，去到一個非常陌生嘅地方。
同家鄉草清花香、夜晚萬賴無聲嘅環境唔同，向彩萍嚟到嘅地方燈光亂閃，而且播緊好多吵鬧而唔好聽嘅歌，令向彩萍不期然咁掩住兩隻耳。
「你就係向彩萍？」有一個著住中式旗袍嘅中年女人走埋向彩萍面前問。
「你說什麼？」向彩萍從來無離開過雲南，自然唔識得廣東話。
「唉，唔記得咗你係大陸妹添，撞鬼。」中年女人撥一撥自己波浪形嘅金色長髮，望咗向彩萍兩眼，「好彩，都算係同張相差唔多，有翻幾分姿色同身材，咁都無蝕到張機票錢。」
講完呢句之後，中年女人就叫向彩萍跟住佢行。
 
一路上，向彩萍簡直係大開眼界。
佢望到一個西裝大肥佬左擁右抱咁攬住兩個性感美女，而另一邊就有個解開咗自己衫鈕嘅男人盡情咁錫緊身邊嘅年青女仔。
望住呢個有如酒池肉林嘅荒唐畫面，向彩萍完全唔知應該俾咩反應好。




 
向彩萍跟住中年女人入咗去間房，房入面同樣有幾個女人，各自坐喺唔同鏡嘅前面化緊妝。
「我叫英姐，是這裡的負責人。這裡就是化妝間，工作前記得打扮得漂亮一點，不然今晚就一定『收皮』。」英姐本來諗咗一陣「收皮」嘅普通話係咩，但到最後都係諗唔到，所以索性直接歪少少音講出嚟就算。
當向彩萍仲未係好明白情況嘅時候，英姐就拋咗件衫俾佢同佢講：「把裙子換上了，然後出去開工！」
向彩萍傻下傻下咁點頭，然後就拎住條裙走咗去布簾後面。
 
點知過咗一分鐘，佢就拎住條裙從布簾後面走咗出嚟，而且仲搖哂頭。
「又什麼事啊你？」英姐見向彩萍咁樣，而且失去耐性到講嘢都廣普夾雜。
「那個……那個裙子……有點短。」向彩萍頭先一著條裙上身，發現條裙竟然會令自己露出咗半條底褲邊，所以即刻好尷尬咁除翻落嚟。
「裙子當然要短啦，裙子不短，客人不喜歡，我的命就短了。你同鄉說你要賺大錢，但是又什麼都不懂，所以才介紹你給我。我告訴你，來到這種地方就不要『錫身』，怕裙子短就不要做，不要賺錢，把飛機票的錢退給我，然後翻鄉下耕田！」英姐講完之後，直接轉身打點其他小姐出去招呼客人，廢鬼事嘥氣同向彩萍慢慢傾。




聽到英姐嘅說話之後，向彩萍好清楚諗到，媽媽嘅病需要錢，所以自己唔可以唔賺錢，更加唔可以連機票錢都蝕埋。
佢望一望手上條裙，終於下定決心，然後就走入布簾換咗佢。
 
「看！裙子多適合你，多漂亮！」英姐望到向彩萍，表情相當滿意，然後向佢身邊一個睇落都幾後生嘅女仔講：「阿娟，你過嚟幫呢個大鄉里化妝，一陣你帶佢出去坐枱見下世面先。」
後生女仔應咗一聲，然後走去向彩萍身邊揮一揮手，講：「你好，我叫阿娟，是雲南人。你是哪裡人？」
向彩萍一聽係同鄉，即刻好開心咁答：「我也是啊！你叫我阿萍吧！」
「我比你早兩個月來到，廣東話好難學，但你每天多說多聽，像我現在也能懂個大概意思了。」阿娟見新嘅女仔同自己年齡相若，而且又係同鄉，佢都相當高興。
 
佢兩個傾咗唔到五分鐘，英姐就走咗入嚟：「喂，坐喺度嘅全部跟我嚟，2號房嚟咗大客。」
英姐一聲令下，化妝兼休息室入面嘅七個小姐都一齊起身出發，而阿娟亦都拉住未知發生咩事嘅向彩萍跟大隊行。




轉眼之間，所有小姐都入咗一間房，向彩萍望到房入面有七個西裝男人坐咗喺梳化上面。
呢個畫面，不期然令向彩萍諗到頭先入嚟夜總會嘅時候見到嗰啲不堪入目嘅場景。
雖然，向彩萍都唔係蠢人，本身佢同鄉話可以介紹一份搵快錢嘅工俾佢，佢都知道係唔簡單，只不過，當現實擺在眼前嘅時候，原來又真係一啲都唔容易接受。
 
跟住落嚟，一班小姐喺英姐嘅指揮之下一字排開，然後梳化上面嘅男人就好似點兵一樣，只要佢指邊個女仔，個女仔就會即刻過去投懷送抱。
當身邊一個又一個女仔被人揀走，向彩萍內心充滿掙扎。
無人揀，當然可以明哲保身，唔洗俾啲核突嘅男人掂到；如果俾人揀到，即係代表有錢搵啦，但係就要做啲自己違背良心嘅嘢。
 
就喺向彩萍心入面十五十六嘅時候，命運就已經為佢做咗選擇。
有一個男人，用手指指住咗佢。
「嘩，呢位靚仔你真係有眼光，彩萍今晚第一次處女落海就俾你揀中喇！雖然佢唔識廣東話咋，不過勝在新嚟新豬肉，第一次就俾咗你喇。」英姐一邊幫向彩萍美言幾句，一邊將向彩萍拉到男人嘅面前坐低。
俾人揀到嘅向彩萍內心好緊張，但係又知道如果做得唔好，分分鐘又會俾英姐趕佢翻鄉下，所以只好硬著頭皮，好怕羞抬頭望向呢個揀咗自己嘅男人。
 
呢個時候嘅向彩萍完全無諗過，喺自己第一晚工作遇上嘅第一個客人，將會翻天覆地咁影響自己嘅人生。






= = =
作者IG：Ｗindblowssilently
如果想加速追故，連登講故台及Penana正領先連載中!