《求婚嗰日，我發現我女朋友鍾意食屎》: 五十二

當我同敏敏都已經放棄抵抗，準備俾無限蟲蟲包圍毒死嘅時候，我哋嘅背後突然爆出咗一陣綠煙。
呢陣綠煙就好似霧一樣從背後慢慢飄散出嚟，我聞上去就無咩特別，但係啲綠煙一經過啲蟲蟲，全部蟲蟲就即刻反肚而死。
而其他蟲蟲見勢色唔對，全部都好似逃難咁走翻向向彩萍嘅方向。
一時之間，本身俾黑色蟲海包圍嘅我同敏敏重新獲得安全。
 
我望到向彩萍嘅面色一變，向住我背後嘅方向問咗一句：「你係咩人？做咩出嚟做架倆？」
我背後有一把聲回答咗佢嘅問題：「高才新，遺傳病學科醫生。」
雖然我唔知點解高醫生要跟佢哋比武嗰個「報上名來」嘅Format去介紹自己，但係我一聽到係佢嚟救我哋，我同敏敏都好似重拾希望咁興奮擰轉頭。
 
呢刻嘅高醫生著住白色長袍，左右兩邊腰間都夾住咗一個大樽，而佢兩隻手都拎住咗一個噴嘴，簡直就好似周潤發喺《英雄本色》入面拎住雙槍嘅Mark哥。




「你唔係今朝先喺昆明嘅咩？點解你會趕得切嚟呢度救我哋㗎？」我第一時間問。
「我今朝起身，收到阿果俾我嘅Message，話佢自己受咗傷，而你哋都可能有麻煩，叫我快啲過嚟幫手。因為同我開會嘅都係雲南政要高層，所以叫佢哋幫手安排我即刻上飛機，然後再安排最快嘅方法送我過嚟都唔係太難嘅事。而且我手機有阿果嘅手機位置，只要開咗Find my iphone，就好容易知道你哋喺邊。」高醫生繼續用佢好似馬國明一樣無咩表情嘅樣嚟解釋。
 
「高醫生你都好叻喎，可以醒目到買定兩樽殺蟲水先嚟救我哋。」敏敏望住高醫生腰間嗰兩樽寫住成串長英文字嘅殺蟲水。
「呢兩樽嘢，係我喺香港帶嚟㗎。最初我聽到你哋要對付嗰個咩養蠱人，又講到啲蠱蟲咁毒，所以咪調製咗呢兩樽特別版嘅殺蟲水嚟囉。」高醫生答。
「乜你唔係唔信『蠱毒』呢啲咁唔科學嘅嘢嘅咩？」我好奇一問。
「我係唔信呢啲怪力亂神嘢啊，只不過我信阿果。」高醫生托一托眼鏡，用平淡嘅語氣講，「只要阿果話件事可能有危險，即使我覺得好荒謬，我都會選擇相信。」
聽到之後，我開始明白，點解高醫生同八仙果師父兩個南轅北轍嘅人都可以相處到咁耐。
咁係因為，雖然佢哋有唔同背景、唔同信念，但係呢啲嘢都無動搖到佢哋對對方嘅愛同信任。
 




就係呢個時候，笛聲又再一次出現。
原來向彩萍趁我哋傾計嘅時候已經重整旗鼓，所以而家又再召喚蟲蟲大軍攻向我哋。
「你哋過去捉住佢啦，啲蟲同埋阿果交俾我。」高醫生輕輕將八仙果師父拉近自己身邊，同時舉起兩樽殺蟲水向前一噴，啲蟲蟲急住咁避開，令到我哋前方即刻多咗一條通向向彩萍嘅路。
「追！」我拉住敏敏跑上嗰條路，而向彩萍就即刻轉身逃走。
 
於是，我同敏敏負責追，高醫生揹起八仙果師父殿後清蟲，我哋一行四人一路追住向彩萍唔放。
終於走到一個森林前面，向彩萍突然就停低咗腳步。
「佢做咩突然唔走嘅？」敏敏細細聲問我。
正當我都唔知點答嘅時候，有一把虛弱嘅聲就回答咗敏敏：「呢個地方係叫做『動物之森』，苗族人相信呢個森林入面有神明存在，而呢個神明就係創造咗雲南呢一帶嘅動物，代表住萬物之靈嘅起源。所以除非係苗族人入面負責祭祀森林嘅『動物森友會』成員，否則一律禁止其他人進入呢個森林㗎。」
我回頭一望，原來喺高醫生簡單嘅幫助之下，八仙果師父已經有翻意識，不過睇落狀態都係非常一般。




 
「你哋到底想點？」向彩萍見無路可逃，唯有擰翻轉頭面對我哋。
「想點？想你即刻幫敏敏同佢爸爸解蠱，咁我哋今日就可以放過你！」我指住向彩萍大喝一聲。
「你唔洗旨意我幫丘志傑呢個賤人！我當日向佢落蠱，就係為咗要佢痛苦一世！」向彩萍雖然外表唔錯，但呢一刻一提起「丘志傑」呢個名，五官都流露出一份憎惡感，令佢本來幾好睇嘅相貌都變得猙獰。