《求婚嗰日，我發現我女朋友鍾意食屎》: 五十一

向彩萍首先搖起手上嘅七彩搖鈴，口入面念念有詞，不出幾秒，喺佢腳前嘅地上面嘅出現咗幾個窿。
而從啲窿度，竟然爬出咗一條七彩而且又粗又長嘅蜈蚣出嚟。
「蟲此以後，無憂無求。」八仙果師父面對毒蟲迫近，不徐不急，個樣簡直有如天壇大佛一樣平靜。
佢雙手各拎兩粒八仙果，然後兩手合十，就喺七彩蜈蚣靠近一刻，佢兩手一打開，八仙果粉末隨風飄揚，竟然令到毒蟲馬上一命嗚呼。
 
向彩萍應該見到慢招並未見效，即刻改用快刀斬亂麻嘅方式。
只見佢吹響手中紅笛，無諗過區區一支短笛，喺向彩萍手上竟然可以吹出一首賽馬會用作主題曲嘅「 威廉泰爾序曲」。
先唔好講佢係我嘅敵人，但係佢可以用一支笛吹出萬馬奔騰嘅氣勢，如果佢唔做養蠱人轉去尖東海旁Busking，分分鐘都可以賺到盤滿砵滿。
喺向彩萍嘅笛音驅使之下，四面八方都有蟲蟲湧緊過嚟，驟眼望落去，真係以為有四個黑色嘅浪沖緊埋身。
 




「蟲來沒我份 犧牲當做例行！」
八仙果師父大喝一聲，同時雙手喺半空握拳，我一睇就知道佢已經準備要使出佢琴晚用過嘅「閃電八連鞭」。
果然，八仙果師父兩個拳頭喺半空做出拉、打、鞭、扯嘅動作，唔講，真係以為佢手上有條鞭。
而喺佢嘅無形鞭之下，四面嘅蟲浪亦都埋唔到我哋身，但係亦繼續維持住呢種四面包圍嘅危險性。
 
呢個時候，我望到向彩萍已經滿頭大汗，而且呼吸亦都相當粗重，睇得出佢要用咁快嘅笛音去維持蟲浪係一件好吃力嘅事。
但係八仙果師父情況亦唔好得幾多，佢兩邊嘴角已經流出血絲，好明顯就係佢琴晚已經大動真氣去用過一次「閃電八連鞭」，而家冒傷再次用呢一招，一定會為佢帶嚟更勁嘅內傷。
換言之，而家呢個對峙嘅局面，其實就係睇邊個嘅體力早啲頂唔住。
 
「阿博，你去幫下師父手啦！」敏敏緊張咁拉住我衫袖同我講。




「你有冇睇過武俠小說？而家情況就好似兩個高手比拼內力一樣，喺佢哋之間有住有一份無形嘅內力對抗，如果我呢啲新手貿貿然加入戰場，唔單止可能會誤傷八仙果師父，仲可能令我自己都傷埋一份。所以，我而家都無能為力。」我將情況解釋俾敏敏聽，同時拎出自己袋入面僅存嘅八仙果，如果有咩事上嚟，都可以盡最後一分力保護敏敏同師父。
 
我啱啱講完呢句，八仙果師父就喺嗰邊「啊」咗一聲。
我一望過去，就見到八仙果師父好誇張咁向天噴出一口黑血，血量多到有唔少噴埋去向彩萍臉上。
八仙果師父噴血噴到好似噴水池之後就凌空飛起再跌咗落地下，我同敏敏即刻走過去八仙果師父身邊，呢刻嘅佢面色蒼白，氣息虛弱，傷勢比琴晚嚴重咗好多。
「如果唔係琴晚傷咗……我唔會輸……」八仙果師父講完呢句，就合埋眼暈咗。
 
另一邊廂，向彩萍亦都喘緊氣，兩邊鼻孔流出咗兩行血，臉上灑滿咗八仙果師父噴出嘅黑血。
但係除咗黑血之外，佢臉上仲掛住一絲勝利嘅笑容，睇嚟係因為去除咗八仙果師父呢個強敵而開心。
向彩萍抖咗唔到五秒，即刻又重新拎起支笛開始吹奏。




地下嘅蟲蟲又再重新被笛音驅使，從四面慢慢圍埋嚟我、敏敏同八仙果師父度。
 
望住咁大陣仗嘅蟲蟲圍攻，我心入面其實都六神無主。
只不過，而家唯一可以保護到敏敏嘅人，就只有我。
雖然我有自知之明，就算我擋得一時，亦擋唔到最後。
 
就喺我將五粒八仙果攞咗喺手入面準備背水一戰嘅時候，敏敏拖住咗我隻手。
我望住佢，而佢就俾咗一個好溫柔嘅笑容我。
呢個笑容，令我諗翻起，我同敏敏第一次喺舞會上面見面嘅時候，佢最初嗰個青澀同尷尬嘅樣。
 
其實，自從大學同敏敏一齊開始，我一直都好相信自己好愛佢。
但係直到我向敏敏求婚，知道佢有食屎呢個怪病，我先開始認真去思考，到底我有幾愛呢個人呢？
或者話，我對敏敏嘅愛，係咪真愛呢？
嗯，我一直都話俾自己知，係嘅，我係真心愛敏敏嘅。
正因為係咁，我做咗好多嘢去將自己內心嘅嗰份猶豫消滅。




我好努力嘗試去搵方法幫助敏敏，希望佢可以好翻；我甚至去煮一餐「全屎宴」，就係希望令佢唔好擔心我會唔接受佢。
 
但係直到而家呢一刻，當數之不盡嘅蟲蟲圍埋過嚟，就好似睇住絕望感慢慢將我同敏敏籠罩住嘅時候，我突然發現，到底我同敏敏係咪真愛，我唔需要再去諗。
因為，我有一種感覺係，如果今日我同敏敏將要死喺呢堆蟲蟲之中，但只要能夠同敏敏同生共死，我都覺得無咩遺憾。
 
黑色嘅蟲蟲，好似潮浪一樣湧緊過嚟。
今次嘅蟲蟲數量，比起之前喺我屋企或者琴晚喺酒店都多，但係今次我同敏敏嘅反應反而係最平靜嘅。
我同敏敏拖住對方，就好似真係睇住藍天碧海嘅海水沖向自己一樣，處之泰然。
 
「真愛是任何形狀」，所以對於咩係真愛，我相信可以有好多答案。
而我覺得「真愛」嘅其中一個定義，就係你願意同呢個人同生共死，死而無憾。