《求婚嗰日，我發現我女朋友鍾意食屎》: 四十九

睇住碗米碗又香又熱，我同敏敏都忍唔到手，拎起筷子就準備夾嚟食。
點知八仙果師父用佢對筷子打落我哋對筷子度阻止我哋夾嘢，同時拎出一支銀針，慢慢放入米線湯入面。
作為細細個睇CCTVB長大嘅港孩，我一眼就認出咗八仙果師父呢招就係武俠片常見嘅「銀針試毒」。
「而家喺人哋地頭，雖然未見向彩萍，但係都係事事小心好啲。」八仙果師父將銀針抽出，見到並無大礙，就向我哋點一點頭，表示食得。
 
當我將啖米線一食落口嘅時候，我即刻大嗌一聲：「係呢隻味啦！」
我呢聲似乎嗌得大聲，嚇到隔離枱嗰對老年夫婦連假牙都跌埋出嚟。
「咩味令你咁興奮啊？」敏敏似笑非笑咁望住我。
「係香格里拉松茸，呢碗湯加咗香格里拉松茸。」憑住我五星級大廚嘅味覺，我好有信心咁講，「呢隻味就係向彩萍喺『譚仔』入面調較出嚟嘅湯底，而且味道更上一層樓。我敢講，呢間舖真係同佢有關。」
 




正當我哋為搵啱地點而開心嘅時候，苗族黃德斌走咗埋嚟我哋枱前面。
「你哋好，我頭先聽到你哋提起阿萍，你哋係阿萍嘅香港朋友？」
苗族黃德斌講出呢幾句十足十「譚仔話」嘅廣東話，好彩我話哂接受過「譚仔話」口語訓練，一下就聽明哂佢講緊咩。
雖然我係知佢問緊咩，但係我都未搞得清楚佢到底是敵是友，一陣答錯嘢，尤其是喺雲南呢啲地方，可能好易有危險。
所以，我同敏敏你眼望我眼，一時間無人敢答佢。
 
苗族黃德斌見我哋無咩反應，可能擔心我哋唔明白佢講緊咩，所以即刻笑住補多一句：「你哋唔洗擔心，其實我係阿萍老公，我叫做石養么，我啲廣東話唔係好好，好多都係阿萍教我嘅。」
苗族黃德斌雖然態度誠懇，但係我哋一聽到佢係向彩萍老公，即刻唔敢鬆懈，畢竟我哋都係佢老婆前度嘅人。
呢個時候，八仙果師父就開聲喇：「其實呢，我係阿萍喺香港嘅好姊妹，我叫阿娟，我哋之前喺香港仲一齊開合作『譚仔』㗎。」
苗族黃德斌一聽即刻擘大哂眼同口，指住八仙果師父咁講：「哦，阿萍曾經提起過你啊！原來你就係娟姐！阿萍以前成日提起你㗎！你真係要去見吓佢啊！」




一聽到八仙果師父竟然自稱「娟姐」，呢個神來之筆嘅答案馬上令苗族黃德斌信全咗我哋，我不禁打從心底佩服出嚟。
 
喺苗族黃德斌講完呢句之後，佢即刻幫我哋執好枱上面食完嘅碗，然後好熱情咁推開咗餐廳嘅一道後門講：「阿萍佢而家喺廚房整緊湯底，你哋入去探下佢，慢慢傾計，話佢知舖頭交俾我就得。」
於是，我、敏敏同八仙果師父就不費吹灰之力之下，成功被告知向彩萍嘅位置。
穿過後門，我哋嚟到舖頭嘅後面，呢度有兩間石屋，一間門口有少許佈置，幾有住家嘅感覺，又另一間就有煙囪喺屋頂，而且有一陣相當攻鼻嘅辣湯味道傳出，似乎就似苗族黃德斌所講嘅廚房。
亦都即係話，我哋苦苦追尋咗咁耐嘅向彩萍就喺入面。
 
「大家記得，向彩萍係一個事隔咁多年都用緊蠱毒去害你一家嘅人，心入面嘅怨恨一定唔會少，所以都係嗰句，事刻保持警覺同小心。」八仙果師父再三叮囑我哋。
而經過琴晚「獵蠱人」嘅事之後，我同敏敏都知道雲南大把能人異士，所以都唔敢輕舉莽動，默默咁跟住咗喺八仙果師父後面。
 




我哋三個，亦步亦趨咁慢慢走近廚房。
我望到，廚房入面有一個背對住我哋嘅女人。
呢個女人紮起咗髻，喺四圍都冒住煙嘅廚房入面對住一個由柴火所燒旺嘅爐，睇佢嘅手勢，似係攪動緊個湯底。
如無意外，呢個人就係向彩萍。
就係我同敏敏你眼望我眼商量緊對策嘅時候，八仙果師父突然大叫咗一聲：「睇＿住啊！」