《求婚嗰日，我發現我女朋友鍾意食屎》: 四十八

無錯，就係周星馳，人稱「星爺」嘅港產片喜劇大師周星馳。
提到佢，係因為就係佢，我頭先先諗到入村嘅方法。
如果你曾經睇過《國產凌凌柒》，你肯定記得有一幕周星馳同一班囚犯俾人捉咗去槍斃。
任憑嗰班囚犯識輕功水上飄定係阿爸係政要，都無一個可以逃得過俾軍人槍斃嘅命運。
但係，唯獨周星馳一個最後可以喺軍人嘅槍口全身而退，而佢用嘅方法就係最簡單直接嘅，俾錢軍人。

正所謂「錢係萬能嘅」，所以頭先我只不過係用苗語向老伯講咗聲「你好」，當佢望向我之後，我就靜靜雞拎咗十蚊俾佢。
佢咩都無講就收咗十蚊入袋，然後目光從村口個牌轉去遠方，用身體語言表示自己隻眼開隻眼閉。
於是，我哋就咁就入到村喇。
所以話，今次係咪要多謝周星馳先。





而聽完我嘅解釋之後，敏敏同八仙果師父都無言以對。
相信佢哋都無諗過，其實嚟到呢啲偏僻村落，錢先至係最大武器。

入到村之後，我哋見到村內道路兩旁都係一啲睇落好簡樸嘅石屋。
好多屋後都種咗幾塊田，似乎呢條村都係以耕作維生。
由於呢啲村落無門牌號碼，所以我哋唯有拎住向彩萍封信所寫嘅地址，逐家逐戶去查。
由於我哋個樣似外地人，無人願意答我哋，好彩我哋遇到一個無著褲走圍跑嘅小朋友，我哋俾咗粒糖佢，佢就好開心咁搖住Patpat指咗一間就喺十步以外嘅屋俾我哋睇。

我哋走到過去，發現呢間屋同其他屋唔太相同。




睇落，佢嘅感覺比較新淨，似乎近年應該曾經翻新過。
另外，呢間屋外亦都掛咗一個手寫嘅招牌，上面寫住「譚哥三仔米線」。

「睇呢間舖名，非常有中國舖頭『參考』其他店名嘅特色。向彩萍曾經做過『譚仔』，照咁睇，呢度好有可能真係佢所住嘅地方喎。」我望一望入去間舖，都有兩個客人喺度食緊嘢。
「入去睇下，不過萬事小心。」八仙果師父細聲叮囑我哋，然後就同我哋一齊入咗去。
舖頭入面其實都無乜裝修，只係有四面普通嘅石牆，同店外嘅新淨感覺唔太相似。
舖面唔大，只係放咗四張細枱，而餐廳入面客人亦都唔多，只得一對老年嘅夫婦喺度默默咁食緊米線。

於是，我哋隨意坐咗落一張枱度，枱面上有張餐單。
我拎起一睇，發現餐單嘅設計同內容都同「譚仔」超似，但係價錢就平超級多，大概十蚊就可以食到一個三餸米線，物價都貼近翻呢度嘅農村。




我哋坐低無耐，就有一個睇落四十幾歲嘅男人從舖頭側邊一道小門走出嚟。
睇佢一身古銅膚色再加埋佢件背心令到手臂肌肉展示哂出嚟，霎眼望落去有幾分似苗族版嘅黃德斌。
苗族黃德斌走埋我哋張枱講咗幾句苗語，意思上大致係問我哋想食啲咩。
照咁睇，佢應該係呢間舖嘅老闆。
由於我哋坐咗成朝車都已經有啲肚餓，所以就各自手指指咁點咗三碗米線，打算邊食邊商量對策。

「仲未見向彩萍喎。」敏敏四圍張望。
「但係地址就喺呢度，而且又有『譚仔』，感覺上應該無錯。」我心入面其實同敏敏一樣十五十六，有啲擔心辛辛苦苦嚟到都係摸門釘。
喺我哋細細聲傾對策嘅時候，三碗熱辣辣嘅米線就已經送到上嚟。
當米線擺上枱面嘅時候，苗族黃德斌又嘰哩咕嚕講咗句嘢，睇佢笑得好誠懇嘅表情，意思應該係表示叫我哋盡情享受碗米線。