因為個火山孝子，我識左對孖妹: 從淇淇眼裡(4)
搬回去爸媽的家這一陣子，基本上都是陪爸媽飲早茶，然後送爸爸上班，然後一直陪著媽媽，逛街喝下午茶，有時又一起到街市買菜。每日如是，我打算一心陪著爸媽直到出國為止。
我將所有與阿峰的聯絡方式都刪掉，甚至再也沒有開台直播。而那三位好友我也沒有跟她們解釋近況，我怕她們向阿峰說漏嘴。有時我在想有必要做得這麼徹底嗎，但我知道一旦再次跟阿峰有任何聯系，我又會蠢蠢欲動…
這天我與媽媽在逛街…
「阿女，你先返嚟冇耐，又要咁快就去澳洲…」
「所以我而家咪返嚟日日陪你地囉。」
「你日日陪住我地梗係好，但係你唔洗拍拖咩?」
「有你地我仲洗咩拍拖喎。」
「傻女…洗唔洗我叫爹哋啲朋友介紹男仔俾你啊?」
「媽咪啊，你知我最唔鍾意呢啲野架，我唔想拍拖住啊。」
其實我爸媽早在我18歲出國前就經常介紹他們朋友的兒子親戚給我認識，但我實在太討厭這種聯誼方式，其一是太過刻意，其二是那些人不是名流人士就是權貴子弟，總讓人有種不自在的感覺。當我18歲離開香港後，遭殃的自然是阿妹，她試過幾次後也不太喜歡，為免爸媽再煩她，她上大學時就自己搬出去住。
「好啦好啦，媽咪唔逼你，但係你拍拖要帶人返嚟俾我睇地下。」
「我都話唔想拍拖住囉。」我不耐煩的說。
明明我是因為感情挫敗而回來，媽媽偏要挑起這事情…
「唔講呢樣，下個月阿聰返嚟啦，到時終於可以成家人食飯。」
「細佬咁快返?」
「佢原本話年尾先返，前排又話提早返嚟。」
阿聰是我的弟弟，他早幾年為了學廚而出國深造，當初他要學廚一事差點掀起家庭革命，最終他還是得償所願。
======================================================
「家姐，點解你係到嘅?」阿聰驚訝的望著我。
這天我和媽媽一同到機場接阿聰機。
「阿聰?冇見幾年差啲唔認得你。」我看著眼前魁梧的阿聰說。
我與阿聰已經好幾年沒見，我去英國後，他隨後也出國，每次我假期回來香港都碰巧他忙著回不來。
「係得你冇見我咋，年年我聖誕都返嚟，係你冇返咋嘛」阿聰說。
「咁我嗰幾年聖誕唔得閒啊嘛，我返嚟嗰陣又唔見你返。」
其實那些年都是某人要求我聖誕節在英國陪他，我才沒有回來…
「唔好拗住啦，阿聰坐左咁耐機都攰，快啲返屋企先。」旁邊的媽媽說。
這晚我們一家坐在餐桌吃飯，晚飯中又不免閒聊大家的近況…
「阿聰，你點解提早返嚟?」我問。
「我本身返嚟諗住同朋友夾份開餐廳，佢話想早啲傾我咪早啲返。」
「唔?冇聽你講過嘅?」爸爸質問。
「爹哋放心啦我唔會問你拎錢，我係嗰邊邊學邊做，儲到啲錢，做得耐左，學埋點樣營運餐廳，開餐廳我都諗左好耐先決定架。」
「咁你個朋友…」爸爸又問。
「阿聰都大個，佢識點諗，食飯先啦，呢啲遲啲再講。」媽媽終止了這個話題。
「係喎家姐，點解你搬返嚟住，你唔係同二家姐係出面住嘅咩?」阿聰問。
「我就嚟去澳洲讀書，咪想搬返嚟陪多啲爹哋媽咪。」
「吓，你又出國讀書?」
「你好彩，提早返嚟先見到我。」我笑笑的說。
這餐晚飯是久違的家庭聚餐，可惜只差阿妹不然就完整了。
====================================================
「Hi，我叫Martin。」
眼前這個向我揮手的人是阿聰的朋友，這晚我莫名其妙的被阿聰帶來聚餐…
事緣在早上，我陪爸媽吃過早茶後回家，碰上剛起床的阿聰…
「家姐又同爹哋媽咪去飲早茶啊?」
「係啊，邊似得你咁懶瞓。」
「後生邊會似你咁dry，我返嚟咁耐淨係見你陪爹哋媽咪，又唔見你同啲friend出去玩。」
「我搬返嚟就係要陪佢地，你理得我有冇friend。」
「我今晚約左個friend出去食飯，你都嚟啦，我個friend幾靚仔架，睇你嗰樣都冇拖拍，當益下你。」阿聰調皮的說。
「我有冇拖拍洗唔洗你理，學埋晒媽咪啲野做媒人，唔洗預我。」我反個白眼拒絕。
「你咪當識多個朋友囉，又冇話一定要拍拖，嚟啦當俾個面我。」
就在阿聰的半推半請下，我現在身處一家格調不錯的餐廳，面對著阿聰的朋友Martin，他正在揮手向我打招呼。
「邊有人叫結他做Martin架。」
「Martin係結他牌子名嚟，都話你係死蠢架啦。」
我腦裡突然憶起與阿峰的片段，是那天我安慰完阿峰，他跟我聊起結他的事，我們就是從那天起開始變得親密。明明說過要放棄，為甚麼我仍會想起他…
「家姐，做咩事呆晒?」阿聰在我眼前揮一揮手。
「啊，冇野。」
「係咪我個friend太靚仔睇到呆左呢?」阿聰又在我耳邊輕聲說。
「痴線啦你，我諗緊其他野咋嘛。」我用手肘撞向阿聰。
「Hi，我係阿聰家姐，你叫我淇淇得架啦。」我對Martin說。
這頓晚餐非常愉快，Martin談吐有禮，而且十分懂得飲食，我點的菜是經他推介，酒也是由他點，不得不說他的品味確實不錯。原本阿聰是要與他討論開餐廳事宜，但Martin為免冷落我在一旁，只是輕輕的把討論簡單帶過，就開了其他話題，算是懂得照顧女生。
晚餐過後，我與阿聰走在路上…
「家姐，Martin份人唔錯呢?我頭先見你同佢都幾好傾。」阿聰問。
「佢係幾好，識得嘅野又多，又識照顧女仔。」
「我學廚嗰陣識佢，佢教左我好多野，仲有我識左佢咁耐除左佢之前個女朋友，都好少女仔朋友。」
「佢咁好仔，你地又咁啱傾，你不如考慮下Martin。」阿聰說。
「唔啦，做朋友咪幾好，同埋我都就嚟要走，無謂搞啲咁嘅野。」
Martin條件確實不錯，但我現在無心再有其他感情事，而且心裡好像還是無法忘記…
我們走到尖沙咀碼頭，有人正在busking…
「呢首歌咁熟嘅…」我聽著熟悉的旋律，卻想不起歌名。
「咪方大同嘅特別的人囉，你以前成日聽方大同搞到我去到嗰邊都聽埋一份。」阿聰答話。
我居然記不起這是方大同的歌，中學時期我最愛聽方大同的歌，想不到這是我與阿峰的共同喜好…
===================================================
「喂，你聽緊咩啊?我又聽。」
阿峰把他的耳機分給我。
要感謝這小小蟲給我機會…
「你都鍾意聽方大同架?」我睜大眼望著他。
「係啊，唔得咩?」
「我中學嗰陣就成日聽佢啲歌架啦，估唔到你都識啲野。」
「哈，唔怪得上次Nicholas唱Rosy啦。」阿峰笑著說。
「死人頭，可唔可以唔好提佢啊。」我打了他一下。
「你又話放低左佢嘅，原來仲未。」
「我唔想方大同啲歌同佢有任何關係咋，係喎上次你咪應承彈結他俾我聽，我要聽方大同嘅歌。」
「嗰次係你屈我咋，得啦我第日一定會用方大同嘅歌嚟悼念你。」
「衰人，你咒我死，睇下邊個死先!」我追打著阿峰。
===================================================
「家姐!做咩又呆左啊?」
聽著動人的旋律，我又再次想起與阿峰的回憶，我到底怎麼了，怎麼這晚總是想起他…
我又被阿聰從回憶拉回來…
「啊…冇野，我地行啦。」
我們從圍觀busking的人群走出來，離開時感覺與熟悉的人擦身而過，可能是錯覺，畢竟剛才喝了點酒，才會整晚胡思亂想。
回到家後，媽媽看見我們回來…
「阿女，做咩塊面咁紅啊?」
「頭先食飯飲左啲酒啫。」我說。
「阿聰你唔係嘛，明知家姐唔飲得酒，你仲帶佢去飲酒。」媽媽責怪阿聰。
「唔關阿聰事，係佢朋友叫左紅酒，我唔想掃興飲左少少。」
媽媽聽到阿聰說起我與Martin的事時，又再次問長問短，我無力招架，只是解釋我當Martin是朋友，就走回房間休息。
我躺在床上，雙手摸著臉頰嘆氣，一來是被媽媽剛才猛烈追問，二來是今晚不斷想起阿峰。我跟自己說或許只是時間問題，我連Nicholas都可以放下，這次我也可以做得到。
自從上次跟Martin碰面後又過了一段時間，直到我在咖啡店又再巧遇他…
這天本來要跟媽媽一起逛街，但她約了朋友把我放鳥，我只好獨自品嚐咖啡。
「咦，你咪阿聰家姐，咁啱嘅?」Martin突然出現在我眼前。
「Martin?又會咁啱嘅。」我有點驚訝居然會這裡巧遇他。
「唔介意我坐底嘛?」他問。
我微笑著的請示他坐下。
「你都鍾意飲咖啡架?」
「我好鍾意呢度嘅即磨咖啡，所以成日嚟。」他說。
想不到我們會有共同喜好…
「呢度除左咖啡之外我仲鍾意呢度嘅芝士蛋糕，所以我間唔中都會嚟，不過之前好似冇見過你嘅?」我問。
「我都冇印象見過你，可能之前同女朋友嚟，好少望其他女仔。」Martin笑著說。
「咁你而家同女仔搭訕，唔驚你女朋友見到咩?」
「我同佢分左手啦。」
我忘記了阿聰說過Martin之前被分手了…
「呃…唔好意思，提起你啲傷心事。」我露出抱歉的表情。
「唔緊要啦，都過左咁耐。」他淺笑的說。
我與Martin坐在咖啡店邊呷著咖啡邊吃著蛋糕閒聊了一個下午，閒談之間得知大家的喜好，想不到他與我一樣都喜歡甜食，而且也喜歡製作甜品。我沒想過一個男生在甜品這方面與我這麼投契。
之後他說有要事先走，臨離開前他說:
「下次有機會一齊整蛋糕啊。」
「好啊。」我爽快答應。
「係喎，上次見冇留到contact…」他說。
我沒多想就與他交換電話號碼。
================================================
咚咚…
「入嚟啦，阿聰搵我咩事啊?」
「家姐，聽講你聽日約左Martin喎。」阿聰說。
「係啊，約佢一齊整蛋糕啊嘛。」
「又話當人係朋友，幾時咁熟一下就跳到一齊整蛋糕。」他帶有調侃的語氣說。
「上次咁啱撞到佢咪講起整蛋糕，朋友唔可以一齊整蛋糕嘅咩?」我反問。
「係對人有興趣咪講囉…」
「你係咪好耐未被我打過?」我舉起拳頭。
阿聰急忙逃出我的房間…
翌日，早上還是如常的陪著爸媽，到了下午我與Martin約在工作坊見面。
「咁早到嘅?」我問。
「係啊，呢度我問朋友借，我要過嚟開門先啊嘛。」他說。
說時遲那時快，Martin已經準備好材料和器具，我們也開始動工，Martin非常熟手，我配合著他，不出一會就將蛋糕送入焗爐…
「你都幾熟手架喎，以前成日整架?」我問。
「係啊，有年女朋友生日我整俾佢，之後就年年都整。」他說。
「哇，你個女朋友好幸福啊。」我不禁羨慕。
「其實我最想就係同佢一齊整，可惜已經冇機會。」他語氣帶點失落。
我不知怎麼回應，看似又提起不該提的事情…
「唔好講我啦，你之前有冇試過同人一齊整過蛋糕?」Martin問。
「呃…都叫有嘅。」我遲疑了一下。
我腦海中浮現了一個人的身影…
「係咪同男朋友呢?」他又問。
被他這麼一問，我頓時不知道怎樣回答好，畢竟那個人與我只是戀人未滿的關係…
「呃…朋友嚟。」
「哦，你個朋友都好鍾意整甜品架?」
「佢淨係鍾意食架咋，又笨手笨腳，叫佢幫手就係度搗亂。」
說起來，那次是我強逼他與我一起整蛋糕…
===============================================
「阿峰，幫我打蛋白。」
「打蛋器呢?」
我把打蛋器遞給他…
「吓，唔係電動架?人手打到幾時啊?」他望著打蛋器說。
「咁啱壞左啊，反正我地大把時間，你咪慢慢打囉。」
「我打蛋，咁你做啲咩?」
「我出廳睇陣電視等你。」
「有冇搞錯，洗人唔洗本…」阿峰抱怨著說。
「喂，搞掂啦。」我聽到阿峰從旁說。
我望著他，他正把盛著蛋白的碗倒轉，凌空放在我頭上…
「死人頭，你做咩啊?」
「我試下啲蛋白會唔會跌，唔跌咪即係搞掂。」
「你搵我個頭嚟試，你想死啊?」我追著他猛打。
我終於把蛋糕放進焗爐後，我發現桌上還有砂糖在…
「喂，點解仲有啲砂糖嘅?」我問。
「你問我?你落糖架喎，你唔係冇落啊嘛?」他反問。
我才發現我沒加砂糖…
「你個衰人，你唔提我…」
「我點知你咁蠢…」
塗上奶油時，阿峰突然將奶油往我臉上抹，我又作出反擊，最後把奶油玩光。
「最衰都係你，玩玩玩。」我瞪著阿峰。
「你冇份玩嘅?」
到最後我們的製成品是一個沒加砂糖兼奶油不足的蛋糕…
=====================================================
「咁佢一定係你好好嘅朋友。」Martin說。
「點解你咁講?」我疑問。
「因為你講起佢嗰陣係笑住咁講。」
我有嗎?我自己也沒察覺到，我說起阿峰時居然會不自覺的笑起來，難道我仍然對他…
此時，蛋糕已經焗好，冷卻後加上裝飾點綴就完成，Martin切出一塊遞給我。
「唔~好好味。」我嚐了一小口。
「中間啲朱古力夾心味道再濃啲就更加好。」他吃了一口說。
最後Martin說餘下的蛋糕讓我帶回去，我問他不要嗎，他說:
「全屋得我一個食甜品，你拎返去俾阿聰佢地食啦。」
回到家中，我把蛋糕分給媽媽和阿聰…
「阿女，你幾時帶Martin上嚟食飯啊?」媽媽問。
我聽到後立刻瞪著阿聰，想必又是他製造謠言…
「媽咪啊，我同Martin朋友嚟咋，你唔好聽阿聰亂講啦。」
「Martin唔好咩?條件又好，又同你咁啱傾，今日仲一齊整蛋糕。」阿聰插話。
「係囉，阿女點解唔考慮下Martin啫?」媽媽又說
「人地條件咁好都唔會揀我啦…」
「唔係喎，Martin同我講同你都幾有緣，對你印象都唔錯。」阿聰說。
有緣嗎?確實我們先前在咖啡店巧遇，二人又有共同喜好，聊天時也很投契，而且大家對彼此的印象不錯。這些契機的確可以順理成章有進一步發展，可是…
「咁我對佢冇feel冇得搿硬架嘛。」
「feel呢啲野好死架啫，出多兩次街就有架啦。」阿聰又說。
「阿女你同Martin出多啲街啦，唔洗成日陪媽咪架啦。」媽媽附和說。
我面對他們兩母子的夾攻無力還擊…
那天之後，Martin很多時主動約我，我也想不到用甚麼藉口拒絕，畢竟他也只是用朋友的身份邀約。與Martin相處時，他非常照顧我，同時又不會做出越矩的行為，非常紳士。有幾度我腦裡閃過去他交往的假設，應該會十分幸福。只是每當Martin做出貼心行為，總會與阿峰的身影重疊。我越是告訴自己不要想起他，腦裡就越是想起他…
「Martin，我想問你啲野。」
「嗯，你問啊。」
「你同我出街嘅時候會唔會諗返起同ex嘅事?」
「其實有時都會，好似係之前間café咁，嗰度有好多我同佢嘅回憶。」Martin說。
「原來係咁…」
「點解咁問?你諗返起同ex嘅事?」他又問。
「其實佢唔係我個ex，只係…」
「不過我就算諗起，我知道已經係過左去嘅事。」他接著說。
「我之前明知我個ex好衰都仲係有啲放唔低，係呢個人教識我要放低，之後我就對過去嘅事釋懷。」
「但係今次我越想放低就越諗起呢個人…」我繼續說。
「睇嚟佢對你嚟講都幾特別…」Martin說。
「點解咁講?」我好奇的問。
「因為佢又唔係你嘅ex，但係你又想放低佢。你可以放得低你個ex係因為你唔再留戀過去嘅事，就好似我咁，諗起以前嘅事唔代表仲有留戀。呢個人就唔同，你仲好掛住佢，只係你逼自己放低。」
「咁可能係時間問題啫，因為我同我個ex係好耐嘅事所以冇留戀，我同呢個人係幾個月前嘅事。」我提出時間這個因素。
「雖然我唔係咁認為，但如果你係咁覺得嘅，唔洗逼自己放低，再俾啲時間自己，到時咪証明到你對佢有冇留戀。」Martin卻這樣說。
是我太過強逼自己嗎?
「聽得出你仲好在意佢，點解你想忘記佢?」Martin問。
我跟Martin說因為我厭倦阿峰的不斷迴避，同時因為他的迴避覺得自己只是一廂情願，所以放棄了這段關係…
「如果係我，一定會係我同你表白先。」Martin忽然誠懇的望著我雙眼說。
被他這樣看有點難為情，我撇頭不敢跟他對視，他這是對我表白嗎?也太過突然…
「Martin你…你…」我嚇得不知所措。
「我話如果啫，我知你仲掛住嗰個人，其實我有啲羨慕嗰個人…」Martin見我說不出話便說。
「Martin對唔住…但係你條件咁好唔洗羨慕佢。」
我說真的，以客觀來說Martin各方面都完勝阿峰…
「傻啦，洗咩講對唔住，淨係有你呢個咁好嘅女仔鍾意佢已經夠我羨慕。」
Martin一如既往的紳士，而他突如其來的稱讚使我有點害羞…
我與Martin短暫的約會關係就此完結，但我們之後仍偶爾聯絡，因為那天離別前他說我是位不可多得的甜點朋友，所以我們仍保持朋友關係。
事後阿聰和媽媽得知我拒絕了Martin均表示失望，其實我也不清楚拒絕他是否正確，但此刻我心裡的確還在與阿峰糾纏不清，我不可能帶著這心情與別人交往。
往後的日子我嘗試Martin所說的，不要刻意忘記，任由時間的洗禮，或許我會得到我要的答案。
距離我出國的日子日漸將近，在一個晚上，我無意中得知一個預想得到卻不希望發生的消息…