出租女友: 《第五話 無奈的請求》

究竟係咩鬼嘢發展，我一個人坐喺啲個無人嘅房嘅地下度調整混亂嘅思緒。

（電話震動聲）我攞起手機睇，係嫲嫲FaceTime我，我嫲嫲喺一個會追潮流嘅人，因為佢要強調自己係非一般老人家，佢最鍾意嘅就係電子嘢同打機。

「喂喂，和也，聽唔聽到呀？」接聽後嫲嫲第一句話，我不加思索回應：「聽到呀，聽得好清楚呀，嫲嫲你FaceTime我咩事呀？」

「呢！嚟緊個星期三，你咪會嚟醫院探我嘅，我就係想問你千鶴公主會唔會一齊嚟？」嫲嫲充滿住期待咁問我，而我就腦袋空白左一下，側側膊咁答嫲嫲：「我都唔知佢得唔得閒啵，你知啦，佢都有自己嘅嘢忙㗎嘛。」

「哎呀，我同醫院入面其他嘅老太婆講我孫仔識左個女朋友之後，佢哋都一直叫我叫你帶千鶴公主嚟俾佢地過目下。」嫲嫲依然自我陶醉咁講，而我就標晒冷汗咁講：「嫲嫲你同其他人講咗水原嘅事。」





「講開又講呀，和也，你知唔知最近有隻好hit嘅手機game呢入面有隻角色叫（阿千），佢同千鶴公主真係好似㗎，攪到我都忍唔到手課多咗金。」嫲嫲繼續起勁咁講，我就真係完全唔知講咩好。

「好啦，我就好好期待星期三啦。」嫲嫲呢一句好好期待令我收咗線都一直呆住。

之後我鼓起勇氣去揾水原，一見到水原我就立即五體投地，用最誠懇的態度請求水原：「好對唔住！再一次就得架啦，求下你俾我指名啦。」

「吓…你個腦係咪有問題呀？」水原一臉不屑咁講，我即刻向水原解釋：「我知道咁樣求你係好亂嚟，不過下星期三要去醫院探嫲嫲，嫲嫲話無論如何都想見一見你。」

「探病姐，你推咗佢咪得囉。」水原話口未完我就加大力度解釋落去：「無可能推㗎，由細到大只要嫲嫲入院，我哋全家都一定會係星期三去探病，如果我唔去，我爸分分鐘書都唔俾我讀，不過最重點係嫲嫲佢擺咗個超級寂寞樣出嚟，單單係咁已經係血之法律。」





「血之咩話，會唔會太誇張呀！」水原覺得不可思議咁講，而我就繼續低頭誠懇請求：「最主要係嫲嫲佢實在太鍾意你，見到嫲嫲咁高興嘅樣，我真的唔忍心同佢講我地嘅關係係假嘅，拜托你呀。」

「真係好對唔住，不過我幫唔到你。」水原雙手抱胸咁講。

「唉？」我對住水原做出咗個明明我咁真誠求你，你都要狠心拒絕我的表情，然後水原繼續講落去：「唔可以同客人牽扯得太深，係事務所嘅規矩。」

我再一副水原你救下我啦嘅樣望住水原講：「係呀？你都啱嘅」

我諗住嚟一招以退為進，但似乎無咩作用，所以我要出大絕，我露出一個奸樣，然後就話：「你真係忍心拒絕我嗰個既可憐，身體又唔太健康嘅嫲嫲咩？」





「吓…你咁姐係要脅我呀？你真係衰到無人有。」見到水原揦埋晒口面咁講，我即刻有少少內疚咁請罪：「我都係走頭無路先拜托你。」

「真係呀，點解會變成咁㗎，我接客之前應該要仔細查清楚大學學生名單先。」水原擰晒頭咁講，開始跌入絕望嘅我，低頭發出悲鳴聲。

「我知道啦，只此一次，同埋，唔準有奇怪嘅親·密·表·現！我係當做平時咁做你一次生意。」水原皇恩浩蕩咁講，我用感恩嘅心對水原講：「嗯，照之前咁樣就可以啦。」

「仲有，作為幫你嘅條件，我打工嘅事從今以後絕對唔可以提起，同埋係大學入面，絕對唔可以同我有任何交流。」水原命令式咁對我講，我覺得呢個說話嘅語氣有啲過分，不過我都無可奈何咁回應水原：「我知道啦。」

我哋藉住一下擊掌，交涉成立。