出租女友: 《第四話 不快的再遇》

我收拾好心情，勇往直前咁重新開始無女朋友嘅大學生活。

「嘿…？」眼前出現嘅呢個人同我四目交投，佢鬢起兩條長辮，用蝴蝶型髮夾夾起啲陰，戴住一副黑色粗框眼鏡，雖然成個造型俾人嘅感覺好唔同，不過我一眼就認得出佢係水原。

「做咩啊和也，識得㗎 ？」一個由小學識到而家嘅老友木部芳秋問我。

「哦…唔係呀！」我打左個突咁答木部，同時間水原低頭喺我哋身邊急步離開。

「嗰個係邊個嚟㗎 ？估唔到我哋大學都有啲咁唔顯眼嘅女仔，話時話，和也你好似同佢有啲嘢咁啵。」木部搭着我膊頭，福爾摩斯上身咁問我，另一個同學搭嘴話：「佢好似係文學系嘅，叫市原。」





我心諗唔通同木部講佢係Part-time GF咩，然後我就有啲心虛咁答木部：「可以有啲咩呀，我只係認錯人姐。」

「仲等我咁期待你又知係邊到識到女仔，好心你啦，唔好係囡都話熟口熟面啦。」木部借啲意喺度串我，不過講返水原，佢呢一身嘅打扮，好明顯就係唔想引人注目。

我同木部佢地分開行，得返我自己一個，我就喺度諗，文學系市原？唔通真係人有相似，佢根本唔係水原。

突然間，我被人拉咗入一間無人嘅房，原來係文學系市原，佢手指指咁對我講：「唔好對任何人講，我嘅事你咩都唔知，我哋咩關係都無，快啲應承我呀。」

「吓…」我都未反應得切，文學系市原又一輪嘴講：「係呀，我係偷偷地去打工，知唔知點解要偷偷摸摸呀，就係因為有你呢種戴有色眼鏡嘅人會講人閒話呀，我呀，我真係好鍾意份工，我唔想因為你而被迫辭職。」





果然我唔應該懷疑自己，佢就係水原千鶴。

「你快啲發誓呀。」水原指住我怒吼，我慌忙回應：「我知道啦，我發誓啦得未？」

「唉，明明都避開係大學附近約架啦，今次真係捉蟲。」水原悔氣咁講，我不甘示弱咁反駁：「鬼叫你自己揀讀練大呀！」

「係係，又唔洗咁大聲嘅。」水原叉起條腰咁講，見佢呢個款，我又忍唔到窒返佢：「係邊個一開始就係度嘈呀？」

我都未窒夠，水原打算轉身離開，然後回頭同我講：「我希望你唔會再係ig 指名我。」





嗰個活潑可愛嘅（女朋友）去咗邊呀？水原千鶴，你呢個演技派嘅自我中心八婆，我邊有可能會再指名你呀。