我有一種好變態既超能力: 超能力

是咁的，我有一種名叫「靈魂依附」既超能力，簡單黎講就係我可以將我既靈魂依附係任何物件上，當中包括生物同死物，而發動既其中一個條件係我必需接觸果一樣物件超過一分鐘。


每個男人都曾經幻想過自己可以變成英雄，覺得自己係獨一無二，覺得自己係有超能力，覺得上天派自己去完成某種事情，不過總括黎講就係「中二病」。


我記得係我15定16歲果時，睇睇下《鋼之鍊金術師FA》果時無端端發顛，扮識得用煉金術然後雙手合十，跟住落黎我相信大多數人都知個步驟啦。我握住一張十蚊紙，心裹就幻想將十蚊紙「變金牛變牛！」


大約一分鐘之後，居然！居然！居然！居然！居然！居然！冇變化喎！咁緊係理所當然啦。我望住張十蚊紙諗起點解剛才自己可以咁膠就不禁會心微笑，然後我就好感性咁講左一段說話：「十蚊紙呀十蚊紙，你是來自何方？為何會落入我的手上？假若有一天你離開了我，你又會踏上一場如何的旅程？假若我是你...」






話未說完，我就見到自己伏係張檯到。起初因為我動彈不得，所以諗緊自己係唔係發緊夢，但係照計發夢都冇理由感覺到張檯既木材質感，而且仲聞到一股紙幣既氣味，仲可以聽見窗口外既聲音...如果我冇估錯既話，我變左我剛才拎住既十蚊紙！


窗外突然捲起一陣怪風，之後我就隨風而去，飄到去樓下既一個公園。咁真實既感覺，我可以肯定自己唔係發夢，既然唔係發夢，我必需諗方法返回去自己個肉身！我唔想做一張十蚊紙呀！由於事出突然，令到我思想十分混亂，等待我冷靜過後，我就諗返起個起因。我係講完「我是你」之後先變十蚊紙，咁相對地我就應該講返：「你是我！」一分鐘後...兩分鐘後...我破口大罵：「SHIT！點解無反應架！你是我！我是你！我是我！你是你！波若波羅蜜！我變！變變變！命令你立即...解除封印！RETURN！疾疾護法現身！」


「十蚊紙，係咪你講緊野？」由於我太專注既關係，完全冇注意到後方居然有人！佢拉實我既兩側，好仔細咁望住我。






而我终於可以望清楚佢係邊個。佢係一個年紀與我相若既女學生。見到佢望得我咁入迷，攪到我相當之唔好意思，我同佢講：「我都係第一次咁近距離接觸女仔...」佢直瞪住我，就好似當年拿破倫發現新大陸果時既表情。不過拿破倫點會見過新大陸呀，我只不過想形容下果種比發現新奇事物仲更加震驚既感覺。佢環顧四周確保周圍冇人，之後將我塞入裙袋之中。嗚哇，估唔到我可以同女人咁親近！同時都好慨嘆咁講：「假若我可以親自變返真人黎感受就好啦。」


我既第一次「靈魂依附」既超能力就係哩句說話之後完結了...當時變返做人既時侯我既第一句說話係：「我屌...」同時，我都起左一個好邪惡既念頭，就係成！人！玩！具！不過變之前我一定要練好哩一種超能力。


之後果幾日，我係屋企不斷嘗試依附係任何物件到，當中包括電視機、電腦、鍵盤、窗口、門柄、天花板、底褲、微波爐、馬桶、高達模型，其實仲有好多，不過由於太多我唔想一一列舉。從實驗既結果顯示，雖然我依附自己既靈魂去死物上，但係我仍然保留五感之中既四感，包括視覺、聽覺、觸角同嗅覺。如果要用科學既覺到去解釋，我只可以答你「硬幣導致感應器的磁通量改變」，即係我都唔知點解釋。我都嘗試個聯絡曹X威博士去解釋我身上發生咩事，但係佢既回覆只有「read.」。






我再去深入理解自己能力既時侯，我發現自己可以擁有該物件既功能，例如依附電腦時可以穿梭於硬碟之內，讀取或寫入文件，不過運算能力係跟返自己既大腦而唔係CPU，舉個例你問我鄭子誠幾多歲，我既答案係同阿爾克馬爾一樣計錯年齡。另外，我依附高達模型時可以自由活動，不過當我太大動作時會變得肢離破碎。而最可怕既事情發生啦，我既痛楚神經連接住高達模型，所以往後果幾日我仍然感覺到斷手斷腳果種痛楚......


「靈魂依附」係一種好複雜既能力，不過要發動就好簡單，就係接觸果一樣物件超過一分鐘，之後幻想自己變成果一種物件，再要講「我是你」，想返回肉身就係講「我可以」。順帶一提，哩一種能力既好處就係無距離限制。既然我清楚哂個玩法，我就緊係開始去實施我既邪惡念頭啦......