未開始就完結: 十. 告別

同雅晴傾傾下發現佢好似唔係太開心

「做咩你今日好似sad sad地嘅」[23:48]

「我可唔可以打比你」
「因為用whatsapp有排打」[23:50]

「ok」[23:50]

隔左陣，電話開始震 




（我一向用震機模式）

講真我有啲淆 
因為我未同過老母以外嘅女人傾電話
連同嘉怡都未傾過 
今次一黎就係雅晴
但我始終要聽

「喂 」





「喂，係咪阿謙呀 」
佢把聲好沙，明顯喊完

「你…把聲好沙喎…喊完？」

「嗯 」

「邊個整喊你啊 」

「我條仔 」





「佢…咩事呀 」

「佢又搵其他女仔喇 」
講完之後雅晴又開始喊

「又？佢成日搵其他女仔架？」

「嗯…已經唔係第一次，由同佢一齊之後，佢搵嘅女仔已經十隻手指都數唔曬 」

「佢喺咪只係識朋友o乍 」

「緊係唔係啦，佢仲會同佢地食飯、行街、睇戲，寧願同佢地出都唔搵我」

「屌咁狗嘅，呢啲仆街好心你唔好再同佢一齊啦 」





「點解你明知佢周圍溝女仲唔同佢分手 」

「因為…我心軟…」

「但呢條友已經唔再值得你愛啦 」

「阿謙…我有個秘密…冇同過任何人講…你…可唔可以幫我保守 」

「嗯」

「點講好呢…一係我問你個問題先丫…」

「好呀」





「你覺得呢…以我地呢個年紀…同人扑野正唔正常？」

「仲洗問，緊係唔正常啦」

佢靜左一陣

「做咩事呀」

「我諗你估到我想講咩」

「唔通你同佢扑左」

「嗯 」
佢又開始喊，而我亦冇出到聲





「做咩唔出聲呀」

「……」

「阿謙你係咪好嬲我」

「……」

「你講下野啦，我好驚呀」

「唔係…」

「你係咪對好失望」

「少少啦」





「其實果次我有反抗架，我見佢想硬上果陣一腳踢落佢下面，佢先肯收手」

「咁佢之後點」

「佢成日周不時就暗示想扑野，我當然有拒絕」

「再係咁唔係辦法架，佢根本就係當你洩慾工具」

「咁我可以點算呀 」

「好彩你識諗唔同佢癲，你仲可以點姐，分手啦，佢咁鍾意搵女咪由佢搵囉，你再同佢一齊最後受傷嘅只會係你 」

「……」

「雖然我唔應該叫人分手咁賤，但你呢個情況真係冇得簡 」

「嗯…我會考慮下，其實我都想分，但成日都心軟搞到冇講到 」

「諗咁多做咩丫，做人要果斷啲 」

「嗯…阿謙，真係好多謝你呀，我依家舒服左好多啦」

「唔洗…係呢，聽你把聲好似都攰喇，快啲訓啦 」

「好啦…bye bye」

收線後，我不斷諗起雅晴講嘅野
覺得佢真係好慘，點解有一個咁好嘅女仔條仆街都唔撚識珍惜
真係想捉條人渣出黎打 

之後，
我開翻whatsapp
望住雅晴個名
諗起佢一個女仔要承受咁多野
一定好唔開心
又唔敢佢人講心事
其實我好擔心佢會唔會做傻事
出於朋友嘅關懷下
我Send左以下嘅文字比佢

「如果你依家仲因為佢而唔開心既話，
咁你最多只可以sad埋今晚，
由聽日開始唔好再因為呢個傷害你既人而再唔開心，
如果你下次再有野想講既話可以直接同我講，
你肯講我樂意聽
都係果句，講左出黎會舒服啲」 [01:28]

雖然佢冇回覆
但我相信佢睇到呢段說話

我上到床，遲遲未能入睡
我打開書包，睇翻嘉怡嘅紀念冊
百感交雜

我開左電腦
望住我同嘉怡嘅合照
佢嘅笑容好燦爛，
可惜我唔會再有機會親眼見到

我將張相印左出黎，4R size
（用專係用泥印相果啲printer）

睇左陣
諗翻起嘉怡比我嘅最後留言:

「阿謙，多謝你比左咁多快樂同保貴
　嘅回憶我，有你嘅呢半年入面，我
　每日都過得好開心。
　冇左你的話，相信我依舊係個內向
　既人。
　自從識你之後，我識到更多朋友，
　多謝你呀。
　我諗你一早就知道我係鍾意你嘅，
　如果唔係我都唔會同你一齊去倒數
　啦。其實，我都feel到你鍾意我，
　可惜我地大家都唔敢行多一步…
　太遲啦，我地冇可能翻翻去當日，
　重新做過個選擇，唔係講happy
　new year 而係講I love you。
　算啦，件事始終都過左去，當係
　一個經驗，多謝你呀阿謙，呢一
　份回憶我永遠唔忘記，因為，你喺
　我心入面永遠係對我最好嘅人。
　最後，希望你公開試考好啲，同搵
　到你鍾意嘅人。
　　　　　　　　　　　　　嘉怡」

我反轉張相，
喺筆袋度拎左支黑色marker就開始寫:

嘉怡:

好多謝你令到我中六增添不少色彩
變得更加有趣味

如果有時光機
我希望翻到上年12月31日
果晚我一定唔會淨係同你講
happy new year

我真係好想同你講句我愛你
可惜我嘅願望冇可能實現
不過我見到你搵到男朋友都好替你高興
祝你永遠幸福　快樂

謝謝你給了我一個美好回憶

　　　　　　　　　　　　　　阿謙


我喺僅餘嘅空白地方畫左隻迷你小拳石
然後摺左個信封
寫翻嘉怡個地址
第二日朝早就寄左出去
作為我比嘉怡最後一份禮物

呢封信，我刻意冇寫回郵地址
因為我唔期望嘉怡會回信
我只係希望佢能夠接收到我嘅心意

mock考完了，
我地正式進入最後衝刺準備DSE嘅階段

有一個星期日，我自己一個去左自修室溫書，
入到去
由於係週末
所以比平日多人

我搵左好耐得未有好位，
正想離開時我見到牆邊有人走，
我即刻去果個位坐，

呢個位，正正就係果次同嘉怡一齊溫書嘅位
原來風口位真係好凍。

忽然鄰坐嘅女仔輕輕揮一下頭髮
佢頭髮發出嘅洗頭水香味隨冷空氣一併吸入鼻孔

唔知有冇記錯，
呢陣香味好似嘉怡果種
不過身邊嘅已經唔係嘉怡…

呢排我成日無啦啦睹物思人

我諗…我都係時候放低呢段感情
嚴格黎講我地根本從頭到尾都冇開始過，
雖然有種失戀嘅感覺，
但都冇戀，又何來失？

我同嘉怡嘅愛情…

未開始，就完結