未開始就完結: 九. 最後上課天
我冇買到紀念冊，因為我一向唔搞呢啲野
但係我諗翻起果次志傑叫我用交換紀念冊戰術同嘉怡講清楚
嘉怡又遲到，
冇錯，佢由開學到今日last day幾乎日日都遲到
我都唔明佢點解好似冇人屌佢咁
今日嘅情況同第一日一樣
係我地各自拎部相機出黎同同學影相留念嘅同時，
有個熟悉嘅面孔入左課室，
眼尾見有人入黎，
正常人都會望一望。
今日嘅佢，
同平時翻學一樣，
平陰加馬尾，
皮膚依然好白，
右手拎住銀包，
左手拎住張遲到紙
冇錯，佢又遲到，
遲到係佢嘅作風
佢係個有少少怕羞嘅女仔，
佢一入到課室，
見到全班廿幾對眼望住佢，
佢即刻淆底頭dup dup行去教師桌度
班主任: 嘉怡~又遲到喎
之後嘉怡行翻去佢個位度
我同佢
原來已經坐左喺呢個位差唔多六月
中間仍然保留住一條走廊
呢條空隙，
曾經因為佢要抄我份測驗卷而收窄
曾經因為我冇帶書要同佢share而縮短
到最後，
呢條空隙，
又再次分離
我，
只能夠隔住呢條空隙望住嘉怡
我鼓起勇氣
問志傑借左張紀念冊
「嘉怡，可唔可以幫我寫張紀念冊
」「哦好呀
」佢接過我嘅紀念冊後繼續做自己野
「嘉怡，你冇紀念冊比人寫咩
」「冇呀，我一向都唔搞呢啲野嘅」
「哦…咁好啦，我唔阻你做野啦
」點解我要last day先比佢當然有原因啦，
如果早一日比佢我估佢會扮野話唔見左張紙，
今日比佢，咁佢冇得走數，
同埋如果佢/我都寫左啲敏感野，
我地都唔怕面左左，
因為唔會再有機會同佢坐
可惜佢冇準備紀念冊，
咁豈不是我冇得向佢講清楚？
果日，我地全部中六嘅都周圍走搵人影相簽名
到放學同學們都唔捨得離開，
喺走廊把握最後機會影個痛快同遊走校園每一個角落
而我
我一個人坐喺我個位度睇翻我影左嘅相
總共347張，
有同老師影嘅
有同同學二人合照
又同一大班人影嘅相
幾乎全級齊曬
我睇睇下發現，
我仲差一張，
係最緊要嘅一張，
我仲未同嘉怡影
呢個時候嘉怡入黎
「你走拿
」「嗯」
嘉怡執緊書包
「呀係啊你張野我寫好喇
」佢遞張野比我，我當時未睇
「嘉怡，你可唔可以同我影張相呀
」「好呀
」之後，我地就坐左喺我地個位，
拍埋兩張，
簡簡單單咁影左一張，係最後一張合照
影完之後我地都嘆息左一下
諗翻起當日你問我呢個位有冇人嘅時候
好似早兩日發生咁…
呢個班房，呢兩個坐位
喺六個月入面帶左好多回憶比我
「我走喇
bye bye 
阿謙 」嘉怡充滿微笑，用溫柔嘅聲線向我道別，向我地嘅關係道別
「bye bye，嘉怡」
嘉怡揹起書包慢慢行出班房，
當我追出去嘅時候，
嘉怡嘅背影剛好落緊樓梯
我停低左冇追到，
企左喺走廊上，
望住空冇一人嘅操場，
諗翻起好多回憶，
我拎出手機，
開左whatsapp
打開左同嘉怡嘅對話
原來
最後一句話仍然停留於「我等你」度，
嘉怡咪已經同我道別，
叫左我唔好再等囉
我見到嘉怡喺操場行過，向住校門行去
佢嘅身影依然好柔弱，
我想依家出現喺佢身邊，
攬住佢，保護佢
最後，嘉怡踏出校門
踏出了我們的回憶
我入翻課室，拎翻嘉怡寫完嘅紀念冊出黎
嘉怡嘅字跡係我見過最靚嘅
佢好認真咁答曬所有紀念冊啲on9問題同寫曬所有個人資料同聯絡方法
你最喜歡的節日是？
聖誕節
你最開心回憶是？
去倒數
你最好的朋友是？
阿謙
你對我的第一引象是？
很友善，很聰明，經常幫助別人，
很細心、體貼、體諒別人的
你對我現在的感覺是？
同上面一樣&你是很好、很風趣、
很純情的男仔，是與別不同的
你有什麼要跟我說？
阿謙，多謝你比左咁多快樂同保貴
嘅回憶我，有你嘅呢半年入面，我
每日都過得好開心。
冇左你的話，相信我依舊係個內向
既人。
自從識你之後，我識到更多朋友，
多謝你呀。
我諗你一早就知道我係鍾意你嘅，
如果唔係我都唔會同你一齊去倒數
啦。其實，我都feel到你鍾意我，
可惜我地大家都唔敢行多一步…
太遲啦，我地冇可能翻翻去當日，
重新做過個選擇，唔係講happy
new year 而係講I love you。
算啦，件事始終都過左去，當係
一個經驗，多謝你呀阿謙，呢一
份回憶我永遠唔忘記，因為，你喺
我心入面永遠係對我最好嘅人。
最後，希望你公開試考好啲，同搵
到你鍾意嘅人。
嘉怡
我收翻好張紀念冊，去左廁所洗個面
搵翻龍仔佢地，享受埋最後幾個鐘
大概玩到7點幾，
留喺度玩嘅同學都開始離開
我入翻班房
望住冇人嘅坐位，
彷彿諗翻起平時全班同學嬉戲嘅情景
我拎起書包，
凝望嘉怡個位，勾起無數往事
我行到門口，回頭一看
只要踏多一步，
所有嘅回憶將會逐漸消散
我好唔捨得，但我必需繼續往前行
我關上燈，閉上門，
正式向這段回憶道別
我落去小食部同肥牛佢地仲有其他friend會合，一齊去打邊爐
果晚玩到10點先翻到屋企，
沖完涼，見悶悶地打算搵雅晴傾下計
打開Whatsapp，仍停留在與嘉怡的對話中，
我退出了嘉怡的聊天室，進入雅晴的聊天室