［愛情純愛］我地之間嘅友誼純度絕對等於零！！！: 135. 強行抑壓
「做完功課⋯休息一陣先～」邱茗然坐喺書枱前伸咗個大大嘅懶腰，一直坐喺書枱前都坐到腰痛
邱茗然拎起手機，打開IG，IG一開就自動刷新一次，一刷新，就彈咗潘景諭同沈心怡嘅IG story出嚟
邱茗然先睇沈心怡嘅story，見到沈心怡影嘅蛋糕同Latte，邱茗然喺螢幕嘅右邊輕掂一下，story自動跳去下一個：潘景諭嘅story
「諭哥哥出咗街呀⋯竟然會係去cafe⋯？」邱茗然見到潘景諭喺cafe影嘅相，邱茗然望住潘景諭嘅story陷入沉思，「cafe⋯？啱啱心怡姐姐嘅story⋯」
邱茗然連忙撥番去沈心怡嘅story認真地睇清楚，然後又再睇一次潘景諭嘅story，見到一樣嘅雲石枱、一樣嘅杯碟⋯
「諭哥哥同心怡姐姐⋯拍拖？」邱茗然一諗到呢度，心就有啲唔舒服
雖然知道自己同潘景諭係有距離，但邱茗然仍然係中意潘景諭⋯
第一次見潘景諭嘅時候，係邱旻顥啱啱上中學、邱茗然仲係小學生時嘅事，邱茗然有一日放學番嚟屋企，見到邱旻顥同潘景諭坐喺梳化，手上拎住遊戲手制打緊機
「你妹妹呀？」潘景諭回頭望邱茗然一眼後問邱旻顥
「嗯，係呀。」邱旻顥眼睛望住電視，好似下意識回答一樣開口
「嗨～」潘景諭主動地向邱茗然打招呼，臉上掛着自信嘅笑容
「嗨、嗨⋯」邱茗然望住潘景諭時怔住了
五年級嘅邱茗然，第一次感覺到心臟用力收縮嘅感覺，第一次感受到「心動」係點嘅一回事⋯
「諭哥哥拍拖啦⋯？」邱茗然喺心裏又問自己一次呢個冇人比到答案佢嘅問題，「同心怡姐姐⋯？」
邱茗然將手機嘅螢鎖直接鎖上，心裏有啲不忿亦有啲悶悶不樂⋯
⋯
沈心怡將放喺書架上嘅書抽出嚟，本來對睇書冇咩興趣嘅潘景諭離遠望沈心怡，望住沈心怡專心致志嘅模樣，覺得⋯特別吸引
「睇緊咩書？」潘景諭悠閑地行到沈心怡嘅身旁，瞄一眼書嘅內容
「嗯？」沈心怡感覺到潘景諭企喺離自己好近嘅位置，抬頭同潘景諭四目交投，「只係本散文集～」
「你中意睇散文？」潘景諭好奇地問道，佢想了解沈心怡多啲
雖然話識咗好耐，但潘景諭實際上並唔係真係好了解沈心怡，所以想借兩人相處嘅時間，了解多啲沈心怡中意嘅嘢
「間中都會睇下。」沈心怡將書放回書架上，「散文寫嘅嘢好感性，好容易觸動人心⋯」
「觸動到你？」潘景諭微笑問道
「間中啦～」沈心怡一笑置之
沈心怡沿住書櫃行，喺佢眼中只剩下一本又一本書；潘景諭行喺沈心怡嘅身後，悄悄提手偷摸沈心怡嘅一頭秀髮，但髮絲掃過潘景諭嘅手背後又披番喺沈心怡嘅背上
「嗯？」沈心怡感覺到有人輕輕地觸碰佢，於是沈心怡回頭望潘景諭，潘景諭默默地搖頭
沈心怡將夾喺耳仔上方嘅髮夾拆咗落嚟，打算再重新夾一次夾好啲；潘景諭留意着沈心怡嘅舉動
「你做咩突然拆咗個髮夾？」潘景諭不解地問，本來髮型已經好好
「感覺凝住有啲鬆，所以想再夾過⋯」沈心怡拎住兩隻一字夾，雙手熟練地拎起一小撮頭髮分開兩小束，兩束頭髮交疊扭幾個圈
「我幫你夾呀～」喺旁邊望咗一陣嘅潘景諭突然自告奮勇地自薦道
「你幫我夾？」沈心怡不禁一笑，但眼神裏係甜係溫柔，「你識夾咩？」
「應該識⋯」潘景諭邊講邊伸手拎起沈心怡手上拎住嘅兩隻一字夾
潘景諭望咗一陣，大概都記得沈心怡啱啱係點整髮型；沈心怡微微側身企，潘景諭小心翼翼地拎起沈心怡一小撮頭髮，根據自己啱啱望到嘅步驟幫沈心怡梳咗一個小小嘅兩股辮
「跟住要點⋯」潘景諭拎住髮夾問沈心怡
「波浪呢邊向下，然後就咁夾。」沈心怡拎咗一隻做示範，「就係咁啦～」
「哦⋯」潘景諭微微點頭，然後又企近沈心怡少少
潘景諭小心翼翼地將髮夾夾回沈心怡嘅頭髮上，生怕會整痛沈心怡一樣
「Okay？」潘景諭問沈心怡
「唔⋯」沈心怡拎起手機，用手機殼上嘅鏡照一照，「都Okay啦～」
見到沈心怡嘅笑容，潘景諭都笑起嚟；潘景諭有啲情不自禁，伸手幫沈心怡將髮絲繞到耳背，沈心怡抬眼望住潘景諭，心跳嘅感覺又變得好強烈
「呢個情況⋯」沈心怡嘅心覺得特別緊張，潘景諭對佢嘅主動，令佢有啲擔心潘景諭會唔會忍唔住⋯錫佢⋯
「噗噗⋯！噗噗⋯！噗噗⋯！」
心跳聲喺呢一刻特別響亮，兩人四目相對，沈心怡輕輕抿唇；潘景諭嘅目光喺沈心怡抿唇之際，默默地轉移到沈心怡嘅唇上
「今日心怡搽咗唇膏⋯」潘景諭留意到沈心怡嘅唇色唔一樣，有少少閃亮嘅感覺，「呀⋯救命⋯」
沈心怡提手溫柔地捉住潘景諭嘅手腕，溫柔嘅觸碰隨即令潘景諭有一份觸電嘅感覺由手腕迅速傳到心臟
「唔得⋯！」潘景諭感覺自己就嚟忍唔住，佢連忙為咗壓抑自己嘅「衝動」而縮手，垂低手後用力地握拳，「行啦⋯去樓上睇下⋯」
潘景諭先一步邁步行，沈心怡嘅心仲停留咗喺啱啱嘅一刻
「心怡？」潘景諭回頭望向沈心怡，沈心怡頓時回神跟上潘景諭嘅步伐
沈心怡提手將髮絲繞到耳背，感覺臉頰又紅又熱⋯潘景諭嘅左手輕輕地捉住右手嘅手腕，感覺手腕都喺度發熱⋯
IG Link: https://www.instagram.com/nd_cotttoncandy/?hl=zh-tw