［愛情純愛］我地之間嘅友誼純度絕對等於零！！！: 134. 所有

喺沈心怡定睛地望住潘景諭等佢講嘅時候，潘景諭就覺得害羞得唔自在，連忙將視線移開，耳根比啱啱更紅

「咩呀？」沈心怡微微一笑問，內心好奇極了

「只係想講你今日⋯好好睇⋯」潘景諭偷瞄沈心怡一眼後講道，手一直拎住手機把玩一樣

「多謝⋯」沈心怡稍微一怔後微笑道

「今日心怡肯同我出嚟，都算係少少接受我⋯掛⋯」潘景諭喺心裏講同時，兩人點嘅嘢飲都到咗





侍應將兩杯Latte放到枱上，一杯喺沈心怡嘅面前，一杯喺潘景諭面前，Latte面上有一個好靚嘅心型拉花

「好靚～」沈心怡細聲地笑道後，幫Latte影咗張相，然後小心翼翼地拎起飲咗一啖

喺沈心怡小心翼翼地飲緊試緊味嘅時候，抬眼就見潘景諭影自己相，沈心怡唔知點解有啲唔好意思，明明平時同李逸彤一齊嘅時候都唔會

「你⋯洗唔洗睇下⋯？」潘景諭以為沈心怡怕佢將自己影得唔好睇，便將手機遞比沈心怡

「都好⋯」沈心怡因為唔好意思所以有啲面紅，但都係伸手接過手機，「你影得咁好睇嘅？仲識用原況影～」





沈心怡有啲意外潘景諭識用呢招幫佢影相，但無可否認嘅係真係影得幾好睇

「我中意呢張～」沈心怡望住其中一張相，然後遞比潘景諭睇，係沈心怡拎起咖啡杯時最自然嘅一刻，臉上帶着淡淡嘅笑容

潘景諭拎起叉準備食啱啱送嚟嘅意粉時，佢下意識朝水吧嗰邊望去，沈心怡悄悄地偷影一張「女友視覺」

「你淨係食一個蛋糕，夠飽啦？」潘景諭柔聲問道，佢嘅目光落喺放喺沈心怡前面嘅芝士蛋糕上

「今日早起身，食咗早餐，所以夠飽啦～」沈心怡微微一笑講道





「心怡應該⋯有認真考慮我⋯？」潘景諭望住低頭斯文食嘢嘅沈心怡喺心裏自言自語道，「如果最後佢都係唔接受我⋯咁點好⋯」

「阿諭？」沈心怡留意到潘景諭喺度發呆，便叫咗潘景諭一聲，但潘景諭仍未回神，「阿諭？」

「係？」潘景諭回過神望向沈心怡

「見你啱啱發呆啦～」沈心怡露出溫柔嘅微笑，食咗一啖蛋糕

蛋糕嘅甜味喺口中散開，外面嘅甜味散去後就食到微微嘅酸味，但甜中帶酸嘅味道卻令人開胃

潘景諭嘅目光下意識就會落喺沈心怡嘅身上，披喺膊頭上嘅散髮，柔順嘅髮絲，微卷嘅髮尾，明明只係普通女仔可以擁有嘅嘢，但只有沈心怡可以牢牢地吸引住潘景諭

「阿諭你⋯」沈心怡喺再食一啖蛋糕前緩緩開口，「到底⋯中意我啲咩⋯？」

沈心怡罕有地直白，潘景諭有啲意外，佢冇留意到沈心怡臉上嘅一抹淡紅；沈心怡自己都諗咗好耐，但始終唔太明白，潘景諭中意呢個普通嘅自己啲咩





「所有掛⋯」潘景諭用着輕鬆嘅語氣講出令佢緊張唔自然嘅說話

沈心怡一怔，潘景諭眼睛餘光留意到沈心怡嘅表情後，微微低頭垂眸，拎住叉卷着意粉道：「察覺到嘅時候已經中意咗⋯」

「我仲以為你會中意啲⋯更特別⋯？之類嘅人⋯」沈心怡垂眸，目光落喺眼前食咗一半嘅芝士蛋糕上

芝士蛋糕好甜，但係遠遠比唔上潘景諭講嘅嘢令人心甜，沈心怡有啲明白李逸彤之前講嘅「糖再甜都唔會甜入心」嘅感覺

「都係嘅。」潘景諭微微點頭，然後又抬眼偷望沈心怡一眼，「所以中意你。」

潘景諭自己講完之後，自己都尷尬到提手扶一扶額；沈心怡聽到潘景諭講嘅嘢，覺得害羞又心動，臉頰比啱啱更紅

「都太直接啦⋯！」沈心怡喺心中激動地講道，係小鹿亂撞嘅感覺





兩個人默默地安靜咗落嚟，沈心怡唔知要點樣回應，潘景諭又唔知講咩好先啱，唯有兩個人都先尷尬一陣先再作打算

沈心怡拎起手機想暫時逃離一下呢份尷尬嘅感覺，點知一打開IG就見到潘景諭po咗嘢喺story，沈心怡直接就㩒開咗潘景諭嘅story

「佢幾時po㗎⋯？」沈心怡抬頭望一望潘景諭，「我啱啱⋯都po咗story⋯」

沈心怡喺嘢飲啱啱送到嚟嘅時候先影咗相po story，但係佢冇影到任何人，只係影咗自己嘅嘢食，佢亦冇喺story入面@任何人，但宜家潘景諭都po咗story⋯

「其他人會唔會睇得出我同阿諭單獨出嚟⋯？」沈心怡望住潘景諭嘅story時喺心裏問道

沈心怡先一步將佢嘅lunch食完，沈心怡悠閑地拎起Latte飲一啖，佢嘅視線默默地落喺坐佢對面嘅潘景諭身上；沈心怡自然地將手機橫拎，光明正大咁影潘景諭

「你食完啦？」潘景諭見沈心怡托住頭睇手機，「你⋯應該唔係影緊我⋯？」

「唔係呀～」沈心怡自然地講大話隱瞞真相，但手卻㩒下拍攝制





潘景諭直覺覺得沈心怡影緊佢，佢下意識就拎手機影沈心怡，兩人就係一直喺呢個互相「偷影」嘅狀況下食完一餐lunch，喺踏出cafe門口嘅時候，兩人互相將啱啱影嘅相都send番比對方

「睇下相先～」沈心怡收到相嘅第一件事，係要先認真咁睇一下，畢竟佢今日有po相嘅打算

潘景諭悄悄地望住沈心怡將中意嘅相save低做favorite，佢嘅嘴角微微上揚，咁樣即係沈心怡都滿意佢影嘅相

「你覺得邊張好睇？」沈心怡自然地望潘景諭一眼後，將手機遞比佢睇同時問道

「其實張張都好睇。」潘景諭都唔打算掩飾，一臉自信地講道

「嘻嘻～我都覺～」沈心怡甜甜一笑，佢呢一笑簡直係將潘景諭嘅心直接溶化








IG Link: https://www.instagram.com/nd_cotttoncandy/?hl=zh-tw