［愛情純愛］我地之間嘅友誼純度絕對等於零！！！: 129. 無意

邱旻顥早一步落到大堂，同平時一樣喺外面嘅當眼處等李逸彤落嚟

「你出門口未？」邱旻顥send咗個message比李逸彤

正當邱旻顥諗緊李逸彤幾時覆、到底出咗門口未嘅時候，李逸彤跟喺幾個人後行出大堂

今日嘅李逸彤睇起嚟心情愉快，同平時相比，今日嘅雙眸中有一閃一閃嘅亮光，成個人都散發着活潑嘅氣場

「早～晨！」李逸彤帶着輕快嘅步伐行到邱旻顥嘅面前，臉上掛着燦爛嘅笑容





「早晨。」邱旻顥溫柔一笑

「陣間食咩早餐好？」李逸彤問邱旻顥

李逸彤望住邱旻顥嘅時候，會一直不自覺咁提醒自己，邱旻顥係佢男朋友，終於，係佢男朋友

「我嘅眼光真係好～」望住邱旻顥嘅側面，李逸彤都會自動地沉迷落去一樣，可以光明正大、理直氣壯咁望住邱旻顥嘅感覺好好

邱旻顥輕輕地拉過李逸彤嘅手，輕輕地拖住佢，兩人嘅手心之間仲有空隙，好似係邱旻顥比李逸彤掙脫嘅機會一樣





就喺邱旻顥拉過李逸彤嘅手時，李逸彤頓時有種怦然心動嘅感覺，嗰種新鮮刺激嘅感覺湧上心頭

「著住校服拍拖咁青春⋯！」李逸彤喺心裏激動地吶喊，臉頰都染上紅霞

喺落車之後，兩人就默契地鬆開手冇拖落去，始終番到學校附近，低調啲比較好

「喂喂，我啱啱番嚟嘅時候，見到邱旻顥同李逸彤拖住手！」

「真係㗎！？不過都知佢兩個有嘢㗎啦～」





「都估到佢地遲早會一齊。」

今日早番到嘅沈心怡坐喺位聽住其他啱啱番到嚟嘅女同學喺度講八卦，沈心怡抬眼朝佢地望一望，隨即又若無其事咁低頭

「佢地喺埋一齊啦⋯」沈心怡心裏冇半點意外，雖然有啲在意係事實

呢個時候潘景諭行入課室，有女同學同潘景諭講早晨，潘景諭禮貌地回答；沈心怡聽到潘景諭嘅聲音，但佢好似抑壓住自己一樣死都唔望

「咁如果你覺得我唔係好差，你又冇中意嘅人的話⋯可唔可以認真咁，考慮下我⋯？」沈心怡嘅大腦隨即拋出呢句說話，好讓沈心怡記起

「早晨。」潘景諭行到沈心怡嘅座位時，手沿住沈心怡嘅枱邊掃一下

「早晨⋯」沈心怡抬頭望向潘景諭，用肉眼都睇得出嘅尷尬微笑回覆

潘景諭放低書包喺櫈上，回頭默默地望咗沈心怡一眼後朝locker嘅方向行去





李逸彤同邱旻顥同平時一樣一齊番嚟行入課室，手上拎住今日嘅三文治早餐

「我去個toilet。」李逸彤喺番到位後細聲地對邱旻顥講道

「哦好呀～」邱旻顥微微頷首

沈心怡見李逸彤起身，連忙跟住李逸彤出去，追上李逸彤嘅步伐

「你都去toilet呀？」李逸彤問行到佢旁邊、挽住佢手臂嘅沈心怡

「同邱旻顥拍拖點呀～」沈心怡細細聲、微笑着問李逸彤，「係唔係日日都好似糖咁甜？」

李逸彤一臉難以置信，佢都未開口同沈心怡講，點解沈心怡就已經知道？





「你點知㗎？我仲打算今日同你講⋯！」李逸彤不解地問沈心怡

「啱啱昕婷佢地幾個先喺度講，話見到你同邱旻顥拖手。」沈心怡講道

「呀～」李逸彤點點頭示意明白

「所以呢～點呀？幾時開始㗎？」沈心怡好奇地追問道

「上星期五放學之後～」李逸彤甜絲絲地講道，甜絲絲嘅感覺從笑容中展露，沈心怡不禁有啲羨慕起嚟

「哦～甜到你呀～」沈心怡用膊頭輕撞李逸彤一下，「肯定好似糖咁甜啦～」

「唔係喎～」李逸彤意外地會否認，「糖再甜都唔會甜入心。」

李逸彤行入廁格同時，馨馨推門大步行入嚟；沈心怡不以為然地企喺洗手盆前睇手機，馨馨則企喺同沈心怡相隔三個洗手盆嘅位置，對住鏡整理頭髮





馨馨瞄咗沈心怡一眼，其實沈心怡見馨馨入嚟嘅時候，頓時覺得有啲唔自在，但佢又唔會避，只好當睇唔到

「你就好啦心怡～」馨馨陰陽怪氣地講道，沈心怡緩緩抬眼望向佢，眼神中表達出「呢個人又想講咩」嘅無奈

「指邊一方面⋯？」沈心怡不解地問，但其實佢冇太大嘅興趣知馨馨講咩

「有個靚仔喺身邊，又有李逸彤維護你。」馨馨用嘲諷嘅語氣講

喺廁格內嘅李逸彤聽到馨馨把聲，連忙整理好沖廁想開門行出去

「哦⋯」沈心怡淡然地哦咗一聲，然後無意地問：「你冇咩？」

沈心怡一句話，馨馨頓時啞口無言，睜大雙眼狠狠地瞪着沈心怡，嬲到頭頂都就嚟要出煙





李逸彤從廁格行出嚟，望住沈心怡有啲從容嘅表情，馨馨則又嬲但又反駁唔到嘅表情

「哼！」馨馨見李逸彤行出嚟，連忙不忿地哼一聲，喺走前仲要補多句：「虛偽⋯！」

沈心怡同李逸彤望住馨馨氣沖沖地行出廁所，女廁嘅門呯一聲閂上，兩人對望一眼

「佢好似又嬲咗我啦⋯」沈心怡無奈地講道，心裏有啲無辜嘅感覺

李逸彤同沈心怡行喺離馨馨唔遠嘅地方，淨係睇馨馨嘅背影都知佢嬲，大步大步咁向前行，散發着「生人勿近」嘅氣場

馨馨只顧自己嬲都唔睇路，差唔多行到課室門口準備轉彎行入課室嘅時候，成個人撞上啱啱行出嚟嘅潘景諭身上




IG Link: https://www.instagram.com/nd_cotttoncandy/?hl=zh-tw