［愛情純愛］我地之間嘅友誼純度絕對等於零！！！: 128. 甜蜜

「如果你冇中意嘅人嘅話⋯我亦，唔太差嘅話⋯考慮下我可唔可以⋯？」潘景諭直白地問道

潘景諭唔會婉轉咁問沈心怡，因為佢想直接表達比沈心怡知佢對佢係唔一樣、係真心

「我可以等你答覆⋯」潘景諭嘅手唔自在地捉一捉孭喺背上嘅袋嘅孭帶，「你唔好直接拒絕我先⋯」

其實沈心怡的確唔係討厭潘景諭之類，只係佢唔了解自己想點⋯對於同唔同潘景諭一齊呢個問題，沈心怡自己都覺得好迷惘⋯

「噗⋯！」沈心怡忍唔住一笑，「好難想像你會講啲咁嘅嘢⋯」





「呀⋯？」潘景諭自己都唔好意思地笑，但冷靜落嚟之後，潘景諭又認真起嚟，「沈心怡，我講真㗎，唔係講笑。」

「嗯，我知道。」沈心怡點一點頭示意，從潘景諭嘅眼神中就知道佢係認真，絕無半點開玩笑嘅成份

潘景諭邁步走向沈心怡，沈心怡冇迴避，只係有啲疑惑潘景諭嘅舉動

「咁如果你覺得我唔係好差，你又冇中意嘅人的話⋯可唔可以認真咁，考慮下我⋯？」潘景諭認真講出一番以前自己冇諗過會講出口嘅說話

沈心怡不禁吞一啖口水，佢定睛望住潘景諭，內心有啲激動但表面上都只係冷靜嘅佢





一個自信嘅人忽然誠懇咁講出請求般嘅字句，有時會令人格外動容，可能係一種反差萌

「嗯。」沈心怡肯定地點一點頭，佢呢個點頭令潘景諭嘅心頓時掀起大浪

潘景諭即刻覺得，自己都唔係完全冇機會，心中嘅激動令佢成個人都醒一醒

「咁我番去先啦，你都早啲番去⋯」沈心怡微微一笑關心道

「好，拜拜。」潘景諭嘅臉上終於掛上發自內心嘅笑容





沈心怡轉身朝大堂嘅門口行去，潘景諭亦轉身離開

⋯

「我番到屋企啦～」李逸彤先啱啱行入屋企門口，就急不及待send咗個message比邱旻顥

邱旻顥先啱啱踏出電梯，就即刻感覺到放喺褲袋嘅手機震動，邱旻顥邊睇手機邊拎鎖匙行番屋企嘅鐵閘前

「我都啱啱到屋企門口」邱旻顥微微一笑回覆李逸彤嘅message

未一齊嘅時候覺得，由25樓去到32樓係一個好遠嘅距離；宜家一齊咗，卻感覺25樓到32樓呢7層嘅距離，係最近嘅距離⋯

邱旻顥：我沖涼先，星期一朝早等埋你一齊番學？

「嘻嘻⋯」李逸彤見到邱旻顥嘅message，笑到眼睛都瞇成一條線，然後迅速打字：「唔係呢～你唔想等我都唔緊要嘅！」





邱旻顥：我會等埋你嘅～免得女朋友嬲我啦～

「哦～咁唯有聽日同你一齊番學啦～」李逸彤回覆道，「而且我冇咁小氣囉」

邱旻顥：你不嬲都好大方㗎啦

邱旻顥：最大方又善解人意嘅係你

李逸彤打從心底覺得心甜，啱啱一齊嘅時候，所有事都係美好，一句普通嘅讚美都會有心甜如蜜

「一直都係」李逸彤毫不客氣地回答，將稱讚照單全收，「咁都比你發現到」

邱旻顥：我有眼光，好明顯唔係咩？





「多謝，我唔會客氣」李逸彤抿着唇，但都係冇辦法阻住笑意滲出，「你唔係沖涼咩去？」

邱旻顥：諗住覆埋你先

邱旻顥：宜家去，沖完涼再搵你

「Okay等你」李逸彤回覆後便等邱旻顥先落線後自己先落線

呢兩日嘅事發生得太突然，每個鐘都會想摵自己一下睇下係真實定發緊夢；明明一直都默默期待同邱旻顥一齊，但一齊咗之後卻有種難以置信嘅感覺

「我都沖個涼先！」李逸彤從衣櫃拎出要替換嘅衣物，將手機放喺枱就行出房去廁所沖涼

李逸彤換番屋企衫，啱啱沖完一個熱水涼感覺成個人都鬆晒，佢邊哼着歌邊行去放喺廚房嘅洗衣機

「心情做咩咁好？」坐喺梳化煲緊劇嘅媽媽留意到李逸彤嘅情緒，「中咗頭獎呀？」





「有咩～冇呀～」經過梳化嘅李逸彤望向媽媽，然後又哼着歌行去廚房

媽媽望住李逸彤行入廚房嘅身影無奈地笑，李逸彤嘅心情好明顯，開心同唔開心一睇就知

李逸彤閂埋房門，行到書枱前迅速地拎起手機，向後行一步坐低喺床邊往後灘低喺床上，一個翻身趴喺床上

「唔知邱旻顥沖完涼未⋯」李逸彤拎住手機，見到冇message彈出嚟，李逸彤又忍唔住嘆氣，「哎呀⋯好想快啲番學見到佢⋯」

手機一日冇邱旻顥嘅message彈出嚟，李逸彤就食唔安坐唔落一樣，灘喺床上左轉右轉，但點轉都好，雙眼都係離唔開手機螢幕

「先過咗5分鐘⋯」李逸彤望住手機角落顯示嘅時間，原來自己只係沖完涼5分鐘，但感覺已經過咗至少15分鐘

「哎呀⋯搵唔搵佢好？」李逸彤心大心細想搵邱旻顥，拎起手機㩒開對話想打字嘅時候又欲言又止，「太主動搵佢，佢會唔會覺得我煩⋯？雖然話啱啱一齊⋯」





李逸彤將臉埋喺被，心入面好想搵邱旻顥，但又怕一嚟就咁主動反而會令邱旻顥覺得煩

「再過五分鐘就搵佢⋯！」李逸彤抑壓着內心嘅掛念將手機屏幕鎖上，「但都係好想搵佢⋯」

李逸彤雙手手肘將上半身撐起，拎去手機又㩒開同邱旻顥嘅對話，小心翼翼地打咗句：「你番嚟未？」

「唔⋯」李逸彤喺send出去之前又將message刪咗，再輸入：「我番嚟啦～」

李逸彤覺得咁樣做開頭好似又唔太好，默默地將內容刪去；正當李逸彤苦惱地諗緊要send咩嘅時候，邱旻顥上線

邱旻顥：我番嚟啦

「我喺度！」李逸彤高興地回覆，有時真係會覺得自己同邱旻顥，真係心有靈犀




IG Link: https://www.instagram.com/nd_cotttoncandy/?hl=zh-tw