［愛情純愛］我地之間嘅友誼純度絕對等於零！！！: 120. 對不起
「咁你本來係打算⋯拒絕佢？」李逸彤心裏有啲好奇，佢覺得沈心怡未必會拒絕潘景諭，若然早就打算拒絕，咁沈心怡都冇必要咁在意潘景諭嘅表白
「其實我都⋯唔知⋯」沈心怡扁起嘴，遲疑地回答
「唔知？你中唔中意佢？」李逸彤問到關鍵嘅問題
「我覺得我同阿諭唔配⋯」沈心怡嘅回答算係繞咗一個大圈，提起潘景諭嘅時候，沈心怡嘅雙眸都會有亮光閃一下似的，「我地差好遠，好多方面嚟講⋯」
「但你中意佢呀唔係咩？」李逸彤半猜測地問道，佢唔肯定沈心怡係唔係真係中意潘景諭，但直覺認為沈心怡係中意潘景諭，「你就唔怕佢會中意第二個？」
「佢遲早會中意第二個⋯」沈心怡明明好在意潘景諭，但偏偏講唔出中意潘景諭，講出口嘅係違背良心嘅說話
「咁到佢中意第二個嘅時候，你就真係要後悔啦～」李逸彤笑了笑講道，「你既然中意佢，佢亦中意你，你做咩要一直講反話？」
「因為唔合適⋯」沈心怡輕嘆一口氣，默默地解釋道，「可能因為⋯我本來就冇勇氣去接受佢嘅心意掛⋯」
「如果所有感情都從合唔合適出發⋯你會錯過佢㗎⋯！」李逸彤輕皺起眉頭講道
「彤彤⋯」沈心怡柔聲地叫李逸彤同時，佢將啱啱拎上手嘅一枝香水放番喺架上，「唔係所有人都可以好似你同邱旻顥一樣係本來就合適⋯愛情本來就係自私，我都係自私⋯！我唔敢同佢一齊⋯」
「所以你要佢難受⋯？」李逸彤不解地問道，「你冇睇到潘景諭今日嘅表情咩？」
沈心怡沉默不語，佢完全唔係故意要令潘景諭難受，但沈心怡自覺自己唔會比到一個好嘅回答潘景諭，什至連潘景諭都已經預設咗沈心怡嘅回答，要沈心怡同潘景諭解釋嘅話，喺邊度開始解釋？
「我⋯知道係我嘅原因令佢唔開心，但我唔通要同佢講因為佢多人追，我冇安全感，所以唔接受佢咩⋯？」沈心怡嘅心入面係滿滿嘅苦澀
「你寧願錯過佢⋯？」李逸彤問道
李逸彤唔明白，既然沈心怡係中意潘景諭，而潘景諭都開口表明咗自己嘅心意，點解沈心怡就唔接受，真係完全係因為沈心怡冇安全感？
「我都唔知⋯」沈心怡有啲迷惘地搖頭，拎起另一枝香水望咗兩眼，手拎住香水樽捏了又捏，「我又唔係唔中意嘅⋯只係覺得我同阿諭之間差太遠⋯我都唔想令佢唔開心，但我冇辦法比一個答案佢⋯」
李逸彤都有啲詞窮，都唔知可以再講啲咩，始終沈心怡嘅想法只有沈心怡自己先了解，佢要接受定拒絕亦係佢自己嘅決定
「或者我同阿諭，注定要錯過⋯」沈心怡喺心裏有啲失落，佢唔想錯過潘景諭，但係佢亦冇勇氣同潘景諭一齊
自從潘景諭表白之後，沈心怡同潘景諭都冇再講過嘢一樣，沈心怡唔知要點同潘景諭開口解釋，潘景諭卻一副冷淡嘅模樣
「彤彤⋯我真係⋯令佢難受啦係唔係？」沈心怡嘅腦海中全都係潘景諭，佢不禁開口問李逸彤
「佢難唔難受我就唔知啦，不過感覺佢係真係唔開心⋯」李逸彤聳聳肩，邊講邊觀察着沈心怡嘅表情
沈心怡將頭微微耷着，佢唔係故意要令潘景諭唔開心，亦唔想大家尷尬，只係⋯佢唔知要點樣回應潘景諭嘅心意⋯沈心怡對潘景諭嘅心思，幾乎係收喺心嘅深處，故意唔將佢放上面，唔將呢份感情表露出嚟
「我都冇察覺到心怡係中意潘景諭⋯都唔知係我觀察力差定心怡收得太埋⋯」李逸彤喺心裏默默地慨嘆道
但有一件事李逸彤講中咗，就係沈心怡好難同潘景諭一齊
「阿諭話唔會逼我做決定⋯」沈心怡又緩緩地開口講道
「佢唔逼你做決定，唔代表佢唔想同你一齊。」李逸彤邊睇放喺架上嘅嘢邊講道，沈心怡頓時一怔，「只係佢知你會拒絕，唔敢親耳聽你講。」
沈心怡望向李逸彤，李逸彤講嘅說話彷彿刺中咗沈心怡心中最柔軟嘅一塊，講中咗沈心怡心入面最在意嘅一點
「我知道⋯」本來彎着腰嘅沈心怡企好個人，細聲地講道，雙手默默地捉緊書包嘅孭帶
當李逸彤拎起手機，視線集中落喺手機螢幕時，李逸彤不禁一笑；沈心怡見到李逸彤嘅笑容同打字嘅動作，唔洗問都知係邱旻顥搵佢
「真係好⋯彼此之間成日搵對方，有咩都會同對方分享⋯」沈心怡望住李逸彤臉上嘅笑容，心裏忍唔住羨慕
沈心怡諗起潘景諭，佢同潘景諭，幾乎唔會講其他嘢，私下都好少傾計
「你同邱旻顥，咩都講？」沈心怡好奇地問道
「嗯！」李逸彤點一點頭，然後心情好好一樣笑起嚟，「咩都講下呀～」
「唔知潘景諭做緊咩⋯」沈心怡嘅手下意識摸一摸裙袋輕輕地捉住手機，心裏有種想send一個message比潘景諭問佢做緊咩嘅衝動，「會係打緊機定做緊功課⋯」
「想搵潘景諭呀？」李逸彤睇穿沈心怡嘅猶疑，「佢一定都等緊你搵佢嘛～」
沈心怡望一望李逸彤，沈心怡心裏有啲唔知點算嘅感覺，雖然呢種感覺唔太強烈，但係可以感覺到嘅程度⋯
手機忽然一震、螢幕一亮，本來溫緊書嘅潘景諭嘅視線隨即落喺手機上
潘景諭拎起手機，放喺書枱上嘅書中，每頁都貼着有兔仔圖案嘅Memo紙，紙上係一行一行秀麗又整齊嘅字，用唔同色嘅螢光筆間住重點、用紅筆寫咗備註
「心怡⋯！」潘景諭望到message嘅發送人，心裏又驚又喜
潘景諭連忙放低手上嘅嘢坐好，抱着期待同激動嘅心㩒入message
沈心怡：嗰日對唔住
IG Link: https://www.instagram.com/nd_cotttoncandy/?hl=zh-tw