［愛情純愛］我地之間嘅友誼純度絕對等於零！！！: 119. 羨慕死

沈心怡雙手放喺身前輕輕扣着，望到馨馨又嬲自己，啱啱嘅事又有啲尷尬，宜家有種唔知點算嘅感覺

「彤彤，陪我去個toilet呀⋯」沈心怡對李逸彤講道，臉上掛着淡淡嘅笑容，但明眼人都睇得出，佢嘅笑容係苦笑

「哦⋯好呀⋯」李逸彤上前行喺沈心怡嘅身旁

潘景諭將拎喺手上嘅紙包飲品飲晒，佢微微低頭望住手中嘅空紙盒，將紙包一捏，然後先掉到垃圾桶中

「你今日同沈心怡做咩咁唔自在？」邱旻顥終於將佢早就察覺到嘅事問出口，「你嘅表情唔對路。」





潘景諭冇即刻回答邱旻顥，而係安靜地沉思咗一陣後先再苦澀地開口：「可能因為知道佢會拒絕我掛⋯」

「你又知？你有問佢咩？」邱旻顥笑了笑問道，「你又未表白，再試探下囉。」

「哈⋯」潘景諭似笑非笑地輕笑一下，聳聳肩，「嗰日表咗白，佢嚟搵我嗰日⋯係我衝動同佢講。」

「吓？」邱旻顥震驚地望住潘景諭，佢估唔到潘景諭會咁快表白，「咁、咁突然嘅⋯？佢答咗你咩？」

雖然見到佢地咁樣嘅狀態，都估到大概會係點嘅狀況，如果沈心怡係接受咗潘景諭嘅表白，咁今日嘅佢地一定唔呢種狀態





「喺佢答之前，我就已經退縮⋯」潘景諭苦笑道，「佢其實冇答我啲咩⋯」

邱旻顥覺得，其實沈心怡對潘景諭係有好感，佢唔敢肯定沈心怡對潘景諭嘅係中意，但至少一定係好感

「佢冇再提過？」邱旻顥邊行邊問道，兩人打算先番上課室，反正兩個女仔見唔到佢地都會估佢地番咗上去

「冇啦⋯」潘景諭搖搖頭，「佢好似都有啲尷尬咁⋯與其令佢尷尬，咁不如我避佢⋯」

「你唔想聽到佢嘅回答？」邱旻顥問道





「佢應該都會拒絕⋯睇佢當時嘅反應，大概都估到⋯」潘景諭輕嘆一口氣，每次回想起沈心怡當下嘅表情，潘景諭嘅心都會揪着難受，「佢嘅反應都代表咗佢嘅回答啦⋯唔係咩？」

邱旻顥都唔知點樣安慰潘景諭好，感覺如果同佢講自己覺得沈心怡係中意佢，又好似比咗一份希望佢一樣，又會令佢難受啲⋯

「好羨慕你呀兄弟⋯」潘景諭伸手搭住邱旻顥嘅膊頭講道，佢講嘅又真係事實嚟，「呀⋯真係羨慕死⋯」

邱旻顥只係無奈地笑，感覺宜家再講啲咩都好似雪上加霜一樣⋯邱旻顥望向潘景諭，從潘景諭嘅雙眸中睇到佢嘅認真，對中意沈心怡嘅認真，邱旻顥知道潘景諭唔係玩玩下

「我再追問嘅話，佢會避得更厲害⋯」潘景諭忽然間又講道，雙眸忽然黯淡無光

中意一個人，係甜蜜，亦係苦澀；就算係雙向嘅愛情都可以係苦澀到心深處⋯

喺放學前嘅最後兩堂，係數學孖堂，係最飯氣攻心嘅時候，所以潘景諭已經一直點着頭打盹

沈心怡偷偷地注視着潘景諭，想同潘景諭講啲咩，但又唔知要點開口一樣





「潘景諭！」Miss偶爾見到潘景諭喺度恰眼瞓，立馬就叫潘景諭一聲，「去廁所洗面！」

坐喺潘景諭身後嘅同學見狀，即刻就推咗潘景諭一下，沈心怡稍微坐好望向潘景諭，潘景諭一臉疲倦地打咗個喊露

「眼瞓去廁所洗面！」Miss重複一次啱啱講嘅嘢

潘景諭緩緩地起身，然後行出課室去廁所，難得Miss比時間佢偷懶，佢當然樂意之至；沈心怡嘅視線跟住潘景諭嘅舉動而郁

「派番上次份test比你地，潘景諭嗰份⋯心怡你幫佢對住先。」Miss拎起放喺老師枱上嘅試卷講道

「知道⋯」沈心怡稍微回神，微微點頭

沈心怡喺拎自己份卷時順便拎埋潘景諭嘅test卷，Miss講題時，沈心怡幫潘景諭寫埋答案，秀麗嘅字體同潘景諭潦草嘅字體真係差得好遠，亦好明顯





潘景諭番嚟課室，發現大家都喺度對緊test卷，但自己張枱空空如也

「我份卷⋯」潘景諭回頭望向坐喺佢後面嘅男同學，佢以為自己份卷喺男同學手上

「沈心怡幫你對緊。」男同學朝沈心怡抬一抬下巴示意

「你份卷，前面幾題幫你寫咗答案⋯」沈心怡連忙將份卷比番潘景諭

「唔該。」潘景諭禮貌地同沈心怡講聲唔該，然後接過份卷

一句唔該，沈心怡頓時覺得潘景諭好似拉開緊自己同佢嘅距離一樣，生疏又陌生⋯沈心怡心裏傳嚟陣陣苦澀嘅感覺，苦澀嘅味道喺心臟滲着散開⋯想解釋但冇嘢可以解釋嘅感覺令沈心怡按捺不住地難過

⋯

放學之後，李逸彤同沈心怡兩個女仔打算去銅鑼灣行一陣先再番屋企，再加上李逸彤覺得沈心怡今日好似都有啲心事，心不在焉嘅樣子，大概係因為聽咗馨馨喺廁所講嘅嘢





「你今日好心不在焉⋯」李逸彤嘅聲線裏夾雜住擔憂，「馨馨講嗰啲嘢你真係唔洗理，佢都係妒忌你咋嘛！」

「我知，其實都唔係完全因為馨馨講嘅嘢⋯」沈心怡拎起放喺眼前嘅唇膏sample，喺手背上劃一下試試色

「咁因為啲咩？」李逸彤好奇地問道，當然更多嘅係擔心

沈心怡先係沉默，有啲欲言又止，亦有啲唔知喺邊度講起嘅感覺，喺深呼吸一口後緩緩地開口：「早兩日，阿諭話佢中意我⋯」

「吓！？」李逸彤忍唔住大聲地吓咗一聲，呢個消息嚟得太突然太震驚，完全就係震撼彈一枚，李逸彤覺得自己好似真啲大聲，連忙降低聲量，「咁突然嘅？」

「我都比阿諭嚇親，佢突然間話中意我⋯」沈心怡苦笑道，將手上拎全嘅唇膏放番去架上

「難怪佢地最近都咁嘅反應⋯」李逸彤終於明白點解最近兩人都係尷尷尬尬，李逸彤追問道：「你拒絕咗佢⋯？」





「我又冇真係拒絕⋯應該話，我都未答啲咩，阿諭已經打斷咗我⋯」沈心怡無奈地講道，「佢都冇比我講落去⋯」




IG Link: https://www.instagram.com/nd_cotttoncandy/?hl=zh-tw