［愛情純愛］我地之間嘅友誼純度絕對等於零！！！: 105. 生氣（下）
潘景諭嘅內心嘅情緒夾雜咗太多，佢都唔知要點樣解釋先係，更唔知點樣先可以令自己好過啲
「就算我再主動，沈心怡係唔中意我嘅話就點都唔會中意⋯」潘景諭喺心裏輕嘆一口氣，有啲氣餒嘅感覺，「點解佢次次一遇到呢個問題，就好似要同我劃清界線咁？」
潘景諭都唔明白，沈心怡點解每次都會有咁嘅反應；每當其他人話佢地拍拖嘅時候，沈心怡每次都會一臉認真地否認，再附上一句「我地熟呀嘛」
「我地熟呀嘛」呢句話就好似潘景諭同沈心怡之間嘅一個束縛一樣，係沈心怡立下嘅束縛，亦係呢句說話將佢兩個嘅界線劃得清清楚楚
到底呢句說話，係提醒緊邊個唔好越界⋯？
⋯
Lunchtime嘅時候，四人一同出去食飯，潘景諭同平時一樣同大家講嘢，但只有沈心怡感覺到潘景諭嘅唔一樣
沈心怡安靜地留意着潘景諭嘅舉動，自從上完地理堂之後，潘景諭都冇點同過佢講嘢，就算有都係精簡嘅回答
「點解好似真係我激嬲佢咁⋯？」沈心怡喺心裏無辜地道，「但我又冇做錯啲咩⋯」
沈心怡感覺潘景諭係嬲緊自己，但卻唔明白潘景諭嬲嘅理由，感覺特別委屈，明明自己都冇做錯啲咩
「佢唔會係因為聽到我話我同佢冇可能所以嬲呀⋯」沈心怡又不禁將問題拉到同自己有關連嘅位置，「但我都只係講事實呀⋯做咩嬲我喎⋯」
沈心怡偷瞄潘景諭一眼，淨係睇都睇得出潘景諭嘅低氣壓⋯
「呀⋯」沈心怡嘅手唔小心撞到手邊嘅水杯，水杯中嘅水溢出，「有冇tissue？」
沈心怡抬眼瞄潘景諭一眼，潘景諭一臉嚴肅地將一包紙巾從褲袋拎出嚟拋比沈心怡
李逸彤望咗潘景諭一眼，望向潘景諭嘅眼神裏夾雜着一絲疑惑
「潘景諭做咩呀？」喺食完飯番學校嘅路上，李逸彤湊近沈心怡嘅耳邊細聲地問道
「唔知⋯」沈心怡微微聳肩
四人踏上樓梯番課室，李逸彤快步行上兩級行到邱旻顥嘅身旁
「邱旻顥！」李逸彤拎起手機遞比邱旻顥睇，自然地向邱旻顥搭話，「睇下呢個～」
兩個人自然地行喺前方並肩而行，潘景諭都唔想做大型電燈膽，於是自動地將腳步放慢行喺兩人後方
沈心怡偷瞄潘景諭一眼，潘景諭仍然同平時一樣，只有沈心怡察覺到唔一樣
「唔⋯阿諭可唔可以幫我開⋯」沈心怡將啱啱番學校前喺7仔買嘅嘢飲遞向潘景諭，「個蓋好實我開唔到⋯」
潘景諭瞄一眼沈心怡手上嘅嘢飲，默默地接過將樽蓋扭開
「唔該⋯」沈心怡輕輕抿一下唇，然後伸手拎番枝嘢飲
沈心怡喺心裏默默地嘆一口氣，其實佢本來唔洗擔心啲咩，亦唔需要在意，但偏偏佢見到潘景諭對佢忽然間嘅冷淡，心裏就覺得唔舒服；沈心怡望一眼前方自顧自傾計嘅邱旻顥同李逸彤，又偷望一眼行喺佢旁邊睇手機潘景諭
「唔⋯阿諭你係唔係嬲緊我⋯？」沈心怡怯怯地望向潘景諭問道
「唔係。」潘景諭頓時回答，完全冇經過思考就直接否認，但聲線卻係冷淡的
「你嬲咩呀？」沈心怡無視潘景諭剛才嘅否認問道
潘景諭望向沈心怡，見佢一臉委屈嘅表情，不禁覺得自己真係有啲太任性，佢都冇得嬲⋯畢竟兩個人又真係冇特別嘅關係⋯
「冇⋯」潘景諭嘅態度頓時軟落嚟，「冇嬲啲咩⋯」
李逸彤回頭望沈心怡一眼，佢嘅直覺話佢知，沈心怡心入面對潘景諭或者係有感覺，只係沈心怡唔想講出口
「明明就有嬲⋯」沈心怡細聲地抱怨潘景諭般講道
「你會介意呢啲嘢㗎咩？」潘景諭內心嘅煩躁令佢衝口而出講道
沈心怡頓時一怔，連潘景諭自己都有啲愕然自己會咁講嘢；沈心怡沉默不語，眉頭輕輕一皺，潘景諭冇再講啲咩，選擇咗沉默
潘景諭默默地加快咗腳步，比沈心怡行前咗半個身位，沈心怡望住潘景諭好似要同佢拉開距離般嘅舉動，心裹頓時好似壓咗一塊大石一樣
第一次會感到心臟沉甸甸的⋯就算見到其他暗戀潘景諭嘅女仔走近潘景諭，又或者係見到潘景諭同其他女仔有講有笑都好，沈心怡從未有呢種感覺⋯
「好唔舒服⋯」沈心怡喺心裏講道，胸口被壓到難以呼吸一樣
平日沈心怡總係做嗰個拉開距離嘅人，但今日做出呢個舉動嘅人，係潘景諭
當佢地番到課室後，潘景諭直接行咗去開locker，沈心怡本來想同潘景諭講啲咩，但眼見潘景諭番到埋位一秒都唔夠就轉身行去locker嗰邊，便將想講嘅說話默默地收起
「好似係第一次⋯」沈心怡喺心裏悶悶不樂地講道，佢朝locker嘅方向望去，目光緩緩地落喺潘景諭嘅背影上，「第一次覺得相隔得咁遠⋯」
一直去到放學，潘景諭咩都冇同沈心怡講，悶悶不樂嘅情緒一直喺潘景諭嘅心裏發酵⋯
「我今日有啲唔舒服，我番去先⋯」潘景諭面無表情地講道，指一指另一條路
「哦⋯」李逸彤微微點一點頭，然後同邱旻顯對望咗一眼，「咁你快啲番去休息下啦⋯」
「嗯，得啦。」潘景諭微微點頭，然後抬一抬手，「拜拜。」
「嗯，咁⋯聽日見啦！」李逸彤微微一笑
「聽日見。」邱旻顥講道
沈心怡望向潘景諭，潘景諭對沈心怡抬一抬手講再見，沈心怡若有所思地提手揮兩下
「拜拜⋯」沈心怡緩緩地開口講道
沈心怡轉身就同李逸彤、邱旻顥一齊走，李逸彤望一望沈心怡留意着沈心怡臉上嘅表情；邱旻顥一直耷低頭睇手機；沈心怡微微耷低頭若有所思
IG Link: https://www.instagram.com/nd_cotttoncandy/?hl=zh-tw