［愛情純愛］我地之間嘅友誼純度絕對等於零！！！: 104. 生氣（上）

「彤彤人呢？」沈心怡望向李逸彤嘅座位，卻發現李逸彤唔喺課室

地理堂啱啱結束，大家都執緊嘢準備番執自己嘅班底或自己嘅座位

「邱旻顥，我想問呢度係唔係即係咁？」沈心怡拎住地理書行到邱旻顥嘅座位，「咁樣寫係唔係？」

畢竟邱旻顥同李逸彤坐嘅位置都唔係距離好遠，而且呢個課題，邱旻顥比較拿手

「唔⋯」邱旻顥認真地睇沈心怡寫喺書上嘅解釋同答案，「都啱，但呢度應該要寫埋⋯」





邱旻顥一臉認真地解釋道，啱啱番到自己座位嘅潘景諭見到沈心怡企喺邱旻顥旁邊問嘢，忽然間心裏有啲不悅嘅感覺

「Okay～Thank you～」沈心怡對邱旻顥講道，然後就番埋位

「你啱啱問邱旻顥啲咩？」潘景諭見沈心怡番到埋位，頓時就問沈心怡

「嗯？冇呀，我問佢呢度咁寫啱唔啱咋嘛。」沈心怡將自己嘅地理書遞比潘景諭睇

「哦⋯」潘景諭微微點頭，不過都係有啲小情緒





沈心怡望一望潘景諭，總覺得潘景諭有啲難以言喻嘅違和感⋯

「你啱啱唔喺位嘛⋯」沈心怡不自覺就解釋起嚟，佢都唔知點解自己要解釋，佢又冇做錯啲咩事

「嗯⋯」潘景諭偷瞄沈心怡一眼，然後淡然地點一下頭

「做咩咁冷淡咁嘅突然⋯？」沈心怡嘅內心對潘景諭突然嚟嘅冷淡有啲疑惑

沈心怡帶着滿腦問號坐低喺自己嘅坐位，因為唔知咩事所以偷偷地留意着潘景諭嘅表情；潘景諭眼睛嘅餘光見到沈心怡一直偷望自己，潘景諭瞄一眼後望向沈心怡，目光停留咗一秒都冇就收回視線，起身行出課室





「阿諭心情唔好？」沈心怡感到奇怪，都唔知邊度、邊個、幾時惹到潘景諭，「邊個激嬲佢啦？」

「我發咩脾氣呀到底⋯」行出課室嘅潘景諭喺心裏反省般講道，「只係問個功課！問個功課咋！我發咩脾氣？」

潘景諭煩躁地撥着自己嘅頭髮，佢心裏唔中意呢種感覺，呢種感覺只會令佢覺得自己好小氣⋯

「阿諭到底嬲緊啲咩⋯？」沈心怡仍然思考緊呢個本來無關緊要嘅問題

「你啱啱問邱旻顥啲咩？」

沈心怡諗起啱啱自己一番到埋位時潘景諭嘅提問

「因為我問邱旻顥功課⋯？」沈心怡喺心裏自言自語道，但佢自己咁樣諗完都覺得有啲好笑，「點可能⋯」

沈心怡自己都冇察覺到自己諗緊嘅問題反映出啲咩，就算沈心怡冇明顯地表現出嚟，但心入面都係在意潘景諭嘅想法





「阿諭又點會因為我同邱旻顥講兩句而嬲⋯」沈心怡喺心裏輕鬆嘅語氣夾雜着一絲失落，「我又唔係邊個⋯」

「心怡～我想問你知唔知陣間LS堂要帶咩？」有兩個女同學手拖手咁行到沈心怡嘅座位前問道，「上堂阿sir有冇講？係唔係話要帶嗰疊勁厚嘅note？」

「係呀～唔洗帶書，淨係帶note。」沈心怡微微點頭

「心怡心怡～」其中一個梳着低馬尾嘅女同學叫咗沈心怡兩聲，然後用一臉好奇又期待嘅表情望住沈心怡，「你係唔係同潘景諭拍緊拖呀？」

「吓⋯？點解⋯咁問嘅？」沈心怡有啲比佢剎一個措手不及嘅感覺，笑容僵咗一下後問道

「嗰日我地兩個見到你同潘景諭一齊，夜晚，上星期⋯三定唔知四～」梳着低馬尾嘅女同學指一指企喺佢旁邊短髮嘅女仔，「你兩個一齊食飯，勁close勁sweet咁～」

潘景諭出去行咗個圈，感覺好咗少少，佢番入課室時，沈心怡都冇見到佢，因為兩個女仔企喺沈心怡嘅座位前，剛好擋住門口嘅方向





「我地的確有一齊食飯，但我地唔係拍緊拖⋯」沈心怡嘅內心有啲尷尬，但都係微笑着回答，同平時無異

「真係？」短髮嘅女仔嘅聲線係滿滿嘅不信任，佢瞇起眼笑問沈心怡，「心怡你唔好講大話啵～我地唔係中意佢，你唔洗驚喎～」

「我冇驚呀～」沈心怡笑了笑道，佢都冇留意到潘景諭離佢地唔遠，佢地嘅對話潘景諭都聽到了

雖然兩個女仔問嘅聲量唔係好大，但亦稱唔上細聲，但潘景諭已經行到離佢地只有兩個座位嘅距離，要聽到都唔係難事，但潘景諭卻裝作自己冇聽到任何嘢

「但我真係冇同佢拍拖。」沈心怡一臉認真地講道，然後仲要一臉堅定地再講多次：「真係冇。」

「真係？你地會唔會好似李逸彤同邱旻顥咁？」梳着低馬尾嘅女仔問道，佢嘅表情完全表達出佢就係唔信沈心怡

「點可能～」沈心怡笑了笑，「我同佢點可能？真係冇拍拖！我地只係熟。」

沈心怡剛剛講完，潘景諭就坐低喺自己嘅座位，一股低氣壓頓時從沈心怡嘅旁邊散發出嚟





兩個女仔都感覺到有啲唔妥嘅感覺，短髮嘅女仔先察覺到潘景諭就坐咗喺度，伸手撞一撞梳着低馬尾嘅女仔

「陣間LS堂帶齊嘢啦你地⋯」沈心怡連忙笑着講道

「好呀～唔該心怡～」短髮嘅女仔講道

兩個女仔連忙手拖手行開，行去locker嘅方向；沈心怡朝潘景諭望一眼，潘景諭若無其事地坐喺位低頭睇手機，但散發出嚟嘅感覺卻係一股令人有壓逼感嘅低氣壓

「尷尬啦今次⋯」沈心怡喺心裏苦惱地講道，感覺自己好似做咗啲咩事成為大罪人一樣，因為用眼睇都睇到潘景諭嘅不悅

啱啱沈心怡同兩個女仔嘅對話，潘景諭都聽到晒，但佢在意嘅、令佢不悅嘅係沈心怡嘅堅決否認

沈心怡一直嘅堅決否認令潘景諭聽到好唔舒服





「就算我地真係唔係拍緊拖，都唔洗咁樣堅決否認呀⋯」潘景諭喺心裏問道，心臟就喺沈心怡否認嘅瞬間都揪成一團

中意一個人，就係會一直有好多無法控制嘅小情緒，令人心情時好時壞，但正正因為在意，所以先會無法控制

「沈心怡嘅唔中意都太明顯啦掛⋯」潘景諭不禁苦笑，佢忽然間成為最冇自信嘅人一樣

「啱啱我冇得揀⋯除咗否認之外就係否認⋯」沈心怡喺心入面解釋道，「我冇得揀承認，我同阿諭根本就冇一齊，阿諭根本⋯都唔可能係中意我嘛⋯」




IG Link: https://www.instagram.com/nd_cotttoncandy/?hl=zh-tw