［愛情純愛］我地之間嘅友誼純度絕對等於零！！！: 100. 她不一樣
「做朋友都可以，男女朋友就唔太好⋯」沈心怡講出呢句說話時，自己都覺得有啲講緊反話、掩住良心講嘅感覺，「以前已經有因為我同阿諭太熟所以比啲女仔講閒話又bully我咁⋯」
以前初中嘅時候就已經試過幾次，因為沈心怡同潘景諭太熟，搞到其他女仔妒忌心起，講完閒話仲要杯葛沈心怡
沈心怡從此以後就怕咗同潘景諭行得太埋，只因為行得太埋會比人講閒話
「但你宜家又好似同潘景諭行得好埋。」李逸彤一臉困惑
「宜家又冇咩所謂，又唔係得我同阿諭一齊⋯」沈心怡聳聳肩，「你同邱旻顥都喺度呀～而且大家會比較在意你同邱旻顥係唔係拍緊拖。」
「你搵我同邱旻顥做擋戰牌？」李逸彤無奈地笑了一笑
「又唔係嘅～只係你同邱旻顥嘅關係大家比較感興趣啫～」沈心怡講道，「我同阿諭大家都知我地⋯真係只係熟。」
沈心怡努力地笑着，明明心入面都唔係咁諗，但卻好自然地講出呢番違背自己嘅心嘅說話
「你同邱旻顥遲早都會一齊㗎啦～」沈心怡自然地將話題轉移
「都唔一定嘅～可能佢唔想同我一齊呢～」李逸彤笑道，「可能佢都係玩下啫～」
「佢都唔係啲咁嘅人⋯！」沈心怡愕一愕然，「我諗可能佢都係想同你一齊嘅。」
「唔知呀～猜測太多只會徒添煩惱。」李逸彤搖搖頭，「所以唔諗啦～順其自然啦！」
「都曖昧咗一段時間啦～我覺得佢中意你呢樣嘢都幾明顯嘅～」沈心怡食一啖蛋糕，飲一啖特飲
「唉～睇嚟潘景諭要追到心怡，真係都有一定難度啦⋯」李逸彤喺心裏慨嘆道
李逸彤眼睛嘅餘光見到手機嘅螢幕一亮，急不及待地拎起手機
邱旻顥：食咩蛋糕咁開心？
李逸彤嘅嘴角不禁揚起，眼睛都因為笑而彎彎的：「伯爵茶蛋糕～」
邱旻顥：為食少陣啦李逸彤
「我食個蛋糕又為食？」李逸彤無奈地回覆問道
沈心怡安靜地留意着李逸彤嘅表情變化，望到佢嘅笑容都知道應該係邱旻顥搵佢
沈心怡瞄一眼自己嘅手機，望住咩都冇嘅notice board，沈心怡就喺心裏輕嘆一口氣，潘景諭都冇搵自己
「唉⋯我真係矛盾⋯」沈心怡喺心裏講道，「我真係過分⋯」
沈心怡自己都知道自己真係講一套做一套，口講着同潘景諭唔會一齊，但內心又會期待潘景諭嘅主動；沈心怡拎起手機，望住一直冇message彈出嚟嘅鎖屏，心裹空落落的
「點呀？你叫我嚟打機定睇你同李逸彤message傳情？」潘景諭拎起手制，瞄咗邱旻顥嘅手機一眼
「都未load好。」邱旻顥瞄一眼電視螢幕，見到隻game仲load緊又再次耷低頭，「你唔搵沈心怡？你唔係中意人咩？」
「係⋯」潘景諭耷低頭望住手制默默地講道，「太主動又怕佢避開我，唔主動又怕佢中意第二個⋯」
邱旻顥聽到潘景諭咁樣講不禁一愣，好少會見到一個冇自信又在意嘅潘景諭
潘景諭對女仔不嬲都係唔會特別主動，人地追佢主動搵佢，潘景諭都一副愛理不理嘅狀態，覆唔覆機全睇心情，就算覆都係一句起兩句止
邱旻顥望一望坐喺佢隔離嘅潘景諭，感覺潘景諭成個人都變咗，一提起沈心怡，潘景諭就會有啲唔知點算一樣
「我又唔可以問沈心怡中意邊個之類，佢知我中意佢嘅話，一定會同我拉開距離⋯」潘景諭輕嘆一口氣，仰頭靠喺梳化嘅頭枕上，「唉⋯」
「你一定唔係潘景諭，你係邊個？」邱旻顥輕皺着眉頭，一臉懷疑嘅表情望住潘景諭
「痴線講緊咩⋯」潘景諭坐好起嚟
「我識嘅潘景諭絕對唔會為咗女仔而冇自信，你一定唔係潘景諭。」邱旻顥一臉認真地開玩笑道
潘景諭一直都係被追求嘅一個，一個出眾嘅外面加上成日比女仔表白，令潘景諭對自己都幾有自信
沈心怡講嘅都唔係全錯，潘景諭的確喺某程度上有啲自戀，但畢竟外表都係一種本錢嚟
但再靚仔帥氣嘅人、再多女仔追嘅人，都會有碰釘嘅一日，話比佢地知外表唔係可以將自己完全「攻略」嘅因素
「好難呀⋯」潘景諭又嘆一口氣道
「成日都比人追，係時候追人啦潘景諭！你都有今日啦～」邱旻顥笑道，「我真係佩服沈心怡，可以令我地嘅萬人迷潘景諭露出一個咁冇自信嘅表情。」
「沈心怡同其他人都唔同⋯」潘景諭偷瞄手機一眼，明明知道沈心怡唔會主動搵自己，但潘景諭都係忍唔住想期待一下
「係唔係因為你追唔到佢，所以你先會咁⋯？」邱旻顥嘅腦內不禁產生一個問題令佢有啲疑惑，「嗰種征服唔到佢嘅感覺令你難受？」
邱旻顥咁樣一問，潘景諭便安靜咗落嚟沉思，自己真係因為沈心怡難追所以先會中意？
「唔係⋯」潘景諭沉思咗兩秒後認真地方回答道，「真係中意，唔係因為征服感之類嘅渣男原因。」
潘景諭肯定嘅回答，確定咗沈心怡喺佢心裏佔一席位，肯定咗佢對沈心怡嘅感覺唔係一時興起，唔係因為得唔到所以更想要⋯係真係中意所以先中意
「好中意？」邱旻顥笑了笑追問道，「去追。」
「係，好中意。」潘景諭認真地講道，「追緊。」
邱旻顥見隻game load完便放低手機拎起手制，聽日都已經係星期五，所以今日打陣機都唔係一件好嚴重嘅事，至少有兩日可以做功課
「你就好，日日都同李逸彤咁樣傾計，我都想沈心怡咁樣咩都同我分享⋯」潘景諭忽然間講道，「不過沈心怡一定唔會⋯」
「咁你主動啲囉。」邱旻顥望住電視螢幕，手拎住手制㩒，「又冇人唔批准你咁做。」
「我已經好主動，我怕我再主動，沈心怡真係會避開我⋯」潘景諭無奈地講道
IG Link: https://www.instagram.com/nd_cotttoncandy/?hl=zh-tw