［愛情純愛］我地之間嘅友誼純度絕對等於零！！！: 99. 未必會

「可能我始終唔想做先開口嗰個啦～」李逸彤輕輕一笑，托着下巴講道，「感覺如果我先開口，好似我好想同佢一齊一樣⋯」

「你覺得如果做先開口嗰個，最後會不被珍惜？」沈心怡問道

「又唔會係不被珍惜嘅⋯我又冇拍過拖。」李逸彤講道，「只係⋯宜家想一齊，但我唔想做開口表白嗰個。」

「邱旻顥幾好呀～佢份人好細心，好識照顧人。」沈心怡認真地講道，「你同佢都好襯呀～」

「多謝喎～我都覺得我同佢幾襯～」李逸彤笑了笑，臉頰泛起淡淡嘅紅霞，「如果佢都想一齊，我覺得佢會開口同我講。」





沈心怡望住李逸彤嘅笑容，就睇得出李逸彤係期待同邱旻顥一齊；沈心怡若有所思地微微耷低頭望住眼前嘅玻璃杯，用指尖喺玻璃杯上畫咗個笑哈哈

「不過我媽應該唔會想我咁快拍拖，下年就考DSE啦⋯」李逸彤一手托着腮，一手拎起甜品叉

「你嘅成績又冇跟唔到，拍拖同讀書你可以分得開咪得。」沈心怡食一啖蛋糕，甜度剛好

「唔知呀～咁同邱旻顥一齊係開心嘅～」李逸彤微微一笑講道，「心怡呢？最近見你成日都同潘景諭一齊咁。」

「有咩？都唔係呀⋯」沈心怡微微一笑，用最自然嘅笑容回答道，「都係同大家一齊咋嘛～」





「你有冇諗過如果有一日潘景諭中意你嘅話會點？」李逸彤出於好奇心問道

「吓⋯？唔⋯應該唔會有呢一日⋯」沈心怡稍微一怔後微微一笑講道

李逸彤一提起潘景諭，沈心怡就好似渾身唔自在一樣，手下意識就拎起特飲輕呷一啖，然後微微挺直腰坐

「你又知？世上邊有咁多純友誼㗎～」李逸彤開玩笑般講道，實際上知道潘景諭心思嘅佢，呢一刻想窺探一下沈心怡嘅想法，「佢唔好咩？」

「你講邊方面？」沈心怡笑了笑問道





「Overall。」李逸彤道，佢定睛望住沈心怡，心裏好奇沈心怡會點答

「唔⋯都⋯幾好？」沈心怡遲疑地回答道，明明只係一個好簡單嘅問題，但沈心怡回答起嚟時，卻好似答緊啲天大嘅難題一樣，「都Okay⋯」

「講到好似你兩個一啲都唔熟咁⋯！」李逸彤不禁一笑，「真心問，你覺得潘景諭唔好咩？」

「都唔係唔好嘅～佢咁多人追就知佢好啦～」沈心怡講出真心話，「唔⋯生得好睇、性格又好，可能因為以前開始就多人中意佢，所以佢有啲自戀囉⋯」

沈心怡真係認真咁回答令李逸彤有少少意外，李逸彤拎起手機，為啱啱送嚟嘅蛋糕影咗張相

「朋友嚟講，我又唔會話覺得佢唔好⋯佢有時會有啲令人好不知所措嘅舉動，但我唔會話討厭佢⋯」沈心怡微微耷低頭，雙手扶住裝住蜜桃特飲嘅玻璃杯，「我覺得我同佢係熟，但我唔係真係好似大家想像中咁了解咁清楚佢⋯唔似你同邱旻顥。」

沈心怡諗起潘景諭對佢講過同做過嘅事，佢會好奇潘景諭呢啲舉動背後嘅意思，但又唔敢多諗

「咁我又唔係一嚟就了解邱旻顥，都係大家成日傾計成日分享，我先會慢慢了解佢㗎嘛～」李逸彤笑了笑道，「如果邱旻顥咩都唔同我講，我都唔會了解佢點諗呀～有時就係要我又分享下，逐少逐少咁講比佢知我中意啲咩，唔中意啲咩㗎嘛～」





「所以話，我同潘景諭唔似你同邱旻顥，你同邱旻顥係曖昧係熟、會成日私下出街傾計；但我同阿諭私下好少會講好多嘢，所以我冇大家想像中咁了解佢。」沈心怡下意識偷瞄一眼螢幕，指尖輕敲螢幕兩下

「咁番番去啱啱嘅問題，如果有一日潘景諭中意你嘅話會點？」李逸彤好奇地問道，「假設性問題，你會同佢一齊定唔同佢一齊？如果邱旻顥話同我一齊，我一定會應承佢⋯！」

「唔⋯」沈心怡嘅心臟一縮，佢一直都唔敢去諗嘅問題比李逸彤直接拎出嚟放到佢面前，「我諗⋯」

李逸彤見到沈心怡好認真咁諗嘅模樣，不禁連自己都咬着牙肉緊張起嚟，佢好想知沈心怡會點樣答、點樣揀；不過對佢嚟講，若然邱旻顥開口同佢提出拍拖，李逸彤一定會開心到一星期都瞓唔著，發夢都會笑醒

不過話說回來，潘景諭嘅心思，李逸彤已經知道，就差在沈心怡嘅想法

「未⋯必⋯會⋯」沈心怡思考咗一陣之後苦笑道，李逸彤對於呢個回答，無疑係感到愕然

「點解呀？」李逸彤忍唔住追問原因，「潘景諭喎！靚仔一個喎！未必會！？」





「佢太受女仔注目、太受歡迎⋯會好大壓力⋯」沈心怡擠出笑容假裝自然地回答道，「你諗下如果你同邱旻顥一齊，但邱旻顥有勁多個女仔中意，情人節收朱古力都收到手軟⋯放眼望去有幾廿個女仔同你爭仔咁⋯諗下都好攰⋯」

沈心怡講嘅都係佢真心話嘅一部分，本來喺潘景諭身邊，成為「同潘景諭最熟嘅女仔」呢件事已經為沈心怡帶嚟好多不必要嘅麻煩：由聖誕卡、生日卡，到情書、朱古力、曲奇餅⋯幾乎都到過沈心怡嘅手上，叫佢幫手轉交，因為佢係同潘景諭最熟嘅女仔

「你知啦⋯我本來都唔中意咁引人注目⋯」沈心怡淡然地講道，手拎住飲管輕輕地攪拌着嘢飲，特飲都成了一個小小嘅漩渦，「就連企喺台上面攞獎，我都會周身唔自在⋯」

李逸彤識咗沈心怡好一段時間，佢都知道沈心怡係咩人，所以當初先會對潘景諭講要沈心怡同佢一齊好難；但李逸彤諗深一層，若然邱旻顥超受歡迎，自己同邱旻顥一齊都會覺得不安亦會擔心，一定會覺得行到邊都係情敵

「而且中意佢嗰啲女仔，一定會嚟找我麻煩⋯」沈心怡輕嘆一口氣，「上次馨馨因為曲奇餅嘅事就嬲咗我啦⋯！」

「噗⋯！」李逸彤笑咗出嚟，「馨馨咩性格呀～佢份人不嬲都小氣！唔好話佢冇膽親自比潘景諭先要搵你幫手？」

「上次馨馨嬲咗我成個星期，我超無辜囉！」沈心怡一臉委屈地扁着嘴講道，「又唔見佢嬲阿諭⋯！明明係阿諭唔要佢啲曲奇餅⋯！都唔關我事嘅！」

「咁又真係幾冤枉嘅～」李逸彤笑道，「但佢中意潘景諭，佢又唔會嬲潘景諭，咁當然係嬲你啦～」








IG Link: https://www.instagram.com/nd_cotttoncandy/?hl=zh-tw