［愛情純愛］我地之間嘅友誼純度絕對等於零！！！: 91. 與誰有約？

「好凍！」李逸彤隨便搵咗個借口當作拖手嘅理由，「最衰就係你，突然間縮手⋯」

「好凍咩？」邱旻顥怔了一怔後輕輕一笑問道，心裏笑了笑：「明明隻手好暖⋯」

「凍呀～」李逸彤講道，微微側着頭望住邱旻顥講道，「而且要拖實女朋友先可以㗎嘛～貴重物品跟身。」

「噗⋯！」邱旻顥不禁一笑，「講到好似真係我女朋友咁喎～」

李逸彤笑而不語，佢都唔知自己哪來嘅勇氣伸手拖住邱旻顥，只覺得當刻好想伸手拖住邱旻顥，如果唔係都唔知幾時再有咁嘅勇氣





「你話陣間比人睇到點算？」邱旻顥從容地問道

「唔知呀⋯」李逸彤微微低着頭，佢唔想去諗呢個問題，因為人地睇到又好點都好，只有佢地自己知道發生緊咩事，「都冇得點嘅⋯」

邱旻顥嘅手稍微鬆咗少少，李逸彤心裏有啲緊張，下意識地連忙握一下邱旻顥嘅手

李逸彤唔敢用力握緊邱旻顥嘅手，但亦唔想鬆開；邱旻顥嘅心裏有種想要結束呢份曖昧關係嘅感覺

「你⋯其實有冇聽到佢地講咩，PE堂你經過嘅時候⋯」邱旻顥忍唔住開口問李逸彤，道出佢心中嘅疑惑同好奇





佢想知道李逸彤係因為冇聽到而唔小心承認自己係佢女朋友，定係其實佢聽到，係故意承認

「做咩咁問？」李逸彤估到邱旻顥嘅用意，佢自己亦蠢唔晒，唔會直接就回答

「冇，只係好奇。」邱旻顥搖搖頭，臉上掛上淡淡嘅笑容

「我有聽到。」李逸彤笑着從容地回答嘅同時將邱旻顥嘅手鬆開，「佢地講得咁大聲～點會聽唔到？」

「你聽到都照認？」邱旻顥笑一笑問道





「反正我地點唔認都好，佢地都會一直話我地係一齊咗呀～」李逸彤毫不介意地聳肩，係唔介意同時習以為常，「所以冇咩所謂。」

「咁樣嘅關係⋯到底要到幾時⋯？」邱旻顥望李逸彤一眼後喺心裏講道，「我期待緊啲咩⋯」

邱旻顥有時都唔知道自己到底想點，但有時明明佢知道自己期待緊啲咩，但卻會扮咩都唔知一樣

「我其實⋯都期待有同佢一齊嘅一日⋯」李逸彤喺心裏講道，聲線中夾雜着一絲期待所帶嚟嘅愉悅

⋯

星期六

李逸彤跟據約定好嘅時間落到樓下，喺佢推開大堂嘅玻璃門後，就見到邱旻顥企咗喺一旁等緊佢

「喂！」李逸彤心情有少許激動，佢小跑到邱旻顥嘅面前，「你到咗好耐呀？」





「唔係，一陣啫都係。」邱旻顥微微一笑講道，佢將李逸彤上下打量一番，「你冇帶遮呀？落緊雨喎。」

外面落緊密密麻麻嘅細雨，因為落雨加上夜晚嘅關係，本想稍有回暖跡象嘅天氣好似又變得寒冷起嚟

「你有帶嘛～」李逸彤指住邱旻顥手上拎住嘅遮，「我知你一定會帶，所以我先唔帶㗎～」

「嘩咁叻呀？」邱旻顥無奈一笑，直接就轉身行，「咁都比你估到呀？」

「我了解你嘛～」李逸彤連忙跟上邱旻顥嘅步伐，對邱旻顥甜甜一笑道

「睇唔出你咁了解我喎～」邱旻顥不禁一笑

喺踏出有瓦遮頭嘅地方前，邱旻顥先打開遮，稍微將腳步收細等埋李逸彤；李逸彤兩步行到邱旻顥嘅旁邊，緊貼佢嘅身旁





「嘻⋯」李逸彤笑了笑，邱旻顥稍微瞄佢一眼

「笑咩？」邱旻顥問道

「想笑就笑～」李逸彤笑道，伸手輕輕地拉住邱旻顥嘅衫角

喺屋企嘅沈心怡望住窗外，偶爾會有將滴雨水打喺窗上

沈心怡拎起手機幫窗戶影咗張相po喺story：「Raining」

正當沈心怡po完story，將手機放低喺旁邊嘅梳化扶手上時，手機螢幕一亮

潘景諭：我呢邊好大雨

「點解兩邊會唔一樣？？？」沈心怡回覆道





潘景諭又send多咗張相過嚟比沈心怡

「都唔係好大雨啫」沈心怡回覆道

最近放咗學之後，兩人喺線上傾計嘅時間都明顯地多咗，偶爾都會講下功課嘅嘢，有時講下其他無聊嘢，感覺⋯好似又親近咗啲一樣⋯

潘景諭：我做晒功課啦已經

「今日居然咁快？」沈心怡有啲意外，平時潘景諭一定等到星期日先做

潘景諭：想快啲做完功課，聽日約咗人

「約咗邊個⋯？」沈心怡心裏有啲好奇，「阿諭竟然會約人？」





沈心怡有啲猶疑應唔應該問潘景諭約咗邊個，但就算潘景諭講比佢知，佢都係得個知字

「佢會唔會約咗女仔⋯？」沈心怡更好奇，想問但又猶疑應唔應該問，「就算佢真係約咗女仔，都唔關我事⋯但阿諭應該唔會約女仔出街掛⋯」

潘景諭望住一直都冇新message嘅對話框，內心開始緊張起嚟；正當潘景諭打算send多個message過去時，沈心怡就回覆了

「約咗邊個？邱旻顥？」沈心怡問道

喺等待潘景諭嘅回覆期間，沈心怡嘅心臟緊張地噗噗跳，好想知道到底潘景諭約咗邊個，係男定女

潘景諭：約咗張床，聽日要休息

沈心怡見到潘景諭嘅回覆，覺得無奈又好笑，都唔知自己擔心緊啲咩




IG Link: https://www.instagram.com/nd_cotttoncandy/?hl=zh-tw