［愛情純愛］我地之間嘅友誼純度絕對等於零！！！: 90. 自認

邱旻顥嘅耳根都紅咗一半，嘴角微微上揚，但又唔敢笑得太明顯

「又話冇拍拖～」其他男仔即刻就窒邱旻顥，「又扮嘢～一齊咗幾耐呀？咁秘密？」

「冇一齊囉！」邱旻顥怕咗佢地，直接將手上嘅波掉番比佢地示意繼續

邱旻顥回頭望咗通去洗手間嘅走廊一眼，心裏滿是愕然同小激動，李逸彤真係毫不忌諱地承認

放學之後，邱旻顥一行出更衣室就見到行緊去小食部嘅李逸彤





「喂！」邱旻顥行上前伸手搭住李逸彤嘅膊頭，「去邊呀女朋友？」

「邊個係你女朋友？」李逸彤輕輕一笑，微微側着頭望住邱旻顥

「唔係你咩？」邱旻顥微笑問道，「你啱啱唔係都認咗㗎咩？」

「有咩？」李逸彤裝作思考，然後望一望邱旻顥，「唔覺呀～」

「隨便你啦～」邱旻顥聳聳肩，「反正大家都會覺得我地係一pair～」





「你好想同我係一pair咩？」李逸彤笑了一笑，看似從容嘅表情下係緊張嘅心

兩人行到去小食部，等埋潘景諭同沈心怡先再一齊走

「我又冇特別想同邊個一pair喎～」邱旻顥行到一旁嘅柱前等着

「哦好囉～」李逸彤嘅語氣中夾雜咗一絲唔明顯嘅失落，因為中意，所以先會有期待

邱旻顥悄悄地望向李逸彤嘅側面，李逸彤先唔會知道，啱啱李逸彤冇否認係佢女朋友嘅時候，佢嘅內心有幾激動⋯





邱旻顥就係一個唔會將所以感情都掛喺嘴邊嘅人，就算係對李逸彤嘅感情都一樣

「邱旻顥⋯」李逸彤忽然間叫咗邱旻顥一聲，聲量唔太大，比起平日李逸彤嘅正常聲線再低啲

李逸彤微微耷低頭嘅同時，邱旻顥望向佢，李逸彤卻安靜落嚟冇再講嘢

「嗯？」邱旻顥疑惑地側着頭望住李逸彤

陽光嘅光線剛好打喺李逸彤嘅旁邊，邱旻顥安靜地望住李逸彤，企喺李逸彤嘅身旁，望住李逸彤嘅側面

就好似佢地嗰次偶然嘅相遇一樣，同樣地望住李逸彤嘅側面，望住佢扶住佢嘅嫲嫲，望住佢微笑起嚟嘅模樣

感覺一切都太剛好，好似係注定一樣，去到嗰一刻先令兩人真正咁相遇，成為佢地之間嘅故事開端

「就係想叫你⋯」李逸彤沉默咗一陣後忽然開口，佢望一望邱旻顥，對邱旻顥微微一笑





有啲愣住嘅邱旻顥望住面帶微笑嘅李逸彤，心動嘅感覺好似有一個特定嘅理由，但亦好似唔需要任何理由

去到地鐵站嘅時候，沈心怡話唔同佢地一齊走住，想買啲嘢再番去，潘景諭自然唔會跟佢地走，最終只剩低佢地兩人

李逸彤坐低喺座位上，裝住校服嘅袋放喺大腿上，雙眼有啲疲倦

「攰？恰一陣？」邱旻顥下意識就柔聲問道

「嗯⋯」李逸彤微微點頭，然後合起雙眼打盹

邱旻顥偷望李逸彤一眼，默默地坐直個人；本來一直點頭打盹嘅李逸彤喺一下彷彿失去咗重心一樣嘅點頭後醒嚟

李逸彤望一望周圍發一下呆，然後自然地側着頭往邱旻顥嘅膊頭上靠；邱旻顥感覺到一下重力落喺佢右邊膊頭上





「瞓着咗啦⋯？靠得好舒服⋯」邱旻顥上身微微前傾望向李逸彤時喺心裏道，嘴角微微上揚

「唔好郁嚟郁去⋯」李逸彤輕皺起眉頭，用疲倦嘅聲線細聲地講道

「嗯⋯」邱旻顥坐番好個人，等李逸彤靠得舒服啲

李逸彤合着雙眼，看似平靜嘅表面，心裏早就掀起波濤洶湧嘅海浪，佢都想讚自己嘅勇氣

「心跳好快⋯」李逸彤喺心裏講嘅同時，感受着自己嘅心跳

當地鐵駛到佢地要落車嘅站時，邱旻顥伸手輕輕地拍一拍李逸彤嘅手

「落車啦。」邱旻顥柔聲道

「嗯⋯」李逸彤緩緩睜開眼、微微點頭，然後坐好





李逸彤起身行到門前，邱旻顥微微側着頭望住佢

「未到站呀女朋友，趕住去邊？」邱旻顥伸手喺李逸彤嘅面前晃兩晃

「邊個係你女朋友⋯？」李逸彤揉揉眼，一個未瞓醒嘅樣

「你囉。」邱旻顥若無其事地回答道

「呿⋯你連拖我隻手都唔敢，仲話女朋友⋯！」李逸彤望一望邱旻顥，無奈地反一下白眼

「聽起嚟好似暗示緊啲咩咁⋯」邱旻顥喺心裏道，佢垂眼望向李逸彤嘅手，心裏有啲掙扎、有啲猶疑

「死蠢⋯連咁明顯嘅暗示都唔get⋯」李逸彤喺心裏暗暗講道，佢都要比邱旻顥嘅遲鈍激死，「比咁大個機會你都⋯！」





李逸彤不禁瞪大眼一怔，本來平穩嘅呼吸慢慢變得淺促，邱旻顥真係一下子拖住佢；李逸彤望向邱旻顥，見到邱旻顥淡紅嘅耳根，臉頰都染到紅霞

「我冇話我唔敢～」邱旻顥等自己稍微冷靜落嚟後講道，然後望向李逸彤笑了笑，「怕你唔敢啫～」

李逸彤遲疑地輕輕回握邱旻顥嘅手，邱旻顥定睛地望住李逸彤，邱旻顥喺呢段關係中踏出咗一大步

邱旻顥忽然沉默，然後鬆開李逸彤嘅手；李逸彤輕皺起眉頭，抬頭望一望邱旻顥，又望一望自己嘅手

溫暖同心動嘅感覺一下子變成咗冰冷同疑惑，李逸彤唔明白邱旻顥嘅舉動嘅意思

「我太衝動啦⋯」邱旻顥喺心裏反省般講道，「唔應該咁衝動⋯」

正當邱旻顥喺度「反省」嘅同時，李逸彤伸手拖住邱旻顥嘅手，主動地拖住邱旻顥




IG Link: https://www.instagram.com/nd_cotttoncandy/?hl=zh-tw