［愛情純愛］我地之間嘅友誼純度絕對等於零！！！: 63. 突破口

李逸彤：做咩呀？你中意心怡呀？

「有人呷醋啦⋯」邱旻顥嘅心裏有一絲甜意閃過，回覆李逸彤道：「唔係囉，我又冇話我係中意佢」

李逸彤：我仲以為你會中意心怡添

「咁又真係中意嘅～」邱旻顥調皮地回覆道，佢完全就係故意要睇李逸彤嘅反應

拎住手機嘅李逸彤頓時不滿地皺起眉頭，雖然佢唔相信邱旻顥講緊嘅係事實，但佢都係在意，好在意！





明明知道邱旻顥唔係講真，但卻完全笑唔出⋯中意一個人，本來就係一件又小氣又自私嘅事嚟

「就算係中意都係朋友嗰種囉」邱旻顥見李逸彤冇打字，好似時間停頓咗一樣，立即就回覆解釋

呢一刻嘅邱旻顥有啲失落自己唔喺李逸彤身邊，睇唔到佢呢一刻嘅反應同表情

「唔係就最好啦～」李逸彤臉帶着甜甜嘅微笑喺心裏講道，然後雙手捉住手機，緊閉雙眼道：「邱旻顥你唔可以中意心怡⋯！」

李逸彤單起眼睜開一隻眼望住手機螢幕，佢望住邱旻顥输入中時，心裏格外高興，對於下一個訊息嘅內容期待又好奇，喺等待時卻又會不禁緊張地嚟





李逸彤：我一定會幫心怡把關！唔會比人傷害心怡～

「咁潘景諭點算？」邱旻顥望住李逸彤嘅回覆不禁細聲地笑道，「哎呀潘景諭～你點追沈心怡呀～」

李逸彤：心怡太好啦～點算？好似個個都配唔起我心怡

「睇嚟中意沈心怡嗰個係你」邱旻顥回覆道，「成日提住沈心怡嗰個係你」

李逸彤嘅腦袋一轉，諗緊要點樣答邱旻顥呢個問題好；李逸彤當然中意沈心怡，兩人係好親近嘅朋友，但李逸彤都中意邱旻顥，朋友嘅中意又好，愛情嘅中意都好





李逸彤：唔中意心怡中意邊個？中意你？

李逸彤喺寫呢個回覆嘅時候，臉上一直掛着笑容，同中意嘅人講嘢嗰陣，笑容真係藏唔住

「唔介意」邱旻顥一個簡短嘅回覆，已經可以令李逸彤有心花怒放嘅感覺

邱旻顥嘅目光總會自然而然地落喺李逸彤嘅身上，李逸彤一直都會喺佢目光所及嘅位置一樣，或者係因為中意，所以先會咁樣令對方一直喺自己嘅視線範圍內

「邱旻顥你仲唔係中意我⋯！？」李逸彤拎住手機興奮地講道，好似搵到邱旻顥對自己嘅感覺嘅破綻一樣，「比我發現啦～」

此時，將沈心怡送到番屋企嘅潘景諭終於可以回覆邱旻顥：

「我地係朋友嘛，李逸彤嗰關應該都易過嘅」

「而且沈心怡點諗先係重點」





邱旻顥收到潘景諭嘅回覆，佢當然唔會話比李逸彤知潘景諭嘅呢個秘密，但佢既然知情，都會好奇一下

「咁佢係唔係中意你？」

潘景諭：點知，睇佢唔透⋯

潘景諭：唔get呀！

「如果沈心怡嘅心思咁易估就好⋯」潘景諭喺心裏無奈地輕嘆一口氣，然後send咗個message比沈心怡：「入到屋企門口未？」

明明潘景諭只係啱啱離開沈心怡住嘅屋苑範圍，就已經擔心沈心怡係唔係平安咁踏入屋企門口

「唉⋯」潘景諭望住對話框輕嘆一口氣，「可能連佢都估唔到我會中意佢⋯」





沈心怡：番到啦

手機一震、螢幕一亮，潘景諭見到係沈心怡嘅message，雙眼一下就明亮起嚟

「Okay！下次小心啲啦，又整親就唔好啦」潘景諭回覆道

沈心怡：收到！

⋯

比啱啱嘅李逸彤一手掉到床上嘅手機響起嚟，睇緊YouTube嘅李逸彤側身靠到床上拎起震動中嘅電話，一將電話翻過嚟就見到係邱旻顥嘅電話來電

「嘻⋯」李逸彤望住螢幕甜甜一笑，然後拎起手機，將手機放到耳邊，「喂？搵我咩事呀？」

「十萬火急呀！你做咩唔聽電話？」邱旻顥嘅聲線裹係滿滿嘅焦急





「有咩咁急呀⋯」李逸彤無奈地問道，「我咪聽咗你電話囉⋯」

「你做咗網上嗰份英文未？」邱旻顥頓時問道，隔住7層樓都感覺到佢嘅著急

「做咗啦～你未做咩？」李逸彤悠悠閑地講道，然後拉開書枱前嘅櫈坐低，「9點就deadline啦喎。」

「咁你仲講！？快啲讀答案比我聽！」邱旻顥抬頭望一望時鐘，宜家嘅時間係8點47分，「趕唔切啦！」

「得嗰十幾題MC都唔做⋯！」李逸彤不禁加快動作開番自己嘅account，睇番自己嘅答題記錄

「快啲啦！真係趕唔切啦！」邱旻顥緊張地道

「得得得！」李逸彤連忙㩒開答題記錄，「C、B、B、A、B、C⋯」





李逸彤讀出每一題MC嘅答案，邱旻顥連忙㩒下答案然後提交




IG Link: https://www.instagram.com/nd_cotttoncandy/?hl=zh-tw