［愛情純愛］我地之間嘅友誼純度絕對等於零！！！: 62. 保護

「少少⋯」沈心怡強擠出微笑講道，「都Okay嘅⋯」

「有冇滲血呀？」潘景諭嘅上身微微前傾望住沈心怡嘅膝頭，睇下紗布有冇血滲出嚟

擔心嘅感覺湧上心頭，潘景諭自己都有啲慌張，怕沈心怡會因為痛而喊出嚟

「我少少擦損咋嘛⋯點會有血滲⋯」沈心怡無奈地笑了笑

「唔係啦，去買紗布換咗先啦⋯！」潘景諭鬆開沈心怡嘅手就朝住藥房急步行去





「喂喂喂⋯！等陣⋯！」沈心怡見潘景諭呢個急步行，連忙追上去將潘景諭拉住，「嘶⋯等陣⋯」

潘景諭見沈心怡拉住自己，頓時剎制停落嚟轉身扶住沈心怡

「唔洗咁緊張，我擦損少少咋嘛！」沈心怡拉住潘景諭，另一隻手將校裙嘅裙擺微微拎起，望一望自己嘅傷口，「你咁樣，人地唔知以為我骨折啦⋯」

「我怕你個傷又嚴重咗嘛！我啱啱先喺地鐵站應承咗李逸彤，要將你平安咁送番屋企。」潘景諭擔憂地望住沈心怡嘅膝頭，喺沈心怡將手鬆開後，潘景諭嘅手又捉住沈心怡嘅手臂，輕輕地將佢扶住，「比李逸彤知道嘅話，佢殺咗我都似⋯」

「唔會嘅～係我話要嚟文具店㗎嘛～好小事啫～」沈心怡慢慢行，畢竟太大動作嘅話會整痛傷口，「我唔會爆你出嚟。」





「李逸彤咁為沈心怡把關⋯比佢知道我中意沈心怡嘅話仲得了⋯」潘景諭喺心裏有啲擔心亦有啲無奈，「佢會唔會阻攔我⋯？」

潘景諭悄悄地偷瞄咗沈心怡一眼，望住沈心怡臉上淡淡嘅笑容，潘景諭不禁會諗，自己對沈心怡嚟講，到底係唔係特別嘅一人⋯？沈心怡對自己，到底係抱住咩想法⋯？

「阿諭？你諗緊咩諗到入晒神？」沈心怡微微側着頭望住一臉專心嘅潘景諭

「嗯？哦⋯冇咩⋯」潘景諭頓時微微一笑，不自覺地提手摸一摸沈心怡嘅頭

沈心怡頓時一怔，佢有啲愕然地望住潘景諭，潘景諭回過神時發現自己嘅手就放喺沈心怡嘅頭上，潘景諭以毫無破綻嘅笑容微微一笑，默默地將手收回





此時，潘景諭嘅手機忽然間震咗一下，潘景諭嘅左手扶住沈心怡，右手拎出手機

邱旻顥：睇嚟你要追沈心怡，要過咗李逸彤嗰關先得啦

潘景諭無奈地望住手機裏嘅message，然後若無其事地將手機收入褲袋，免得沈心怡睇到邱旻顥嘅message內容

「最大嘅難關，就係佢好姊妹嗰關⋯」潘景諭喺心裏道

李逸彤番到屋企嘅第一時間，就係send message比邱旻顥，話比邱旻顥知佢番到屋企已經

「我到家了～～」李逸彤send咗個message比邱旻顥

都唔知道係由幾時開始呢個小習慣，明明佢地又唔係情侶關係，又唔係家人，但卻有着呢個報平安嘅習慣

啱啱換完衫嘅邱旻顥眼尾瞄到手機螢幕一亮，直覺話佢知一定係李逸彤，佢立馬拎起手機





「我都番到，啱啱換完衫」邱旻顥回覆道

李逸彤：唔想知你係唔係換完衫囉⋯

「只係順口咁講聲你聽」邱旻顥笑了笑回覆道

李逸彤：多謝晒

李逸彤：又準備打機啦？

「晏啲先，宜家唔打住」邱旻顥心裏有啲無奈，其實佢宜家係可以打機，但因為李逸彤在線上同佢傾緊計，佢又唔係幾捨得掉低李逸彤

李逸彤：哦？你地啲男仔唔係可以打機當飯食㗎咩？





李逸彤：咁忍得唔去打機？因為潘景諭未上線？

「唔關事囉（反白眼）機晏啲打都得」邱旻顥無奈一笑，佢都唔知李逸彤點樣得出呢個結論，「唔一定要宜家嘅」

李逸彤：哦，好囉～真係晏啲打都得呀？

「係呀⋯你啲想法唔好咁可愛（反白眼）」邱旻顥回覆道，「講到好似我打少一陣機會死一樣」

李逸彤：唔係咩？

「完全唔係」邱旻顥輕輕一笑後回覆道

李逸彤提起今日上PE堂嘅事，提起沈心怡整親，邱旻顥聽住李逸彤繪影繪聲嘅描述，不禁笑咗出嚟

「你咁保護沈心怡，佢真係唔洗要男朋友都得」邱旻顥回覆道





李逸彤：Okay啦～心怡都未有中意嘅人，應該冇咁快拍拖嘅

「可能佢有唔同你講呢」邱旻顥諗一諗後回覆道

李逸彤：唔會囉！佢一定會同我講㗎！

「佢可能搵到男朋友先同你講呢」邱旻顥又回復道，「條件咁好，要搵男朋友都唔難」

李逸彤見到邱旻顥咁樣講，心裏嘅警鐘頓時就響起嚟，就算邱旻顥讚嘅人係自己嘅好姊妹沈心怡都好，李逸彤心裏都會在意




IG Link: https://www.instagram.com/nd_cotttoncandy/?hl=zh-tw