［愛情純愛］我地之間嘅友誼純度絕對等於零！！！: 34. 我們只是熟絡

「嗨～」「嗨⋯！」

昕婷孭住書包行上嚟，佢都係搭地鐵番屋企，佢同沈心怡互相打一聲招呼，畢竟都係同班同學

「你都係搭地鐵番屋企呀？」昕婷行到沈心怡嘅身旁後回頭一望，確認後面冇人後便停低落嚟

「嗯係呀～」沈心怡微微一笑

昕婷下意識回頭望咗潘景諭一眼，潘景諭若無其事地微微點一點頭，然後就好似冇事發生一樣





「你今日冇同李逸彤一齊嘅？」昕婷好奇地問道，畢竟平時，沈心怡同李逸彤成日都一齊，正確嚟講，係佢地四個人成日都一齊

「哦，因為我仲要拎嘢，所以佢走先，冇叫佢等我。」沈心怡回頭望一望潘景諭拎住嘅貨件，又望向昕婷講道

「哦～」昕婷回頭望向貨件時，下意識望咗潘景諭一眼

三人一齊行入地鐵車廂，潘景諭一直都耷低頭睇手機，沈心怡都冇覺得點，反而昕婷感覺有啲唔自在

「你買咗咩咁重？」潘景諭問沈心怡





「就係訂咗幾件衫同鞋呀～」沈心怡從裙袋中拎出手機，然後搵到自己訂嘢嘅online shop，「幾日前訂㗎～買咗呢兩對鞋。」

沈心怡將自己買咗嘅兩對鞋嘅圖比潘景諭睇，潘景諭稍微湊近望住沈心怡嘅手機螢幕

「幾好睇。」潘景諭笑咗一笑，微微點頭

「當然～」沈心怡都覺得自己眼光好好，用力地點頭，然後將手機遞比企喺自己另一邊嘅昕婷睇

「好睇。」昕婷微微一笑講道





「番去請我飲嘢呀。」潘景諭對沈心怡講道

「知啦⋯咪應承咗你囉！唔洗係咁提我⋯！」沈心怡反咗一個大大嘅白眼同時講道

喺沈心怡到站後，沈心怡同潘景諭一同落車，沈心怡對昕婷講咗聲拜拜後便轉身朝扶手電梯行去

昕婷見沈心怡落咗車，然後拎出手機，send咗個message比沈心怡，與此同時，沈心怡嘅手機震咗一震、螢幕一亮

昕婷：雖然咁樣問好似有啲突然（笑喊）

昕婷：你係唔係同潘景諭拍緊拖？

沈心怡見到昕婷send過嚟嘅message，頓時一怔，心裏亦有啲愕然

「做咩？」潘景諭見沈心怡愕然咗一下，下意識問道





「唔⋯」沈心怡抿着唇，默默地將手機遞比潘景諭睇

「哦⋯」潘景諭望到昕婷send嘅message後，明明心裏有少許激動，心臟都緊縮咗一下，但卻強裝鎮定

沈心怡輕觸一下輸入message嘅文字格，然後回覆道：「冇呀（笑喊）」

潘景諭企喺一旁，望到沈心怡嘅回覆，心裏莫名其妙有啲失落

「我地只係熟嘛，冇拍拖」沈心怡再追加一個message解釋

沈心怡回覆完便收起手機，下意識地抬頭望一望潘景諭，腦海中諗起昕婷啱啱嘅提問

潘景諭感受到來自沈心怡嘅目光，但佢冇望過去，裝作咩都唔知，佢嘅腦海中都係沈心怡啱啱對昕婷嘅回覆





「嗯，我同阿諭只係比較熟。」「我地只係熟呀⋯」

⋯

「點呀？滿足啦？」邱旻顥沒好氣地望住拎住嘢飲嘅李逸彤，「唔痛啦？」

「滿足～唔痛啦～」李逸彤飲咗一啖奶蓋紅茶，打從心底嘅滿足

邱旻顥望住李逸彤一臉滿足地拎住紅茶飲，自己嘅嘴角都不禁上揚起嚟

「你飲唔飲呀？」李逸彤忽然間問邱旻顥，一手拎住飲品杯，一手輕輕扶住飲管，將嘢飲遞到邱旻顥嘅面前

「請你飲㗎嘛，你飲啦。」邱旻顥搖一搖頭

「唔⋯」聽到邱旻顥嘅回覆，李逸彤心裏有啲唔高興，「你唔飲呀真係？我好好人咁分一啖比你飲喎～」





李逸彤想邱旻顥飲一啖，或者心裏只係想要證明比自己睇，自己同邱旻顥之間嘅關係比較親密

佢感覺到邱旻顥對佢大概有一定程度嘅好感，如果唔係，邱旻顥唔會願意同自己保持一個咁近嘅距離

但李逸彤冇拆穿真相嘅打算，亦冇打算去問個明白，因為佢心裏都擔心自己嘅直覺會出錯⋯

「既然你咁講，好啦～」邱旻顥笑了笑，然後飲咗一啖紅茶

李逸彤將紅茶拎番嚟自己嘅面前，默默地耷低頭飲咗一啖，本來被風吹到有啲凍嘅臉頰忽然間散發一股熱力

「喺呢個距離，係唔係已經好近⋯？」李逸彤不禁喺心裏問自己，「雖然都想再稍微咁，近多少少⋯」

李逸彤不禁偷望邱旻顥，邱旻顥冇留意到李逸彤望住自己，只係默默地行喺李逸彤嘅旁邊








IG Link: https://www.instagram.com/nd_cotttoncandy/?hl=zh-tw