［愛情純愛］我地之間嘅友誼純度絕對等於零！！！: 33. 私心

李逸彤一手摸着自己嘅臉頰，一手從裙袋中拎出手機照一照自己個樣

「我塊面紅咗啦⋯！」李逸彤望住手機螢幕中自己嘅倒影，不滿地抬眼瞪咗邱旻顥一眼

「我知你面紅。」邱旻顥望住李逸彤一臉不滿，只係覺得李逸彤可愛又好笑，「睇到睇到！」

「仲笑！」李逸彤輕皺起眉頭，一副可憐巴巴嘅表情摸着自己嘅臉頰，「你就係個小學雞⋯」

「噗⋯！」邱旻顥一下子就笑咗出嚟，望住李逸彤嘅委屈表情，邱旻顥忍唔住就笑起嚟，「你唔好扮嘢喎～有冇咁痛呀？我好細力咋喎～」





「有呀⋯好痛⋯」李逸彤指住自己紅紅嘅臉頰，故作委屈地扁起嘴望住邱旻顥，「你嘅良心唔痛咩？咁樣恰女仔⋯」

「得啦得啦！」邱旻顥望住李逸彤嘅賣力演出，佢不禁笑了笑，然後投降，「陣間請你飲嘢啦最多。」

「飲咩？」李逸彤頓時下意識問道，擺出一個感興趣嘅樣

「唔痛啦咩？容光煥發咁。」邱旻顥沒好氣地笑道，「咁你想飲咩呀？奶茶？定又飲上次嗰個紅茶？」

「陣間去睇下咪知～」李逸彤高興地笑道





⋯

潘景諭同沈心怡一齊行到去拎嘢嘅地方，潘景諭企喺沈心怡嘅身旁，沈心怡熟練地打開取貨通知message，然後比對方scan一下QR code

企喺接待處嘅職員搵到件貨後，將一個大袋遞到沈心怡嘅面前

「呢份係你嘅，check一check名同電話啱唔啱。」職員微微一笑，友善地講道

「Okay啦唔該～」沈心怡核對過資料後，一下子將大袋抱住拎起





沈心怡行出取貨中心，然後又朝住地鐵站嘅方向行去

潘景諭望住沈心怡攬住個大袋，感覺袋裏裝得滿滿的，應該都幾重；沈心怡嘅手伸到裙袋拎出銀包，然後將貨件放低，再單手拎起貨件

裝住貨件嘅大袋剛好被包裝成有一個凹位，手指可以卡喺嗰個縫位拎住

「重唔重？」潘景諭見沈心怡拎得有啲辛苦便問道，「洗唔洗幫你拎？」

「都Okay，我拎到～」沈心怡搖搖頭，右手扶一下袋，左手調整一下拎住稍重嘅貨件嘅姿勢

潘景諭望住沈心怡行幾步又停一停調整拎貨件嘅方向，感覺都知件貨重，佢想幫沈心怡拎，但沈心怡啱啱話自己拎到

「佢真係拎到⋯？」潘景諭不禁喺心裏打上一個問號，「佢拎得好辛苦⋯」

潘景諭同沈心怡一齊行番去地鐵站，沈心怡一踏入地鐵站，就將貨件放低喺地上，然後彎下腰，打算又將貨件用雙手抱住捧住





「我幫你拎啦，件貨咁重⋯」潘景諭今次直接朝貨件伸手，但就喺下一秒，沈心怡彎腰將貨件抱起

「我拎到呀～」沈心怡拎起貨件後，朝潘景諭笑一笑，「行得啦～」

潘景諭定睛地望住沈心怡，佢都唔知道沈心怡係真係因為自己拎到而唔洗佢幫，定係因為唔想麻煩到佢所以唔洗佢幫

沈心怡轉身嘅時候，重心不穩，搖晃咗兩下；雙手捧住貨件嘅沈心怡，都冇多一隻手騰出嚟平衡，向後跌咗兩步，右腳微微一扭

「小心⋯！」潘景諭一下子拉住沈心怡，捉住佢嘅手腕避免佢跌，「唉⋯比我。」

潘景諭輕嘆一口氣，然後直接拎走沈心怡捧住嘅貨件，手指扣住凹咗入去嘅縫，當手抽袋一樣拎住

「我真係怕你咁樣番唔到屋企⋯」潘景諭望住沈心怡沒好氣地講道，「行兩步又企唔穩⋯」





「咩喎⋯都係咁啱咋嘛⋯」沈心怡輕輕抿一下唇，抬眼望咗潘景諭一眼

潘景諭同沈心怡一齊行，沈心怡悄悄地抬頭望住潘景諭，嘴角以只有自己察覺到嘅幅度微微上揚

「你幫我拎埋番去呀？」沈心怡喺行到入閘機前時，對拎咗銀包出嚟嘅潘景諭問道

「嗯，明顯啦。」潘景諭無奈地望向沈心怡講道

「哦。」沈心怡微微點頭同時緩緩地將視線收回

潘景諭嘅目光落喺將視緩緩緩收回嘅沈心怡身上，其實幫佢拎嘢，冇咩太大特別意思，只係單純地，想同沈心怡單獨一齊多一陣⋯

沈心怡悄然抬眼望向喺自己身旁嘅潘景諭，心裏有種難以言喻嘅感覺，佢冇開聲拒絕，明明平時自己一個人都可以拎到貨件番去，但今日好似被上天安排過一樣，沈心怡亦冇打算拒絕上天為佢安排嘅事

沈心怡行上扶手電梯，潘景諭企喺沈心怡嘅身後，手拎着貨件，沈心怡轉身面向住潘景諭企，平日都比潘景諭矮嘅佢，只係企喺扶手電梯上先有機會比潘景諭差唔多高





「你真係要幫我拎番去呀？好重⋯」沈心怡忽然間開口問道

「嗯，咁重你一個女仔點拎？我幫你拎番去啦。」潘景諭自然地笑了笑回答道，「諗定點多謝我啦。」

「請你飲嘢囉⋯」沈心怡無奈地講道，「想飲咩呀？番到去買比你飲啦。」

沈心怡嘅眼睛餘光見到一個熟人喺旁邊嘅通道行緊上嚟，佢下意識朝對方望去，對方剛好同佢對上視線




IG Link: https://www.instagram.com/nd_cotttoncandy/?hl=zh-tw