［愛情純愛］我地之間嘅友誼純度絕對等於零！！！: 19. 晚安

「好悶呀⋯」李逸彤用一個無可奈何嘅聲線講道

「做晒功課啦？睇下手機囉～」邱旻顥講道

「做晒啦～」李逸彤輕鬆地道，「WhatsApp你又唔覆⋯」

「你有WhatsApp我咩⋯」邱旻顥拎起手機，又真係見到李逸彤send message比佢嘅通知，「個message係你兩分鐘前send，講到好似我兩個鐘唔覆機咁⋯」

「好悶嘛，一分鐘都變一個鐘啦！」李逸彤鼓起兩泡腮，聲線裏夾雜咗半點撒嬌嘅意味





「哦好囉～」邱旻顥聽得出李逸彤唔明顯嘅撒嬌，嘴角上揚起嚟，喺接咗李逸彤嘅電話後，佢嘅笑意都冇收過

「陪我Hea一陣嘛⋯」李逸彤細聲地講道，「好悶⋯」

「可以呀。」邱旻顥強忍着笑意講道，「就陪你Hea一陣。」

雖然話係「一陣」，但兩人講着無聊事、講下功課、講下班上班發生嘅搞笑嘢⋯笑着聊着，唔經唔覺已經傾咗成個半鐘有多

邱旻顥見李逸彤仲好精神好開心似的，佢望一望時間後又安靜落嚟，繼續同李逸彤講嘢





「哥哥你瞓未呀？我閂燈啦～」邱茗然行入房問邱旻顥，「講電話細聲啲。」

「哦，你閂啦。」邱旻顥起身上咗上格床

「茗然要瞓啦？ 」李逸彤問道，「洗唔洗收線？」

「唔洗，佢未瞓，佢閂大燈開咗自己個床頭燈⋯」邱旻顥朝下格床望咗一眼

佢先啱啱上到嚟上格床，邱茗然閂上房嘅大燈，然後開咗夾喺佢自己床頭嘅細燈





「哦，好啦～」李逸彤笑了笑講道，「呵～欠～」

「睇嚟要瞓嗰個係你。」邱旻顥無奈地笑道

「仲可以再講多陣～」李逸彤嘻嘻一笑，心裏唔太想收線

兩人又多傾咗大半個鐘，邱旻顥講講下嘢嘅時候，發現對面靜咗落嚟

「李逸彤？」邱旻顥叫咗李逸彤一聲，李逸彤冇回應，「喂，李逸彤？」

邱旻顥嘅指尖輕敲咗手機嘅螢幕兩下，螢幕一亮仍然留咗喺通話中嘅頁面

「李逸彤，你瞓咗呀？」邱旻顥不自禁柔聲地問道，「李逸彤？」

電話裏頭傳嚟李逸彤平穩嘅呼吸聲，睇嚟佢真係瞓著咗⋯





邱旻顥拎住手機無奈地笑，佢都唔知可以講啲咩，雖然李逸彤瞓著咗，但邱旻顥卻唔太想收線

喺聽咗李逸彤平穩嘅呼吸聲半個鐘左右後，邱旻顥決定先收線，因為佢都有啲眼瞓

「李逸彤，我瞓啦⋯」邱旻顥對住熟睡嘅李逸彤講道，「晚安⋯」

邱旻顥掛斷電話，喺snapchat send咗一個晚安snap，然後就瞓了

⋯

「呵～欠⋯」邱旻顥打咗個喊露，然後抬頭望着由上面落嚟嘅升級機

「咚、咚！」升降機到咗25樓，門打開後，邱旻顥行入電梯，企喺李逸彤嘅旁邊





「早晨。」邱旻顥先開口對李逸彤講道

「早晨～」李逸彤同平時一樣精神狀態良好

喺升降機到咗地面後，李逸彤同邱旻顥自然地並肩而行，一齊行出大廈

「好精神啦你～」邱旻顥喺行出大堂後，一嚟就笑問道

「呃⋯都幾好⋯」李逸彤一聽，頓時心虛地笑起嚟

「邊有人好似你咁，自己打比人，然後自己瞓著咗⋯」邱旻顥無奈地望咗李逸彤一眼

「我冇心㗎～」李逸彤帶着小跳步行前兩步同時望向邱旻顥，「下次一定唔會又瞓著！」

邱旻顥聽到李逸彤咁講時心裏一怔，李逸彤咁講，咪即係仲會有下次打比自己





「哦哦，聽住先啦～」邱旻顥自然地輕輕一笑

「最多我請你食早餐嘛～定你想要分我一個暖包？」李逸彤笑道

「早餐實際啲，多謝。」邱旻顥諗都唔諗就回答道

「好囉～」李逸彤都答應了，但佢嘅小腦袋一轉，忽然又靈機一動一樣對邱旻顥講道：「手伸出嚟呀～我送你一份禮物～」

邱旻顥半信半疑地將手伸出嚟，李逸彤嘅手伸入裙袋，拎咗枝原子筆出嚟

「你想點？」邱旻顥見到李逸彤手上嘅原子筆，心裏有一股不安嘅感覺飄過

「你唔好理啦～信我嘛～」李逸彤捉住邱旻顥嘅手腕，將邱旻顥嘅冷衫同裇衫一同向上推，露出手腕嘅位置





兩人企喺路中心，邱旻顥嘅手心向上，李逸彤輕輕地捉住邱旻顥嘅手，「咔！」一聲將原子筆嘅筆頭㩒咗出嚟

兩人一樣微微耷低頭望住邱旻顥嘅手腕，喺筆尖掂到邱旻顥嘅手前，李逸彤微微抬頭望向邱旻顥，邱旻顥剛好亦抬眼望佢，李逸彤嘅臉上隨即掛上爽朗嘅笑容，邱旻顥見李逸彤笑，佢自己都忍唔住笑了




IG Link: https://www.instagram.com/nd_cotttoncandy/?hl=zh-tw