［愛情純愛］我地之間嘅友誼純度絕對等於零！！！: 18. 是誰的幸運

「想食薯片就拎，偷笑啲咩？」邱旻顥不禁一笑問李逸彤

「呀？」李逸彤望向邱旻顥，佢估邱旻顥誤會咗佢笑容背後嘅意思，不過佢亦冇解釋清楚嘅打算，「好呀～你洗唔洗擺個嘢飲落嚟先？好似好重⋯」

李逸彤望向邱旻顥手上攬住嘅兩pack嘢飲，感覺好似好重便細心問道

「本來我就冇打算嘅～不過你既然問到，我都唔好意思拒絕你～」邱旻顥笑了笑，然後稍微執一執籃內嘅位置，騰出一個空位放兩pack嘢飲，「我拎啦。」

邱旻顥自然地接過本來拎喺李逸彤手上嘅購物籃，放咗兩pack嘢飲之後嘅購物籃太重，要李逸彤一個女仔拎唔太好





李逸彤笑一笑後彎腰拎咗包蝦片放到購物籃中，邱旻顥安靜地跟喺李逸彤嘅身後，李逸彤偶爾回頭望向邱旻顥，同邱旻顥對上視線嘅時候露出開朗嘅笑容

邱旻顥見到李逸彤對自己展露笑容，嘴角都不禁跟住上揚，然後微微耷低頭、將視線稍微移開

比起著便服嘅李逸彤，邱旻顥更中意著校服嘅李逸彤，因為著住校服、梳起長馬尾嘅李逸彤顯得更青春活潑，更似佢陽光開朗嘅性格

「感覺好似小情侶行超市咁⋯」李逸彤喺心裏暗自歡喜地講道，然後拎起兩盒百力滋放到購物籃中，「感覺好好～」

「李逸彤，你買咁多零食，食得晒㗎啦？」邱旻顥瞄一眼喺購物籃內嘅零食





「咁唔係一日食晒㗎嘛～」李逸彤望向邱旻顥笑了笑講道，「嘻嘻⋯食得晒㗎啦～」

兩人各自比完錢後喺超級市場嘅門口等埋先一齊走

邱旻顥攬住兩pack嘢飲，李逸彤拎住一大袋零食，兩人沿路上有講有笑，氣氛好和諧

「比一盒你呀～」李逸彤喺等緊升降機到地面時，喺膠袋中拎咗盒百力滋放到邱旻顥拎住嘅兩pack嘢飲嘅面上，「見你今日咁lucky撞到我～」

「點解一定係我lucky？唔可以係你撞到我所以lucky咩？」邱旻顥笑了笑問道，但佢都覺得自己今日咁都撞到李逸彤好幸運





「都可以～」李逸彤笑了笑道，「聽日見～」

李逸彤抬眼望咗一眼樓層，已經到咗24樓，佢先同邱旻顥講拜拜

「聽日見～」邱旻顥都笑咗一笑

喺升降機停喺25樓，打開電梯門後，邱旻顥行咗出去，頭也不點地朝屋企嘅方向行去

邱旻顥行到屋企門口㩒鐘，喺屋企嘅邱茗然即刻小跑過嚟開門

「買咗維他奶呀？」邱茗然喺閂上門後即刻跟喺邱旻顥嘅身後行入廚房

望到放入雪櫃嘅維他奶同蘋果綠茶，邱茗然嘅雙眼都要發光，畢竟係佢話想飲嘢叫邱旻顥去買

「哥哥我愛死你啦！」邱茗然瞬間變成兄控一樣攬住邱旻顥





「得啦得啦，唔洗賣口乖。」邱旻顥無奈地反一下白眼行出廚房

「哥哥你仲買咗百力滋呀？我又要食！」邱茗然連忙上前從邱旻顥嘅手中拎走咗盒百力滋，正打算開嘅時候，邱旻顥將百力滋從邱茗然嘅手中拎走

「冇你份。」邱旻顥行入房，直接將盒百力滋掉到自己嘅上格床，「拎嘢飲啦去。」

⋯

夜晚11:32

李逸彤趴喺床上睇手機，今晚係一個寧靜嘅晚上

「好悶⋯」李逸彤細聲地講道





功課做晒、書亦溫咗、手機睇完一次又一次⋯宜家拎住手機都唔知有咩好睇

「唔知邱旻顥做緊啲咩⋯」李逸彤第一時間諗到邱旻顥，拎起手機直接send一個message過去：「好悶」

李逸彤盯着手機，見邱旻顥遲遲未覆，於是拎起手機，今次唔係send message，係打電話過去比邱旻顥

「唔⋯打唔打好？」李逸彤喺㩒「撥號」前不禁猶疑起嚟，「佢唔聽嘅話，咁咪好樣衰⋯」

李逸彤將頭埋到枕頭中，苦惱着要唔要打電話過去比邱旻顥

「佢唔聽嘅話點算，佢聽日會唔會問我做咩打比佢？」李逸彤細聲地自言自語道，「佢唔聽嘅話，佢問起就話問功課啦⋯」

邱旻顥坐喺書枱前睇緊電腦，手機忽然間震起嚟，係李逸彤打電話過嚟

「李逸彤打比我⋯？」邱旻顥疑惑咗一秒，仲以為自己眼花，不過佢都係先接電話，「喂？」





「喂⋯？」李逸彤先靜咗一秒先開口，「好悶⋯你得唔得閒⋯？」

「得閒呀～」邱旻顥不禁笑起嚟，原來李逸彤係因為悶而打比佢，佢仲以為係咪有啲咩事

邱旻顥戴上耳機、將房門閂埋，邱茗然仲喺廳睇緊電視




IG Link: https://www.instagram.com/nd_cotttoncandy/?hl=zh-tw