［愛情純愛］我地之間嘅友誼純度絕對等於零！！！: 07. 選擇

喺回家嘅路上，就只剩下邱旻顥同李逸彤，兩人都唔會覺得唔自在，只係同平時一樣各有各睇手機

「呀⋯好想睇戲⋯」李逸彤先開口講道，「但又唔知最近有咩好睇⋯」

「搵下咪知。」邱旻顥回答道，「想睇咪搵下有咩睇。」

「直男⋯？」李逸彤心裏第一下嘅反應係無奈，同時喺心中抱怨起嚟，「我問緊你同唔同我一齊睇戲嘅意思呀⋯醒少少得唔得㗎啫⋯」

「嗯？做咩唔出聲？」邱旻顥見李逸彤唔出聲便問道





「冇嘢。」李逸彤都懶得講啲咩

「咁你想睇咩戲？」邱旻顥喺手機搵緊最近有咩電影上映

邱旻顥點會真係咁直男？唔通連可以拉近距離嘅機會都唔好好把握咩？

李逸彤喺聽到邱旻顥問佢嘅瞬間，心情頓時由陰轉情，嘴角都悄悄地上揚起嚟

「我都唔知睇咩好喎⋯」李逸彤聳肩講道





「呢套睇唔睇？」邱旻顥搵到一套科幻片，然後將手機微微側向李逸彤嗰邊

「邊套呀？」李逸彤下意識就湊近邱旻顥嘅方向，望住佢嘅手機螢幕，「呢套？」

邱旻顥喺李逸彤湊近佢嘅瞬間，心跳都好似要停止落嚟一樣，佢努力地令自己睇起嚟冷靜一啲，就好似咩都冇發生一樣

「唔要睇呢套⋯」李逸彤冇注意到邱旻顥嘅反應，只係專注喺電影嘅頁面上，「不如睇呢套呀～」

李逸彤見到一套幾吸引嘅電影，對邱旻顥提議嘅同時自然地提手捉住邱旻顥嘅前臂





邱旻顥頓時僵咗一下，佢稍微將視線移開

微風吹過，李逸彤一把秀髮嘅香味隨微風吹散，邱旻顥亦聞到淡淡嘅香味

「邱旻顥，呢套好唔好呀？」李逸彤抬頭望向邱旻顥，「邱旻顥？」

李逸彤一抬頭，見邱旻顥喺度發呆，便伸手喺佢面前晃兩晃

「嗯？」邱旻顥回過神來，見到李逸彤嘅手放喺佢面前，李逸彤見邱旻顥回過神，伸手就拍落佢嘅額頭，「喂！打我做咩呀！」

「我叫你呀！問你睇呢套戲好唔好呀！」李逸彤收回手，然後指一指邱旻顥嘅手機螢幕，「又唔應我，掛住喺度發呆⋯」

「睇囉睇囉，睇呢套啦。」邱旻顥都冇望清楚李逸睇揀咗睇咩戲就直接答應，「你想幾時睇？」

「下星期囉～」李逸彤爽快地回答，「下星期睇。」





「好呀。」邱旻顥微微點頭，「但唔今個星期睇？星期六星期日睇都可以。」

「如果可以今個星期睇我都會揀今個星期⋯」李逸彤無奈地講道，「套戲下星期先上呀先生⋯」

「吓？真係㗎？」邱旻顥即刻打開戲院嘅網頁，睇下套戲嘅上映日期，「係喎⋯」

「你啱啱冇睇到㗎咩⋯」李逸彤一臉無奈咁講道

「呃⋯冇留意⋯」邱旻顥笑咗一笑，「下星期再約實？」

「好呀。」李逸彤微微點頭

李逸彤一番到屋企，第一時間就係洗個手，換件衫，換番套舒服嘅居家服，將校服掛好喺衣櫃前





「下星期幾時睇好？」李逸睇打開手機嘅月曆，「星期六？算啦，過兩日先再同佢講⋯」

李逸彤先執一執書包，執番聽日要用嘅書放入書包入面

「呼⋯」李逸彤坐低喺床上，然後拎起手機，盯住手機螢幕上嘅通知

邱旻顥send咗幾個message過嚟比佢，李逸彤唔睇都知，一定又係share咗啲咩IG post過嚟比佢，講下啲無謂嘢

放喺枕頭上嘅手機又震咗幾下，李逸彤將手機拎出嚟睇下邱旻顥到底send咗啲咩比佢

「哈哈哈哈⋯！咩嚟㗎～」李逸彤望住邱旻顥send過嚟比佢嘅po，一下子就笑咗出嚟

李逸彤覆咗邱旻顥一排笑喊嘅emoji，邱旻顥瞬間就睇咗李逸彤嘅message

邱旻顥：好搞笑呢個，我笑咗超耐（笑喊）





「後勁好強（笑喊）」

邱旻顥另外又send咗一齣電影喺IG嘅pv比李逸彤，李逸彤like咗個pv

「下星期睇呢套，我超期待佢上映」李逸彤回覆道

邱旻顥：下星期幾睇？平日？

「點可能平日呀⋯」李逸彤不禁反一下白眼，「星期六？」

邱旻顥：好的好的，星期五放咗學一齊去買飛？

李逸彤拎住手機，喺回覆前諗咗一諗





放學之後特登去一轉戲院買飛嘅話就要遲番屋企，星期五係一星期中最應該準時放學番屋企Hea嘅日子，一齊買飛即係代表一定會晏番屋企，冇得早啲番去Hea⋯

「但⋯一齊買飛嘅話，可以單獨同佢一齊，又可以見多邱旻顥一陣⋯」李逸彤喃喃自語地講道，「唔⋯」

佢考慮緊嘅，係要犧牲早番屋企Hea定犧牲多見邱旻顥一陣、同佢獨處嘅機會

「哎呀⋯」李逸彤輕皺起眉頭，喺兩秒後拎起手機回覆道：「好呀～」




IG Link: https://www.instagram.com/nd_cotttoncandy/?hl=zh-tw