［愛情純愛］我地之間嘅友誼純度絕對等於零！！！: 06. 朋友

「你做咩要咁樣呢？」潘景諭回頭低頭望一望李逸彤嘅腳，無奈地講道

「你隻手用嚟拎嘢食拎手機，唔識自己抄筆記？」李逸彤笑一笑講道

「咩呀～」潘景諭喺自己位座低，「我都係間中叫沈心怡幫我抄一下筆記啫～」

「成日都恰心怡⋯」李逸彤替沈心怡不值地講道

「咩呀⋯我冇恰佢呀！」潘景諭講道，然後將包維他奶放到沈心怡嘅枱上，「我有買番嘢飲比佢㗎⋯」





沈心怡微微一笑，然後拎起潘景諭買比自己嘅維他奶，插咗飲管，飲咗兩啖

「抄咗啦？我本書呢？」潘景諭望向沈心怡

「放咗喺你櫃桶。」沈心怡講道，手指住潘景諭嘅櫃桶

「哦係喎⋯」潘景諭將本書拎出嚟，然後打開書，好似打算檢查一下沈心怡係唔係真係抄咗一樣，「你換咗memo紙咩？」

「我嗰疊memo紙咁啱用晒，呢張係借逸彤嘅memo紙寫。」沈心怡講道





「哦⋯」潘景諭點點頭，然後將本書又收番入櫃桶

「叮噹叮噹⋯叮噹叮噹～」

上堂嘅鐘聲響起，接住嘅時間又要繼續上堂

李逸彤番到座位，啱啱伏喺枱上小睡嘅邱旻顥緩緩地坐起身，兩人就好似咩事都冇發生一樣

⋯





「叮噹叮噹⋯叮噹叮噹～」

放學嘅鐘聲一響起，大家嘅疲倦頓時消失，放學嘅鐘聲先係喚醒大家最好嘅鬧鐘

沈心怡執完書包，直接就行到李逸彤嘅座位旁邊，平日沈心怡同李逸彤都一齊放學

李逸彤開完locker後番埋位孭起書包，但佢同沈心怡都冇離開座位，反而回頭望向邱旻顥

「你得未？」李逸彤先開口問道

「快啲啦，好肚餓⋯」沈心怡嘅雙手放喺肚子上，感覺肚子裏空盪盪的

「好快好快⋯」邱旻顥不急不慢地將嘅嘢放入書包，然後又將要放locker嘅嘢分出嚟，「潘景諭得啦咩？」

「唔⋯」沈心怡同李逸彤同時望向潘景諭嘅方向，「未喎～」





「咁做咩催我？」邱旻顥不解地問道，「你地去催下佢啦！」

沈心怡同李逸彤對望咗一眼，沈心怡默默地行到潘景諭嘅座位旁邊望住潘景諭執嘢

「你地搞掂啦？」潘景諭眼睛嘅餘光見到沈心怡喺自己隔離，「咁快手嘅？」

「到底你同潘景諭邊個會快啲執完嘢呢！」李逸彤故作激動地望向潘景諭嘅方向，對邱旻顥講道，「邊個包尾邊個請食tea呀！」

「吓！？」邱旻顥一聽到，頓時加快咗執嘢嘅速度，「邊個幾時講㗎！？」

沈心怡同李逸彤對望一眼，兩人都悄悄地笑一笑，沈心怡見邱旻顥加快咗執嘢嘅速度，頓時拍拍潘景諭嘅手

「阿諭快啲啦！」沈心怡著急地講道





「好快啦⋯！」潘景諭講道

「再快啲再快啲！你同邱旻顥邊個包尾邊個請食tea呀！」沈心怡講道

呢個大炸彈一出嚟，潘景諭都加快咗執書包嘅速度，潘景諭望一望沈心怡，沈心怡好似明白佢嘅意思一樣，幫佢手將啲嘢快速地疊好，塞入潘景諭嘅書包

「呢啲唔帶番屋企啦⋯！」潘景諭望住幾本書，但又懶得開locker，直接就將書塞到櫃桶中

「快啲快啲！Okay啦！」沈心怡將潘景諭嘅書包拉鍊拉上

沈心怡同潘景諭兩人行到邱旻顥嘅座位旁，邱旻顥剛好將書包拉鍊拉上

「請食tea啦邱旻顥～」潘景諭悠然自得地講道，「我快你一步。」

「搞錯呀⋯」邱旻顥不滿地講道





「行啦行啦～食tea食tea～」沈心怡高興地講道，同李逸彤一齊先高興地行出課室

放學組合邱旻顥、潘景諭、李逸彤，再加上沈心怡，四人有時放學之後會一齊去食嘢，唔食嘢嘅話都會一齊行去地鐵站搭車番屋企

⋯

四人一齊食完tea之後一齊去地鐵站，潘景諭因為住附近，所以只係喺另一個出口出番去就係，而邱旻顥同李逸彤、沈心怡則一齊搭車番屋企

「我覺得我有啲似電燈膽⋯」沈心怡喺李逸彤嘅耳邊細細聲咁講道

「嘖⋯咩呀⋯！」李逸彤用手肘撞咗沈心怡一下

到站之後，三人一齊落車，但沈心怡番屋企嘅出口同李逸彤唔一樣，所以喺出閘之後就要分道揚鑣，等下星期番學再見





「拜拜～」「拜拜。」「拜～」

熟絡嘅三人講一聲再見，然後就各有各番去




IG Link: https://www.instagram.com/nd_cotttoncandy/?hl=zh-tw