男友出軌，我決定送26頂綠帽比佢: K for 女僕cafe的一天（1）

一覺瞓醒，突然諗通咗。

其實Josh從來無呃過我。

佢想搵一夜情對象，我想搵人正經拍拖。無話邊個啱定錯，只係我地想要既野唔同。

係佢地既世界，愛情只係一場博奕遊戲，有好多心計同套路，但我唔想咁。

深夜時相識，天亮前告別，從此別過。佢都叫做陪過我一個晚上，所以我唔會刻意去忘記佢。





對自己誠實，好似無咁攰。

我整理一下混亂既思緒。

首先，我仲未放得低丁家岐。

第二，雖然我好想有個人陪，但係我呢個狀態，真係唔適合拍拖。傷過人地，亦傷過自己。都係順其自然啦，無得心急。

第三，放假放得太耐，一無野做就會亂諗野，覺得人生空虛無意義存在既目的是什麼我係邊度黎我又會去邊......





我決定令到自己忙啲。

第四，填滿心靈上既空虛，唔一定係愛情，仲可以係錢。

我知道我要乜啦，我需要一份工作。一來可以消磨時間，二來又可以買下無謂野。

自己錢自己賺，用都用得心安理得。

上網碌啊碌。





聽講而家香港失業率好高企。

我發現唔係無原因。

因為好多工既薪酬待遇都好mean。

翻份辦公室文職，先得$45一個鐘，稍微高過最低工資，但係要求多多，要識Photo shop又要識剪片...

做sales或者捧餐，要搬搬抬抬，又要對住啲閪客，表面上笑臉迎人，在心中屌人老母一百次，好撚辛苦；

私補賺得錢多，不過之前係IG睇過on_9life既帖文，條友話日日都番到嘔白泡，所以做咗無耐就quit咗...真係隔住屏幕，都感受到佢既一殼眼淚心酸血淚史。

老闆出到錢，梗係想榨盡員工；而員工就會想盡辦法去偷懶卸膊做少啲野。

此乃人性也。





所以話，老闆同打公仔既心態，永遠都係對立。莫講話做朋友，唔做敵人已經好好。

我既目光停留係一則廣告上。

「招募女僕
時薪：$70-100（另有花紅）
經驗不拘
陽光開朗中意笑
著住可愛既制服上班
要叫客人/大小姐做主人」

係女僕cafe打工？聽落幾好玩，同埋佢地既制服真心靚，好似玩緊cosplay咗。

係Google Form填咗啲簡單既個人資料，upload埋三張近照。





了卻心事，成個人都輕鬆哂。跟住要做既，就係等消息。

唔知點解，有幾分期待仲有幾分心急。

呢份工都算係靠樣搵食，如果有回音，證明我都有吸引力，樣貌得到認可，值得店主出錢請我。

但如果係不正當職業，例如揼邪骨、做援交，成日俾人抽水，我又唔係好想做。

鈴鈴鈴鈴鈴...

「你好，我地係Sweet Home打黎架。請問係咪Anita呀？」

「我係呀。」我即刻轉用娃娃音講野。平時要嗲丁家岐，先會用到呢把聲。





「啱啱收到你既資料，我地想了解一下你。而家方唔方便做個interview呀？」

「嗯，可以呀。」

「之前有無做女僕侍應既相關經驗？」

「無呀...咦？唔係話經驗不拘架咩？」

「其實係咁，我地會請兩種女僕，一種係普通女僕，負責招呼客人；一種係資深女僕，最好熟識動漫文化，表演唱歌跳舞，薪酬上會有啲唔同。」

原來女僕都有分等級...如同藝妓既花魁，青樓既頭牌。

「不過當然啦，我地都好歡迎新手加入呢個大家庭。」對方又補多一句。






「每位女僕都有一個人設。你又會選擇對客人展示邊種人設呢？」

「要同現實既性格一樣？」

乖乖女一名，容易面紅，聽話溫順無主見，唔識拒絕人，對唔熟既人無野好講。

咁樣講實悶死人。

「唔一定，女僕其實都算係一種角色扮演。」

「如果對方好多野講，我會靜靜地聽；如果對方比較怕羞，我會主動同佢講野。所以，我既人設應該係平易近人既鄰家妹妹。」

「了解。最後一個問題。我地間店會有唔同種類既客人。如果你遇到一啲比較麻煩既客，你會點樣處理？」

「做得女僕，就要同所有客人打交道，冇得揀客。我會儘力同佢地溝通，係能力範圍之內，滿足佢地既需要。」

「最後一個問題。

你覺得女僕cafe同其他cafe有乜唔一樣？」

「好大唔同架，正如你頭先所講，女僕係一種角色扮演。佢地係主人，我係女僕。佢地一入店，就好似番屋企，要俾到佢地賓至如歸既感覺。」

「明白，你星期一11點過來second in吧，我地既地址係...」

哈哈，估唔到我胡凱婷大小姐，都有拋頭露面出賣色相既一日。