男友出軌，我決定送26頂綠帽比佢: J for 無腳既雀仔（3）

卡啦ok呢啲地方，同酒吧啊club啊一樣，昏暗既燈光、煽情既歌曲、醉人既酒...只有一個目的：營造曖昧既氣氛。

入到房，即刻Scan哂成個場。

一共有四個男仔，由左至右望過去，分別係：陽光ABC高大型男、戴眼鏡斯文弱質書生、頹廢中二病MK仔、仲有Josh。

在心中已J已射Thx不用客氣。

望住佢地，我突然明白咗一樣野。





情場玩家唔一定靚仔，但係靚仔既多數都係情場玩家。

樣係天生既，既然上天賞飯吃，點解唔盡情揮霍自己既本錢，到處為所欲為。

佢地中意女仔既身體，女仔又何嘗唔係只中意佢地既外在，等價交換而已。

反正大把女埋身，何必為誰而停留？

就正如操六舊腹肌既男仔，點會只為一個女仔而操。





「符詩韻呢？」

「仲未到。」

「符家大小姐幾時有準時過架？」

「你好啊，凱婷小妹妹。」斯文書生同我say hi。

暫時得我一個女仔，所以佢地將注意力放哂係我身上。





完全滿足到我既虛榮心。

我暗暗希望詩韻遲啲先到，等我可以享受呢種不可多得既時刻。

「你平時好中意睇書架？」我問。四個之中，佢望落最文青。

「睇書？鹹書算唔算呀？」

「嗯...都算既。」

我露出尷尬而不失禮貌的微笑，唔知點樣接落去。如果詩韻係度，佢一定知道，點樣可以答得好玩幽默啲。

ABC型男打破冷場，遞咗枝咪俾我：「唔使怕羞喎，自己揀歌，唱乜都得。」

其實我唔係怕羞，我只係怕生，對住第一兩次識既人，唔係太放得開。





會自帶一絲拘緊，會在意自己既形象。

「想點唱都得，不過收錢，一首十蚊。」MK仔自以為搞笑咁話。

「屌你呀，廟街阿姐上台唱首歌，都收一百蚊啦。」

「人地提供額外服務，你有無先？」

我揸住枝咪，扮搵歌。唱歌唔係我强項，唱到走音就失禮死人。

班男仔等等下，可能覺得無癮，無再理我，自顧自猜拳玩骰盅。

我既內心小劇場瘋狂進行中。





成日話男仔中意好pure好true既女仔，其實唔係囉。

佢地只係中意扮純情既女仔，而唔係真正既傻白甜。

Josh同佢地嬉笑打罵完，見我被冷落，拎住枝酒，黎到我身邊。

「做咩坐埋一邊呀？」

「聽唔到你講乜。」果三條友叫到鬼殺咁嘈。

Josh唯有哄埋黎：「問你做咩坐埋一邊。」

「聽緊歌呀。」

「唔講野？」





「無野講。」

「頭先唔係好多野講架咩？」

佢身上既香水味，佔據了我所有的味覺。

「......」我大腦一片空白。

「咁我地飲酒好無？」佢問。

「得一枝酒咋喎。」

Josh昂高頭飲咗幾啖：「如果你唔想飲我既口水，我可以拎隻杯俾你。」





「唔使啦。」為咗證明我真係唔介意，我一飲而盡。

「唔好飲太多呀，呢隻酒容易醉。」佢提醒我。

男仔唔係好中意灌醉女仔架咩？難道佢真係對我無非分之想？

其實佢都算係複雜既人。

單純如我，好容易俾呢種人吸引。

因為佢地好似包上封套既禁書，唔知係乜內容，要估估下。

不過，佢會唔會覺得我太單純，一眼睇穿，無回味既餘地呢？

就正如食慣麻辣米線既人，都唔會突然轉口味，食番清湯米線吧。

大概我唔係佢杯茶。

所以佢先對我咁循規蹈矩。

正當我失望之際，我望到佢既紋身：「無腳既雀仔？」

終於俾我搵到一個共同興趣！

我望住佢，佢又望住我。我地陷入毫無頭緒既對視，直到佢突然講咗一句：

「你今晚發夢會見到我。」

《阿飛正傳》裡面，旭仔第一次見蘇麗珍，講完呢句對白，就咁走咗去。

只留下一個遠去既背影。

如果我係蘇麗珍，一定忍唔住諗：呢個人咁自大架...佢以為佢係邊個？如果唔係對我有意思，點解會咁留意我。

我今晚會唔會真係發夢見到佢？

我成功把自己逗笑了：「呢句對白，唔係人人都講得。」

Josh都繃不住笑意：「所以張國榮係無人可以取代既，」

「你中意張國榮？」我問。

「嗯，係呀。」

佢又補多一句：「希望我講完之後，你今晚唔會發惡夢。」

「你覺得，我地會唔會好似佢地咁，只做一分鐘既朋友？」

「希望唔會。」Josh露出苦笑不得既表情。

「胡凱婷！」

詩韻終於姍姍來遲咁出現，一邊用手搧風，一邊用紙巾擦汗：「出面熱死人啦，靚仔，借個靚位黎坐下。」

Josh企起身，讓咗個位俾佢。

詩韻一個屁股坐咗落我同Josh既中間。