男友出軌，我決定送26頂綠帽比佢: J for 無腳既雀仔（2）

等咗詩韻二十分鐘。

我：你係邊？

詩韻：黎緊

對於佢黎講，有男仔既地方就係戰場，要以最佳戰鬥格上場。

詩韻：你可以自己上去先





我：等埋你

詩韻：係咪唔識搵路？Josh話佢都係地鐵站附近，我叫佢去接你

Josh係邊個？

係咪就係詩韻話我會中意果個男仔？

我有啲緊張又有啲期待咁企係原地。





【陌生電話來電】

「凱婷，你著乜衫？」一把有磁性既聲音。

佢居然叫得出我個名，而唔係叫我「詩韻個frd」。

「你估下？」

「我估你著住條白色裙。」





一個灰色頭髮既男仔行黎我面前，身材高佻，裇衫反領處有個紋身。

佢收埋部電話。

「估啱有無獎先？」

「無啊，哈哈。」

「可以叫我Josh。」佢定定咁望住我：「我地行啦？」

「嗯。」

佢身上有種木質香味，唔係淡淡既木香，而係焚燒中既木香。

如果香水有氣場強弱之分，呢隻一定係氣場全開既味道，唔會輕易被另一種味道掩蓋。





係會令人意亂情迷既味道。

我中意呢種味道。

「你望落唔似會食兩枝煙既女仔。」行行下，佢突然話。

「係？但你望落似周街flirt女既player喎。」我不假思索咁話。

Josh輕笑一聲：「係咪想講我人面獸心。」

「如果我話係呢？」

佢假扮嘆咗一口氣：「個個都係咁講。」





「咁你係唔係？」我追問。

「被你睇穿咗就唔係啦。」

正常黎講，遇到呢啲情況，player會即時否認，有女既會強調自己有幾咁專一；無女既會有以下兩個標準答案：

A）我俾人戴綠帽呀，情傷難療，唔敢再投入一段關係，等陣又再俾人hurt多鑊，我真係承受唔到失去一個人既滋味。

B）我個ex對我好好，但我年少輕狂，唔識得珍惜，等到佢離開我，後悔已經太遲。如果遇到下個女仔，我一定會好好珍惜。

想走滄桑路線，可配以香煙作道具；想走悲情路線，可塗抹wasabi在手，捽番幾滴眼淚出黎。

但Josh無咁樣做...難道佢真的不是player？

「不過我身邊有人係player黎。」Josh語氣平淡咁話。





「好識講野哄女仔上牀？」

「咁梗係啦，」

香港好似得番兩種男仔。一種係player，另一種係毒撚。

Player識講野有情調有外型，毒撚無樣無內涵無聊無錢。

如果呢兩種人企係你面前，相信一個正常女仔都會選擇對Player投懷送抱，哪怕飛蛾撲火一場空。

「有時都會覺得佢地幾仆街，」呢句說話居然出自Josh口中。

「真心咩？」我問。





男仔唔係會約埋一齊去食女，仲會幫手包庇掩護架咩？

Josh有點不屑咁話：「想約炮可以照直同條女講，你情我願咪去開房，唔啱嘴型咪搵下一個，做咩要呃呃氹氹傷人心。」

「你咁講...你有冇試過呀？」

「約過三四次啦，」

我望住佢：「識話人唔識話自己喎。」

「我都係男仔黎，有生理需求好正常，但我會同啲女仔講清楚係咩關係。」

「一夜情定係固定炮友？」

「都試過，有女之後就斷咗。」

有啲人食女之心人盡皆知，仲要遮遮掩掩。

相反，佢大大方方咁承認自己有慾望。

我反而幾欣賞呢種態度。

「而家仲有？」我隨意一問。

「無啦，扑完之後好空虛，唔知自己係度做緊乜。」Josh頓咗一頓：「你有無試過？」

突然問番我轉頭既...

「我？我無試過約炮呀。不過我明白空虛既感覺。」

「係乜感覺呀？」Josh一臉專注咁望住我，好似想知我諗緊乜。

「就係肉體交纏既時候，會覺得成個人被填滿。但係當佢離開你既身體，個心好似穿咗個窿，會變得空蕩盪，陣陣寒風吹入黎。」

所謂既「寂寞空虛冷」。

「你好似好有體會喎。」Josh打趣地道。

我唔想多講關於丁家岐既野，於是問佢：「男仔都會覺得空虛架？」

唔係用下半身思考既生物，有得扑野萬事足？

「至少我會囉，想搵個可以交心既女仔，為扑而扑好無謂。」Josh望住我，準確啲黎講，係望住鏡入面既我。

我地四目相投。

「有心靈上既交流？」

「可以講到心事。」

叮一聲，升降機大門打開。

「唔經唔覺同你講咗好多野。」Josh漫不經心咁話。

「我都係呀。」雖然只係第一次見，但係講起呢啲私人話題，完全唔覺得尷尬。

咁我地算唔算交到心？

打住，唔可以亂諗野，點可以咁容易動情。

Josh吹咗一個口哨：「應該係個唔錯既開始。」