男友出軌，我決定送26頂綠帽比佢: I for 校服的自述（7）

「凱婷！」Ian輕聲呼喚我。

回憶裡面既人影頓時消散，我返回現實。

Ian雙手握住我條腰，將我抱番落黎，好溫柔咁問：「諗乜諗得咁入神呀？」

「諗番起中學既事。」

初聞不知曲中意，再聽已是曲中人。回憶只係回憶，往事亦只能回味。





「如果可以穿越，你最想番去邊段時間？」Ian語帶試探咁問我。

「我...」

「齊人就開飯！餓死人啦！」一陣歡呼，打斷咗我地既對話。

我無答到Ian。

但係我有認真思考呢個問題。





大概，我會同十四歲既我講，唔好中意丁家岐，佢係一個渣男。

Ian坐係我隔離。

獅子隨手拎起一疊廣告紙，捲成喇叭狀，企上凳度：「雖然係第一日識，但相識就係緣份。今日，個個都要飲酒，仲要不醉無歸！邊個話既？我話既！」

酒杯一個接一個咁傳過去。

「你地遲大到，點罰先？」老虎對住Ian擠眉弄眼，意圖再明顯不過。





「不如罰佢地飲交杯酒！」

「我舉手贊成！」

「我舉埋腳贊成！！！」

就咁樣，我同Ian俾大家推到中間，面對面，望住大家，忍唔住笑咗出黎。

我地輕碰對方既酒杯，手腕扣手腕，一啖飲哂。

「嘩~ 」有人拎出相機影低，有人狂吹口哨，將氣氛推至最高潮！

「好似要飲三杯喎！一杯for天地！第二杯for高堂！最後for夫妻！」有人唔收貨。

第二杯，我只係呷咗一小口。好耐冇飲過，同埋未食野，唔敢飲得太急，驚醉咗唔識番屋企。





「唔飲得唔好勉強呀。」Ian帶住擔憂望住我，拎走我隻酒杯：「我代佢飲！」

「第一次見Ian仔咁man呀！」

Ian一口氣飲咗三杯，成塊臉都紅哂。

「放過你啦，去食野先！」

火爐燒得熱烘烘，不時有火花彈出黎，架上擺滿雞翼、豬扒、牛丸、腸仔......

「你想食乜野？」Ian拎住個叉問我，「我幫你燒。」

「牛丸呀。」





「要唔要搽蜜糖？」

「使乜啫，你睇下阿嫂笑得幾甜。」

Ian呢啲好男仔，咁識照顧人，有佢做男朋友，一定會好幸福。

但日子耐咗，就會冇哂激情，淡過白開水。

咁快就俾我撩到，好似有啲悶。

我地一路食野，一路吹水。

「覺唔覺得我地好似TVB，無論喜劇定悲劇收場，都要黎個BBQ大結局？」

「咁我地係喜劇定悲劇？」





「一定係喜劇啦，我地捱過咗疫情，又捱埋DSE，齊齊整整係哂度，等上大學。」

「你又知你實入到U？」

「唔知架，希望在明天吖嘛。」

「屌，收皮啦。」

「咁不如我地講下有咩理想？」小白兔細細聲咁話。

理想...同現實永遠有差距。不過有目標有盼頭，先會有動力前進。

「我黎先！」獅子第一個彈起身：「我要考大學，上莊做主席！」





「你想食女咋嘛屌，我既訴求就係番工，儲錢買飛機環遊世界~」

「打飛機就有你份！我希望美斯今年可以拎到世界杯冠軍！」

「我希望開網店，賣下手工品。」

「我希望777落地獄！」

「我希望可以保持熱血，唔好渾渾噩噩咁過一世。」Ian正正經經咁話。

「阿嫂你呢？」得我未講，所有人將目光投放係我身上。

「我...想同中意既人係埋一齊。」我含羞答答咁話，專登無去望Ian，因為我知道佢望緊我。

...

可能係酒壯人膽，Ian挨落我膊頭：「俾我瞓陣。」

「你有無事？」

「頭先飲得太多。」

「乖啦，我地走先。」我同大家講再見，拍拍Ian個頭，佢同丁家岐一樣，飲醉咗酒，會變番做細路仔。

我扶佢上的士，報上各自既地址。

叮一聲，IG突然彈出帖文通知。

丁家岐發佈了1張相片。

我第一個反應係：關我撚事。

第二個反應係：唔記得閂番個更新通知。

第三個反應係：不如望一眼？又唔會死。

我點開。

Before Sunrise.

丁家岐今朝同Nicole去大東山睇日出。

Ian醉下醉下咁問，「你偶像黎架？」

「唔係，佢係我個ex。」

係呀，我特登講出來。

見到丁家岐同第二個女仔一齊，我心中醋意大發。怒火無從宣泄，咁就唯有遷怒係不相干既人身上。

我知道佢係無辜既，但我真係忍唔住。

鬼叫佢生得似丁家岐。

「哦。」Ian見我個臉色唔對路，俾我嚇親，即刻坐直個身：「你無事嗎？」

「其實我仲未ready好。」我毫無感情咁望住前面。我成個心都係丁家岐，根本容不下第二個人。

翻版都唔得。

「唔緊要啦。」

Ian耷低頭，無再講其他野。

我冷冷咁望住佢。

見佢臉上露出受傷既表情，我覺得好有快感，同時，亦覺得好悲哀。

一直以來，我都係度呃緊自己。

根本無人可以取代到丁家岐。

直到呢一刻，我先真正地幻滅並清醒過來。