男友出軌，我決定送26頂綠帽比佢: I for 校服的自述（6）

「Ian仔同佢條女黎啦。」一堆男仔叫囂住咁沖埋黎。

好似置身動物園咁，有馬騮、獅子、熊、老虎、豬，仲有個好似小白兔既女仔。

「凱婷唔係我條女...」Ian即刻解釋。

「仲未係啫，今晚就係架啦！」

「大嫂好！」佢地齊刷刷地向我鞠躬。我怕怕羞羞咁耷低頭，匿係Ian後邊。





Ian明顯招架唔到佢地既攻勢 ，笑住咁話 :「你地唔好咁啦，嚇親人啦！」

佢逐一介紹佢既朋友俾我地識。

佢講咗堆人名，雖然我一個都記唔到：「...呢個係凱婷。」

「衰仔，幾時識咗個靚女架？」

「有好野梗係自己收埋啦，唔通益你咩屌。」





「仲好講，上一次又話介紹女，點知黎既全部係恐龍，連暴龍都有埋呀。」

「我點撚知啫，個肥婆照騙既。」

「佢係咁胸襲你，肯定對你有意思。」

「屌，佢有兩個我咁重，壓落黎受唔住。你想要可以拎去，搭埋條葱俾你都得。」

「邊有人買肥豬肉送葱架。」有人較真起黎。





幾個男仔一齊哈哈大笑。

男仔對身材一般既女仔真係好mean，真係唔知好過知。最慘既係，身材一般既女仔，用埋身體去吸引佢地，人地都唔受...

丁家岐同我搞過一次野，已經厭咗。

唔通我身材真係咁一般？

「大嫂，你襪短裙短喎，等陣要罰飲酒。」獅子笑嘻嘻咁指住我。

Ian睥住獅子，用眼神示意佢唔好亂講野。

「得啦得啦，朋友妻不可嬉吖嘛。」獅子揞住自己既嘴。

由「女朋友」直接升級做「人妻」，都唔知係好嬲定好笑...





又或者，應該係帶住一絲絲曖昧既甜蜜。

「佢地係咁，唔使理佢地。」Ian搭住我膊頭，細細聲係我耳邊講。

「唔係吖，你班frd幾好笑。」

女仔接唔接受男仔追求，會叫閨蜜俾意見。同樣地，男仔叫得你一聲阿嫂，姐係代表認同你既地位。要討得佢兄弟既歡心，先可以到融入佢既圈子。

「影番張大合照先！」

「係邊影？」

「不如坐係上面影？」





要危坐天台邊緣。

「你想唔想上去？」Ian問我。

等陣一個唔小心差錯腳，就真係名副其實既last day。

「你扶實我啦咁。」因為個個都上哂去。

Ian扶住我隻手：「小心啊。」

我踩上張矮凳，好小心咁跨出一隻腳，再伸埋另外一隻腳出去，唔敢亂郁。

為咗打卡可以去到幾盡。

Ian都爬咗上黎，佢坐係我隔離，捉實我隻手，冇放開過。





我可以感受到佢掌心既溫暖。

「你驚唔驚？」Ian問我。

「有你陪咪唔係好驚。」

我偷偷地望下Ian，發現佢又望緊我，兩個人即刻轉移視線，扮望第二度。

天台係第十三樓，昏黃既街燈，車流匯成河流，一條條街道縱橫開去。

微風吹過。

「準備...一！二！三！笑！！！」





「影背影笑乜春啊！」

「今日last day喎！係咪要唱番首校歌先？」有人起哄。

「唱咩歌好？」

「不如唱〈那些年〉！」

「又回到最初的起點 記憶中妳青澀的臉
我們終於來到了這一天 桌墊下的老照片
無數回憶連結 今天男孩要赴女孩最後的約 」

伴奏一響起，情懷同回憶都返哂黎，腦裡面好似走馬看花，出現一幕幕往事。

中三那年，班際話劇比賽。

我同丁家岐企係後台，佢著黑色西裝，我著白色紗裙。

「覺唔覺得我地好似去結婚？」

「邊個話要嫁俾你。」我望住堆亂七八糟既戲服。

「我會等你。」丁家岐一臉認真，佢拖起我隻手：「等到你願意做我新娘為止。」

「如果我都係唔應承呢？」

「咁就...今生無緣下世再相遇。」佢講野邊有咁文縐縐，呢句係劇本對白。

...

我、魚蛋同埋阿瑩陪詩韻避毒撚。

「條友仲係班房守住啊。」

「我數三聲，分頭沖落樓梯。」阿瑩下令。

「一！二！三！」

我同阿瑩跑去前梯，詩韻同魚蛋沖向後樓梯。跑跑跑跑跑。

學校出面有架的士，揮手截停。

「佢地係咪出咗事？咁耐既？」阿瑩心急地問。

離遠見到兩個人，唔係，係三個人三枝箭咁沖埋黎。

毒撚跟係詩韻同魚蛋身後。

只有十步、九步、八步...

「上車！」魚蛋大大力推詩韻入的士。

「快啲閂門！」

毒撚捉住的士門把。

「司機！開車！」我地四個一齊大嗌。

「佢上咗另一部的士，跟係我地後面，點算呀？」

「司機！唔該可唔可以開快啲呀？」

「已經好快架啦！ 」司機仲係一副悠哉悠哉、佛系的模樣。

「最多我地俾多50蚊你！」

「收到！坐穩啲啦，妹妹仔！」司機一下子好似跑車選手上咗身，踩盡油門，我地一路chok下chok下咁展開街頭追逐戰。