男友出軌，我決定送26頂綠帽比佢: 第一次不快樂 （下）

終於輪到我地。

藥房阿叔劈頭第一句就問：「要乜野？蓮花清瘟定必理痛？」

「啊，唔係啊，我地想要事後避孕丸。」丁家岐有啲尷尬咁話。

「你地夠秤未架？」大叔瞇起眼，上下打量我地。

「夠啦。」丁家岐即刻俾身份證佢睇。





「咁做咩唔戴套啊？」佢打開個櫃，拎咗盒藥俾我地：「239蚊。」

「咁貴掛？」都唔知佢係咪見我地細個無經驗，於是坐地起價。

阿叔哈一聲笑咗出黎：「平果隻賣哂啦，呢排需求咁大，度度都咁早收，唔扑野仲有咩可以做？」

丁家岐懶得同佢嘥口水，拎出一張五百蚊。

阿叔望下我，又趁機進行捆綁式銷售：「買埋安全套啦，食事後丸好傷女仔身架，呢隻超薄、貼身，富有彈性，見你地咁細個，應該仲讀緊書，俾個九五折你啦。」





「要兩盒啦咁。」丁家岐淨係想快啲買到藥，解除危機。

「送埋枝水俾你食藥啦妹妹仔。」

雖然阿叔只係推銷貨物，但我真心覺得幾warm。

連個外人都體貼過丁家岐，認真心淡。

丁家岐同我行去公園，幫我扭開枝礦泉水。





「乖啦，快啲食咗佢。」

我向來唔識食藥丸， 灌哂成枝水先吞得落，細細圓圓既藥丸早已溶化，含到成嘴都係苦澀味。

同我既心情一樣。

「係咪食咗架啦？」丁家岐好唔放心，叫我擘大個口畀佢檢查。

「你當我係三歲小朋友咩？」

「都係小心啲好。」

我見佢咁緊張，不由得係心入面反咗個大白眼，頭先扑野既時候，又唔見你咁小心？

「食唔食野呀？」丁家岐望下隻錶，離六點仲有半個鐘。





「有啲攰，想番去瞓覺。」我企起身，感覺身體被掏空，全身骨頭都散哂。

「咁好啦，我送你去搭車。」

一路上無話可說。

每行一步，兩腿之間都隱隱作痛，同埋好似有野流出黎，我諗應該係血。

「做咩行路行得咁奇怪既？」

我搖搖頭，懶得解釋。

明明丁家岐已經進入我既身體，我地之間既關係，理應變得更加親密，但係點解反而好似疏遠咗，多咗層隔膜咁？





臨別前，佢問我：「你聽日仲黎唔黎啊？」

「你又想同我扑野呀？」

「唔係，我想同你溫習，今日都冇溫到。」佢嬉皮笑臉咁話。

「睇下點。」我擠出一個笑容。

直到最後，佢都係無問過我痛唔痛。

突然想搵個人陪我傾偈。

魚蛋對男女之情咩都唔識，如果畀詩韻知道咗呢件事，一定鬧我蠢。

我決定打電話俾阿瑩。





「喂？婷婷啊，我正想打電話畀你。」三秒不到，阿瑩就接咗我電話。

關鍵時刻，果然係姐妹先靠得住。

「你搵我做咩呀？」佢搵我，離不開約我去行街、傾心事或者講八卦。

「呃，成件事好長好長架，我都唔知邊度講起好。不如你講先啦？」佢話。

「我同丁家岐上咗牀。」

電話果頭靜咗三秒：「真架？你地終於搞咗啦？」

「係呀。」





「之前又話唔搞既？做咩突然之間改變主意吖？」阿瑩好好奇咁問。

「我都唔知道呢，一時衝動掛。」

淨係記得當時睇住新聞，瘟疫啊，地震啊，打仗啊，話唔定聽天就輪到香港呢，我唔想到死既時候都仲係處女，咁咪做咯。

「你宜家仲係佢屋企？」

「走咗啦。」

「唔同佢食埋晚飯先？」

「唔啦。」我諗咗一陣，又彈咗句出黎：「其實我有啲驚...我地無戴到套做。」

阿瑩吓咗出黎：「做咩畀佢中出咁傻呀？」

「佢係我男朋友吖嘛。」

「佢咁不負責任既，淨係掛住自己爽，萬一搞大咗你個肚點算？」阿瑩一輪嘴咁數落佢，「唉，我幫你計下安全期先啦。」

「安全期？」我聽都未聽過。

「前七後七吖。」佢知我聽到一頭霧水，好有耐性咁同我解釋：「黎M既前七日同後七日吖。」

「我上次黎M係15號，黎咗一個星期，去到21號，再加多七日，姐係28日。今日係31號，咁咪姐係高危期？」

「係呀。」

「咁點算呀？」

「你食咗事後丸未？」

「食咗啦。」

「咁唯有等多半個月，睇下有無M黎。」

「平時成日嫌黎M麻煩，原來無M黎仲得人驚。」

「如果你仲係驚，咪買枝驗孕棒番黎驗下，同做快測一樣，不過係浸係啲尿，一條線代表無事，兩條線代表有咗。」

都係唔講啦，越講越驚。我將個話題轉番去佢身上：「你頭先唔係話有野講咩？」

「無啦，同你呢啲大件事比起，我果啲係小事，不值一提，出黎再講都未遲。」

「咁好啦，下次再見。」我自己都未搞掂，實在無精力關心人地既事。

有幾個乘客望住我，一臉八卦，我無理到佢地，三唔識七，聽到就聽到啦。

聽講處女身上有種獨特既乳香，扑完野之後，呢種香味就會變成臭味。

我無帶香水，唯有拎枝消毒酒精出黎噴，想噴走臭味。

至於剩底既藥丸，我驚阿媽見到會問長問短，索性全部掉哂去垃圾桶。

反正都唔會有下一次。