男友出軌，我決定送26頂綠帽比佢: 冬季陸運會 （上）

陸運會前一晚，我拖咗丁家岐去我樓下間超市買野。我負責揀，佢負責拎重野，大家分工合作。

我火急火燎咁打開雪藏櫃，將所有急凍魚蛋擺哂落車，驚死俾人買哂。

「哇，你開魚蛋檔啊？」丁家岐好驚訝。

「唔係呀，魚蛋話果度既小食部好貴，又無咩選擇，佢話帶個煲番去，搶下生意，叫我地有幾多貨就掃幾多。」

「咁都得？」丁家岐略帶無語，「你睇下人地幾有商業頭腦，唔似你咁蠢豬。」





「你先係豬，你成家都係豬呀。」

「嗱，老婆大人，你自己認架，唔關我事。」丁家岐即刻跳離我三尺遠。

唔小心自認咗添。

我追過去，捻住丁家岐隻耳仔，睥住佢：「你夠膽再講多一次？」

「講錯野，我係豬我係錯。」 丁家岐舉手投降。





「罰你過黎買哂我煮既魚蛋呀。」

「有無折頭呀老闆娘？」

「有呀。十蚊一串，情侶價，收你十五蚊。」我攤大手掌。話我無商業頭腦吖嗱？我就證明俾你睇，咩叫肥水不流別人田。

「錢債肉償得唔得先？」丁家岐既眼睛放電似地眨啊眨。

「你就想呀。」





「我咁靚仔，益咗你啦。」丁家岐係後面攬住我，下巴挨係我膊頭上。

我捉住佢隻手：「想食Meltykiss朱古力。」

「我都想食，過去買啦。」丁家岐答我。

「香草定係綠茶味好呢？」

「我中意綠茶。」

我擺咗盒綠茶味落手推車。

「呀，好耐未食過小老板紫菜啦。」我踮起腳尖，辣味擺咗係最高果排。

綠色既原味無咩特別，食落口淡淡；反而紅色既辣味，辣中帶點甜，刺激到出哂汗，食過就番唔到轉頭。





不過呢隻紫菜幾熱氣下，食完第二朝會喉嚨痛，要買番杯涼茶黎飲，降下火先得。

丁家岐扶住我條腰，抱起我：「宜家夠高未呀？」

「唔，唔好啊，你搞到我好痕呀。」我係佢手上扭黎扭去。

「你真係好鬼得意。」到手之後，丁家岐放我落黎。

係貨架之中穿梭，研究價錢牌，平凡既柴米油鹽，有種日常生活既甜蜜。

我諗諗下係度傻笑。

「笑咩野呀傻妹？」丁家岐見我笑，眼角亦沾了一絲笑意。





「無呀，諗緊點賺你錢。」如果我講真話，佢實話我矯情扮文藝。

「......」

「嫁俾我咪得咯，成副身家都係你既。」丁家岐半認真半玩笑。

我都希望係真既.....後面果句。

又行咗一大輪，終於去埋單俾錢，條條隊都長到打哂蛇餅，一對，兩對，三對，四對，五對：「你睇下前面，好多對情侶呀。」

「我地咪其中一對囉。不過呢，話唔定有啲係黎偷情既。」丁家岐嘴賤賤咁話：「你估陣間會唔會撞到MC張同Ash呢？」

「你想撞咪去皇埔咯。」

「係喎，佢地果晚有買紅酒。等我們地又買番枝先。」





「做咩買紅酒呀？」我莫名奇妙。

「玩煮飯仔撐枱腳咯。順便灌醉你，想睇你塊臉紅卜卜個樣。」丁家岐手多多咁係架度拎咗枝紅酒落黎：「唔該，想要呢枝1980年既紅酒。」

「再加一盒condom。」突然有人插嘴。

邊個亂入呀？我同丁家岐齊齊擰轉頭，D先生企係我地後面，都係等緊排隊。

我當堂好似中咗石化咒。

佢係一個錯既人，出現係錯誤既時間同錯誤既地點。

「咁啱呀，妹丁。」D先生同我打招呼。





琴晚黑麻麻咩都睇唔到，同佢係廁所又攬又錫，玩到勁放蕩；宜家日光日白再見番面，感覺.....一言難盡。

就好似加咗filter既妝容，無論有幾完美無瑕，一旦暴露係陽光下，同樣會浮粉裂開，連毛孔都睇得一清二楚。

莫非呢啲就係傳說中既見光死?

「係呀，同男朋友行街。」我第一時間想同佢撇清關係，所以特別強調「男朋友」三隻字。

「識得架？」丁家岐扯一扯我衣袖。

「嗯，佢好好人架，上一次我唔見咗銀包，佢企係原地等我番去拎。」

「我叫Darren。」D先生微微點頭。

丁家岐：「唔該哂你呀，呢個傻妹好大懵架，成日都唔見野。」

「咁真係要睇實你女朋友啦。」D先生有意無意咁望向我。

呢句話聽到我好唔舒服，佢係唔係想同丁家岐暗示啲咩野呢？我不自覺皺咗一皺眉頭。

「我會架啦。」好彩，丁家岐都唔想同佢講落去。

dead air咗。

丁家岐攬實我條腰，我挨住佢，D先生就低頭玩手機。

好想快啲走人。

點解條隊郁都唔郁架？最衰都係前面個八婆，買枝野飲，都要碌卡簽一大堆紙，阻住個地球轉。

行到出去，終於鬆咗口氣。

「無聽你提過佢既。」丁家岐停咗係度，語氣有啲責怪既意味。

「無咩特別咪唔講咯。」

「你地見過幾次面呀？」

「一次。計埋今次就兩次。」

「咁佢做咩叫你妹丁呀？」

「因為我細過佢掛。」我再加多句：「我都係啱啱先知佢叫咩名咋。」

「以後有咩事都要同我講呀。」

「嗯，知道啦。」扑街...差啲玩火玩到燒死埋自己，我知錯啦，下次唔敢啦。